ވޯޓުލާ ދުވަހު އެ މެމްބަރެއްގެ ދާއިރާގައި މަޑު ކުރެއްވުމަށް ރައީސް އެދިވަޑައިގެންފި
16 އޯގަސްޓު 2018 | ބުރާސްފަތި 05:59ދާއިރާއަށް ވަޑައިގަތުމަށް އެދިވަޑައިގަތީ ވޯޓްގެ ކަންކަން ގާތުން ބެއްލެވުމަށް
ފައިލް ފޮޓޯ: ރައީސް ޔާމީން ޕީޕީއެމްގެ ޕާލަމަންޓްރީ ގްރޫޕްގެ މެމްބަރުންނާއި އެކު ބޭއްވެވި ބަައްދަލުވުމެއްގެ ތެރެއިން
ރިޔާސީ އިންތިޚާބުގެ ވޯޓުލާ ދުވަހު، ޕީޕީއެމްއަށް ނިސްބަތްވާ ރައްޔިތުންގެ މަޖްލީހުގެ މެމްބަރުން، އެ މެމްބަރެއްގެ ދާއިރާގައި މަޑު ކުރެއްވުމަށް ރައީސް އަބްދުﷲ ޔާމީން އެދިވަޑައިގަންނަވާފައިވާ ކަމަށް ޕީޕީއެމްގެ މަޖްލިސް މެމްބަރަކު ވިދާޅުވެއްޖެއެވެ.
ޕީޕީއެމަށް ނިސްބަތްވާ ރައްޔިތުންގެ މަޖްލީހުގެ މެމްބަރަކު ރާއްޖެއެމްވީއަށް ވިދާޅުވީ، ކޮންމެހެން މާލޭގައި މަޑު ކުރައްވަންޖެހިވަޑައިގަންނަވާ ސަބަބެއް ނެތްނަމަ، ކޮންމެ މެމްބަރަކުވެސް އެބޭފުޅެއްގެ ދާއިރާގައި މަޑު ކުރެއްވުމަށް ރައީސް ޔާމީން އެދިވަޑައިގެންފައިވާ ކަމަށެވެ.
އެގޮތަށް ރައީސް ޔާމީން އެދިވަޑައިގެންނެވީ، ވޯޓްލުން އޮންނަ ދުވަހުގެ ކަންކަން ހިނގާ ނުހިނގާ ގޮތް އެންމެ ފަސޭހައިން ބެލޭނީ ކޮންމެ މެމްބަރަކު ވެސް ނިސްބަތްވާ ދާއިރާގައި މަޑު ކުރެއްވުމުން ކަމަށް ރައީސަށް ފެނިވަޑައިގަންނަވާތީ ކަމަށް މައުލޫމާތު ހިއްސާކުރެއްވި މެމްބަރު ވިދާޅުވިއެވެ.
ރައީސްގެ އެދިވަޑައިގަތުމާއި އެއްގޮތަށް މަޖްލީހުގެ ޕީޕީއެމަށް ނިސްބަތްވާ ގިނަ މެންބަރުން ވޯޓްލާނީ އެ މެމްބަރެއް ނިސްބަތްވާ ދާއިރާއަށް ކަމަށާއި ރީރަޖިސްޓްރޭޝަން މަރުޙަލާގައިވެސް މެމްބަރުން އަމަލު ކުރައްވާފައިވަނީ އެގޮތަށް ކަމަށެވެ.
މައުލޫމާތު ޙިއްސާ ކުރެއްވި މެމްބަރު ވިދާޅުވި ގޮތުގައި، ކޮންމެހެން މާލޭގައި މަޑުކުރައްވަންޖެހޭ ޒަރޫރީ ޙާލަތެއް އޮތް މެމްބަރަކު ދާއިރާއަށް ވަޑައިގަންނަވާކަށް ނުޖެހެއެވެ.
އެނގިފައިވާ ގޮތުގައި ވޯޓްލާ ދުވަހު ދާއިރާގައި މަޑު ކުރައްވާ މަޖްލިސް މެމްބަރުންގެ ތެރޭގައި ޕާޓީގެ އިސް މަޤާމުތަކާއި ޕާލަމަންޓްރީ ގްރޫޕްގެ އިސް މަޤާމުތައް ފުރުއްވާ މެމްބަރުން ހިމެނިވަޑައިގަންނަވައެވެ.
މިކަމާއި ގުޅޭގޮތުން ބަހެއް ހޯދާލުމަށް ޕީޕީއެމްގެ ސެކްރެޓަރީ ޖެނެރަލް އަބްދުﷲ ޚަލީލަށް ރާއްޖެއެމްވީން ގުޅާލުމުން، އޭނާ ވިދާޅުވީ "އެފަދަ ވާހަކައެއް ވިދާޅުވެފައިވާ ކަމެއް އަޅުގަނޑަކަށް ނޭނގޭ" ކަމަށެވެ.
ޚަލީލް ވިދާޅުވީ ވޯޓްލުމަށް ހަމަޖެހިފައިވާ ދުވަހު އެމެންބަރެއްގެ ދާއިރާގައި މަޑުކުރުމަށް ރައީސް އެދިވަޑައިގެންފައިވާކަމުގެ މައުލޫމާތު ވެސް ލިބިވަޑައިގެންފައިނުވާ ކަމަށެވެ.
ރިޔާސީ އިންތިޚާބުގައި ވޯޓްލުމަށް ރީރަޖިސްޓްރީ ކުރުމުގެ މުއްދަތު ހަމަވެފައިވާ އިރު، ރައްޔިތުންގެ މަޖްލީހުގެ ޕީޕީއެމަށް ނިސްބަތްވާ ގިނަ މެމްބަރުންގެ ވޯޓްލުމަށް ރަޖިސްޓްރީ ވެފައިވަނީ އެ މެމްބަރުންގެ ދާއިރާއަށްކަން އިލެކްޝަންސް ކޮމިޝަންގެ ބައެއް މައުލޫމާތު ތަކުން އެނގެއެވެ.
