ހދ. މަކުނުދޫގައި އެއާޕޯޓެއް އަޅައިދޭން އެ ރަށުން ހުށަހަޅާފައިވާ ކަމަށާއި ނަމަވެސް އެ ރަށުގައި އެއާޕޯޓެއް އެޅުމާމެދު ގޮތް ނިންމާނީ ދިރާސާއަކަށްފަހު ކަމަށް ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހު (އިބޫ) ވިދާޅުވެއްްޖެއެވެ.

ހދ. އަތޮޅަށް އިބޫ ކުރައްވާ ތިން ދުވަހުގެ ދަތުރުފުގައި އެ އަތޮޅު މަކުނުދޫގައި މިރޭ ބޭއްވި ޖަލްސާގައި ވާހަަކަފުޅު ދައްކަވަމުން އިބޫ ވިދާޅުވީ އެ ރަށަށް އެންމެ ރަނގަޅީ އެއާޕޯޓެއްތޯ ނުވަތަ ސީޕްލެއިން ޖައްސޭނެ ގޮތް ހެދުންތޯ ބެލުމަށް ދިރާސާއެއް ކުރާނެ ކަމަށެވެ. އަދި އެ ދިރާސާއަށްފަހު، އެންމެ ރަނގަޅު ގޮތް ހޯއްދަވައި ދެއްވާނެ ކަމަށް އިބޫ ވިދާޅުވިއެވެ. 

އިބޫ ވަނީ ވައިގެ މަގުން މަކުނުދޫއަށް ދަތުރުކުރެވޭނެ ގޮތް ހަމަޖައްސައިދެއްވާނެކަމުގެ ޔަޤީންކަން އެ ރަށު ރައްޔިތުންނަށް ދެއްވާފަ އެވެ. 

މަކުނުދޫއަކީ މަސްވެރި ރަށެއްކަން ފާހަގަ ކުރައްވައި އިބޫ ވިދާޅުވީ ގުޅިފައިވާ ޕާޓީތަކުގެ ވެރިކަމެއްގައި މަސްވެރިން ބާނާ މަހުގެ ހަމަ އަގު ހޯއްދަވައި ދެއްވާނެ ކަމަށާއި މަސްވެރި އުފެއްދުންތައް މަކުނުދޫއިން އުފެއްދޭނެ ގޮތް ހައްދަވައި ދެއްވާނެ ކަމަށެވެ. މަކުނުދޫގެ އާބާދީގެ 80 ޕަސެންޓަކީ މަސްވެރި ބައެއްކަން ފާހަގަ ކުރައްވައި އިބޫ ވިދާޅުވީ އެ ރަށުގައި 18 ކަންނެލި މަސްދޯނި އޮތް ކަމަށެވެ.

ގުޅިފައިވާ ޕާޓީތަކުގެ ވެރިކަމެއްގައި ޒުވާނުންނަކީ ހަމައެކަނި ފުޓްސަލް ކުޅޭނެ ބައެއް ނޫން ކަމަށާއި ޒުވާނުންނަށް ވިޔަފާރި ކުރެވޭނެ ގޮތާއި ލޯން ލިބޭނެ ގޮތްތައް ހަމަޖައްސަވައި ދެއްވާނެ ކަމަށް އިބޫ ވިދާޅުވިއެވެ.

ހދ. އަތޮޅަށް އިބޫ ކުރައްވާ ދަތުރުފުޅުގައި މަކުނުދޫގެ އިތުރުން ނޮޅިވަރަމްފަރާއި ހިރިމަރަދޫ އާއި ނެއްލާއިދޫ އާއި ނައިވާދޫއަށް ވަނީ ވަޑައިގެންފައެވެ. ހޯމަ ދުވަހު އެމަނިކުފާނު ނޭކުރަންދޫއަށާއި ވައިކަރަދޫ އާއި ކުމުންޑޫ އާއި ކުރިނބީ އަދި ކުޅުދުއްފުއްޓަށް ވަޑައިގަންނަވާނެ އެވެ. ހދ. އަތޮޅުގެ ބޮޑު ޖަލްސާ އޮންނާނީ ހޯމަ ދުވަހުގެ ރޭ ކުޅުދުއްފުށީގައެވެ.