މަގުމަތިން ފިރިހެން ކުއްޖަކާ ބެހެން އުޅުނު ކަމުގެ ތުހުމަތަށް ބިދޭސީއަކު ހައްޔަރު ކޮށްފި
11 އޯގަސްޓު 2018 | ހޮނިހިރު 06:44ކުޑަކުއްޖާއާ ބެހެން އުޅުނީ މަޖީދީމަގުން
ކުޑަ ފިރިހެން ކުއްޖާއާ ބެހެން އުޅުނު ކަމުގެ ތުހުމަތުގައި ހައްޔަރު ކުރި ބިދޭސީ މީހާ ބިޑި އަޅުވާފައި
މަސްތުގެ ހާލަތުގައި ހުރި ކަމަށް ބެލެވޭ ބިދޭސީއަކު ކުޑަ ފިރިހެން ކުއްޖަކާ މަގުމަތިން ބެހެން އުޅުނު ކަމުގެ ތުހުމަތުގައި ހައްޔަރުކޮށްފިއެވެ.
މަންޒަރު ދުށް މީހަކު "ރާއްޖެއެމްވީ" އަށް ކިޔައިދިން ގޮތުގައި މަސްތުގެ ހާލަތުގައި ހުރި ކަމަށް ބެލެވޭ ބިދޭސީ މީހާ ފިރިހެން ކުއްޖާއާ ބެހެން އުޅުނީ ހުކުރު ދުވަހުގެ ރޭ މަޖީދީމަގު އަގޯރާ ކައިރިންނެވެ. އޭރު އެ ކުއްޖާ ކައިރީގައި އޭނާގެ ބެލެނެވެރިޔާ ހުރި ކަމަށާއި ބިދޭސީ މީހާގެ އަމަލުތައް ހުރި ގޮތުން ފުލުހުންނަށް އެކަން ރިޕޯޓު ކުރުމުން، މަޖީދީމަގުގައި ޓްރެފިކް ބަލަހައްޓަން ތިބި ފުލުހުން ގޮސް އޭނާ ހައްޔަރުކޮށްފައިވާ ކަމަށް މަންޒަރު ދުށް މީހާ ބުންޏެވެ.
މަސްތުގެ ހާލަތުގައި ހުރި ކަމަށް ބެލެވޭ ބިދޭސީ މީހާ ފުލުހުން ހައްޔަރުކޮށްގެން ގެންދިޔައީ ބިޑި އަޅުވައިގެންނެވެ. އޭނާ ބިޑި އަޅުވައިގެން ގެންދިޔައިރު ދެކޮޅުވެރިކަން ދައްކައި ހެދިއެވެ.
އެ ހާދިސާއާ ގުޅޭ ގޮތުން ފުލުހުންގެ ބަހެއް ހޯދާލުމަށް ގުޅާލުމުން، ފުލުހުން ޖަވާބެއް ނުދެއެވެ.
