ތ. އަތޮޅަށް ކުރެއްވި ދަތުރުފުޅު ނިންމާލެއްވުމަށްފަހު، އިބޫ ލ. އަތޮޅަށް!
7 އޯގަސްޓު 2018 | އަންގާރަ 04:11ލ. އަތޮޅު ބޮޑު ޖަލްސާ މިރޭ ލ. ގަމުގައި އޮންނާނެ
ތ. އަތޮޅު ކިނބިދޫއަށް ވަޑައިގެންނެވުމަށް ފަހު އިބޫ ފުރާވަޑައިގަންނަވަނީ
ގުޅިފައިވާ ސިޔާސީ ޕާޓީތަގެ ފަރާތުން މި އިންތިހާބުގައި ވާދަކުރައްވާ އެމްޑީޕީގެ ކެނޑިޑޭޓް އިބްރާހިމް މުހައްމަދު ސޯލިހު (އިބޫ) ތ. އަތޮޅަށް ކުރެއްވި ދެ ދުވަހުގެ ކެމްޕެއިން ދަތުރުފުޅު ނިންމާލެވުއްވުމަށް ފަހު، ލ އަތޮޅަށް ވަޑައިގަތުމަށް ފުރާވަޑައިގެންފިއެވެ.
ދުވަހުގެ ތެރޭގައި ތ އަތޮޅުގެ ނުވަ ރަށަކަށް ވަޑައިގަތުމުމަށް ފަހު އިބޫ ލ. އަތޮޅަށް ވަޑައިގަތުމަށް ފުރާވަޑައިގެންނެވީ، އަންގާރަ ދުވަހު ހެނދުނު ތިމަރަފުށީ ބަނދަރުންނެވެ. ގުޅިފައިވާ ސިޔާސީ ޕާޓީތަކުގެ އިސްވެރިން އިބޫ އާއި އެކު މި ކެމްޕެއިން ދަތުރުފުޅުގައި ބައިވެރިވަޑައިގަންނަވާއިރު، ލ. އަތޮޅުގެ ހުރިހާ ރަށްތަކަށް ވަޑައިގަންނަވާނެވެ.
އެގޮތުން އަންގާރަ ދުވަހު ހެނދުނު އިބޫ އެންމެ ފުރަތަމަ ވަޑައިގަންނަވާނީ، އެ އަތޮޅު އިސްދޫ އަދި ކަލައިދޫއަށެވެ. އިސްދޫ އަދި ކަލައިދޫ އަށް ވަޑައިގެން އެ ދެ ރަށުގެ ރައްޔިތުންނާއި ބައްދަލުކުރައްވާ އިބޫ ވާހަކަފުޅު ދައްކަވަން ހަމަޖެހިފައިވާއިރު، އެ ރަށު ކައުންސިލް މެމްބަރުންނާއި ބައްދަލުކުރައްވާ ރަށަށް ދިމާވެފައިވާ މައްސަލަތަށް އޮޅުންފުލުވާނެއެވެ.
އިބޫ ތ އަތޮޅަށް ކުރެއްވި ދަތުރުފުޅުގެ ތެރެއިން
އެއަށްފަހު އިބޫ ދެން ވަޑައިގަންނަވަނީ ލ. ގަމަށެވެ. ލ. ގަމަށް ވަޑައިގަތުމަށް ފަހު އެ ރަށުގައި ގުޅިފައިވާ ސިޔާސީ ޕާޓީތަކުގެ އޮފީސް ހުޅުވާދެއްވާނެއެވެ. އަދި ލ. އަތޮޅަށް ކުރައްވާ ކެމްޕެއިން ދަތުރުފުޅުގައި ބާއްވާ ބޮޑު ޖަލްސާ ލ. ގަމު ތުނޑީ ބަނދަރު ސަރަހައްދުގައި މިރޭ 21:00 ގައި އޮންނާނެވެ. މި ޖަލްސާގައި ވީހާވެސް ގިނަ އަދަދެއްގެ ރައްޔިތުން ބައިވެރިވުމަށް ގުޅިފައިވާ ޕާޓީތަކުން ގޮވާލާފައިވާއިރު، ޖުމްހޫރީ ޕާޓީގެ ބާނީ ގާސިމް އިބްރާހިމްގެ އަނބިކަނބަލުން އަދި އެޕާޓީގެ ކައުންސިލް މެމްބަރު އައިސަތު ނަހުލާ ބައިވެރިވަޑައިގަންނަވާކަން ފާހަގަކޮށްލެވެ.
ގަމުގައި ބޮޑު ޖަލްސާއަށް ފަހު، އިބޫ ދެން ވަޑައިގަންނަވާނީ އެ އަތޮޅު މާވަށު، މާމެންދޫ، ހިތަދޫ އަދި ފޮނަދޫއަށެވެ. މި ދަތުރުފުޅުގައި އެމްޑީޕީގެ ނައިބް ރައީސް މުހައްމަދު ޝިފާޒާއި، އަދާލަތު ޕާޓީގެ ނައިބް ރައީސް އަލީ ޒާހިރާއި، ޖުމްހޫރީ ޕާޓީގެ ނައިބް ލީޑރ ޑރ. ހުސެއިން ރަޝީދާއި، ރައްޔިތުންގެ މަޖިލީހުގެ ގަމު ދާއިރާގެ މެމްބަރު ފައްޔާޒު އިސްމާއިލްގެ އިތުރުން މެމްބަރު ރޮޒޭނާ އާދަމާއި، މެމްބަރު އިމްތިޔާޒު ފަހުމީ އަދި މެމްބަރު މުހައްމަދު ވަހީދު (ލޯޔަރު ވައްޑޭ) ބައިވެރިވަޑައިގަންނަވާއެވެ.
