އިނގުރައިދޫ ފަޅުކޮނެ ނުނިމެނީސް ތަކެތި ގެންދަން އުޅުމުން ރައްޔިތުން ނުކުމެ ތަކެތި ހިފަހައްޓައިފިއެވެ.
ރާއްޖެއެމްވީއަށް މައުލޫމާތު ދިން އެރަށުގެ ރައްޔިތުންތަކެއް ބުނީ އެރަށުގެ ފަޅުކޮނުމަށް ގެނައި ތަކެތި ގެންދިއުން ރަށުގެ ރައްޔިތުން ނުކުމެ ހުއްޓުވީ، ފަޅުކޮނެ ނުނިމެނީސް އެތަކެތި ގެންދަން މަސައްކަތް ކުރުމުން ކަމަށެވެ.
އެރަށުގައި ފަޅުކޮނުމުގެ މަސައްކަތް ކުރަނީ އެމްޓީސީސީން, އެ ކުންފުނީގެ ތަކެތީގައެވެ.
ހޯމަ ދުވަހު އެމްޓީސީން އެތަކެތި ގެންދަން މަސައްކަތްކުރުމުން އެރަށުގެ ރައްޔިތުންތަކެއް ބަނދަރު ސަރަހައްދަށް ނުކުމެ ވަނީ ވެހިކަލް ތަކަށް އަރައިފައެވެ.
މައުލޫމާތު ލިބިފައިވާ ގޮތުގައި ރަށުގެ ކުދި ބޮޑު އެންމެން މިހާރު ތިބީ އެރަށު ބަނދަރު ސަރަހައްދަށް ޖަމާވެފައެވެ، އަދި އަޑުގަދަ ކުރާ ބޭނުންކޮށްގެން އެރަށުގެ ފަޅުގެ މަސައްކަތް ނުނިންމާ ތަކެތި ނުގެންދެވޭނެ ކަމަށް ދަނީ ގޮވާލަމުންނެވެ.
އެރަށުގެ ބައެއް ރައްޔިތުން ބުނީ 2015 ވަނަ އަހަރުއްސުރެ ފަޅުކޮނުމުގެ މަސައްކަތް ކުރަމުންދާ ކަމަށާއި އެފަޅު ދުވަހަކު ވެސް ނިމޭ ކަމަކަށް ނުހަދާ ކަމަށެވެ. އަދި ފަޅުކޮނުގެ ބޮޑުބައެއް ކުރިއަށް ގެންދިޔަ ނަމަވެސް މަަސައްކަތް ނިމޭނެ ދުވަހެއް ނޭނގޭ އިރު ތަކެތި ގެެންގޮސްގެން ނުވާނެ ކަމަށް އެރަށުގެ ރައްޔިތުން ދަނީ ގޮވާލަމުންނެވެ.
ރައްޖެއެމްވީއާ ވާހަކަ ދައްކަމުން އެރަށުގެ ބައެއް މީހުން ބުނީ، ތަކެއްޗާއި ވެހިކަލްތައް ގެންދަނީ ކޮންތަނަކަށް ކަމެއް ވެސް އެއްވެސް ވަރަކަށް ނޭނގޭ ކަމަށެވެ. އަދި އެރަށު ކައުންސިލަށް ވެސް އެއްވެސް އެއްޗެއް އަންގާފައި ނުވާ ކަމަށް ވަނީ މައުލޫމާތު ލިބިފައެވެ.
