ދައުލަތުގެ އެންމެ ފައިސާ ފޮއްޗެއްގައި ވެސް އަޅުގަނޑު ނުޖެހޭނަން: އިބޫ

ދިވެހި ދައުލަތުގެ އެންމެ ފައިސާ ފޮއްޗެއްގައި ވެސް ޖެހިވަޑައިނުގަންނަވާނެ ކަމަށް ގުޅިފައިވާ ސިޔާސީ ޕާޓީތަކުގެ ފަރާތުން ކުރިއަށް އޮތް ރިޔާސީ އިންތިހާބުގައި ވާދަކުރައްވާ ކެނޑިޑޭޓް އިބްރާހިމް މުހައްމަދު ސޯލިހު (އިބޫ) ވިދާޅުވެއްޖެއެވެ.

ތ. އަތޮޅަށް ގުޅިފައިވާ ޕާޓީތަކުން ކުރައްވާ ދެ ދުވަހުގެ ކެމްޕެއިން ދަތުރުފުޅުގެ ތެރެއިން އެ އަތޮޅު ކިނބިދޫގެ ރައްޔިތުންނާ ބައްދަލުކުރައްވައި ވާހަކަ ދައްކަވަމުން އިބޫ ވިދާޅުވީ ކޮލިޝަންގެ ކެނޑިޑޭޓެއްގެ ގޮތުގައި އެމަނިކުފާން މަސައްކަތް ކުރައްވާ އިރު، އެމަނިކުފާނަށް އެންމެ އިސްކަމެއް ދޭންޖެހިފައި ވަނީ ހުރިހާ ޕާޓީތަކެއްގެ ވިސްނުން އެއްތަނަކަށް ޖަމާކޮށް، އެންމެންގެ ބައިވެރިވުމާ އެކު ކަންކަން ނިންމުން ކަމަށެވެ. އެ މަސައްކަތުގެ ތެރެއިން ދައުލަތުގެ އެންމެ ފައިސާ ފޮއްޗެއްގައި ވެސް ޖެހިވަޑައިނުގަންނަވާނެ ކަމުގެ ޔަގީންކަން އިބޫ ވަނީ ދިވެހި ރައްޔިތުންނަން ދެއްވާފައެވެ.

"ޔާގީންކޮށް މިއަދު މި އަރުވާނީ ތިޔަބޭފުޅުންގެ ދައުލަތުގެ އެންމެ ފައިސާފޮއްޗެއްގައި ނުޖެހޭނެ ކަމުގެ ޔާގީންކަން" ކިނބިދޫ ސްޓޭޖް ސަރަހައްދުގައި ހުންނަވާ ވާހަކަފުޅު ދައްކަވަމުން އިބޫ ވިދާޅުވިއެވެ.

އިބޫ ވިދާޅުވީ ގުޅިފައިވާ ޕާޓީތަކެއްގެ ވެރިކަމުގައި މަސައްކަތް ކުރައްވަނީ ހުރިހާ ފިކުރެއްގެ ވިސްނުމާ އެއްގޮތަށް ކަމަށެވެ. އެއީ އެމަނިކުފާންގެ ޒިންމާއެއް ކަމަށް ދެކިވަޑައިގަންނަވާ ކަމަށް ވިދާޅުވިއެވެ.

"އަޅުގަނޑުގެ ޒިންމާ ވެސް ވަރަށް ބޮޑު. އެނގިވަޑައިގަންނަވާނެ އަޅުގަނޑުމެން މި ނިކުންނަނީ ގުޅިފައިވާ ކޯލިޝަނެނެންގެ ތެރެއިން. އެ ހުރިހާ ބޭފުޅުންގެ ފަރާތުން އަޅުގަނޑު މި ހުރީ ރިޔާސީ ކެނޑިޑޭޓެއްގެ ގޮތުގައި ތިބޭފުޅުންގެ ކުރިމައްޗަށް ނުކުމެ. އަޅުގަނޑުގެ އެންމެ މުހިންމު އެއް ވާޖިބަކީ އަޅުގަނޑު ދެކޭ ގޮތުގައި، މި ހުރިހާ ބޭފުޅުންގެ ހިޔާލުތަށް އެއްތަނަކަށް ޖެނެސް އެކުގައި ކަންތަށްތަށް ނިންމާ، އެންމެންގެ ވިސްނުމާއި އެއްގޮތަށް މިކަން ކުރުން. އިރާދަ ކުރެއްވިޔާ އަޅުގަނޑު ތެދުވެރިކަމާ އެކު ތިބޭފުޅުންނަން އެ މަސައަކަތް ކޮށްދޭނަން،" އިބޫ ވިދާޅުވިއެވެ.

މީގެ އިތުރުން އިބޫ ވިދާޅުވީ ކިނބިދޫ ދާއިރާގެ ރައްޔިތުންގެ މަޖިލީހުގެ މެމްބަރު އަބްދުﷲ ރިޔާޒު ނުހައްގުން ޖަލަށް ލާފައިވާތީ ހިތާމަކުރައްވާ ކަމަށެވެ. ރިޔާޒަކީ ގުޅިފައިވާ ޕާޓީތަކުން ކުރާ މަސައްކަތުގައި އިސްކޮށް ހަރަކާތްތެރިވެ ވަޑައިގެންވެި ބޭފުޅުންކަން އިބޫ ފާހަގަކުރެއްވިއެވެ.

އިބޫ ތ. އަތޮޅަށް ކުރައްވާ ދަތުރުފުޅުގެ ތެރެއިން

"އަބްދުﷲ ރިޔާޒު ޖަލުގައި ނުހައްގުން އަދަބު ލިބެމުންދާތާ މިހާރު 150 ދުވަހަށް ވުރެ ގިނަ ވެއްޖެ. ކުރި ކުށެއް ނެތް. އެހެންނަމަވެސް، ނުކުރާ ކުށެއްގައި ޝަރީއަތަށް ގެންދިޔަ މައްސަލަ ނޫން އެހެން މައްސަލައެއްގައި އެ މެމްބަރު ޖަލުގައި އެ ހުންނަވަން ޖެހުނީ. މިއީ ރާއްޖޭގެ އިންސާފުގެ ދާއިރާ މި ވަގުތު އޮތް ގޮތް. މިހެން ހުރި ސަބަބުތަކަށްޓަކައި އަޅުގަނޑުމެން އިސްލާހުކުރުމަށް އެކުގައި ނުކުމެ މިތިބީ. ރިޔާޒަކީ އަޅުގަނޑުމެން މިކުރާ މަސައްކަތުގައި އިސްސަފުގައި ކުރިގެން ޖެހިލުމެއް ނެތި މަސައްކަތް ކުރަމުންގެންދާ ބޭފުޅެއް ކަން އަޅުގަނޑު ފާޙަގަކުރަން،" އިބޫ ވިދާޅުވިއެވެ.

އިބޫ ކިނބިދޫއަށް ވަޑައިގަތުމުން ގިނަ އަދަދެއްގެ ރައްޔިތުން ވަނީ އެރަށުގެ ބަނދަރު ސަރަހައްދުން މަރުޙަބާ ދަންނަވާފައެވެ. މިއީ ތ. އަތޮޅުގެ ރަށަކުން އެމަނިކުފާނަން މަރުޙަބާ ދަންނަވަން އެންމެ ގިނަ ރަށްޔިތުން ނުކުން އެއް ރަށްކަން ފާހަގަކޮށްލެވެ. މި ދަތުރުފުޅުގައި އިބޫ ދެން ވަޑައިގަނަންވަނީ އެ އަތޮޅު ތިމަރަފުއްޓަށެވެ. އެރަށައް ވަޑައިގެން ގުޅިގައިވާ ޕާޓީތަކުގެ އޮފީހާއި އަންހެނުންގެ ޖަގަހަ ހުޅުވައިދެއްވާނެއެވެ. އަދި ތ. އަތޮޅުގައި ބާއްވާ ބޮޑު ޖަލްސާ މިރޭ ތިމަރަފުށީގައި ބޭއްވާނެވެ.