ސައުދީގައިި ހުރި ކެނެޑާ އެމްބަސެޑަރ ފޮނުވާލަނީ
6 އޯގަސްޓު 2018 | ހޯމަ 06:32ކެނެޑާގެ އެމްބަސެޑަރަށްވަނީ ގައުމު ދޫކޮށް ދިއުމަށް 24 ގަޑިއިރު ދީފައި
ހިލަރީ ކްލިންޓަން(ކ) އަދި މިޝޭލް އޮބާމާ(ވ) މެދުގައި ސަމަރް ބަދާވީ. އޭނާއަށްވަނީ 2012 ވަނަ އަހަރު ވިމެން އޮފް ކަރޭޖް އޮވޯޑް ލިބިފައި
ސައުދީ އަރަބިއާގެ ދާޚިލީ ކަންކަމާއި ބެހޭކަމަށްބުނެ ކެނެޑާއާއި އެކު ކުރިޔަށްގެންދާ ވިޔަފާރިތަކާއި އިންވެސްޓްމަންޓްތައް މަޑުޖައްސާލައި އެ ގައުމުގައި ހުންނަ އެމްބަސެޑަރު ފޮނުވާލަން ނިންމައިފިއެވެ.
ސައުދީގެ ފޮރިން މިނިސްޓްރީއިން ސިލްސިލާކޮށް ކުރި ޓްވީޓްތަކެއްގައި ބުނެފައިވަނީ އެ ގައުމުގައި ހުންނެވި ކެނެޑާގެ ސަފީރު ފޮނުވާލުމަށްފަހު ކެނެޑާގައި ހުންނެވި ސައުދީގެ ސަފީރު އަނބުރާ ގައުމަށް ގެންދިއުމަށް ނިންމާފައިވާކަމަށެވެ.
ސައުދީން މި ފިޔަވަޅު އަޅާފައިވަނީ އެގައުމުގައި އިންސާނީ ހައްގުތަކަށް ގޮވާލާ އެތައް އެކްޓިވިސްޓުންނެއް ހައްޔަރުކޮށްފައިވާކަމަށާއި އެކަމާ އިންތިހާއަށް ކަންބޮޑުވާކަމަށް ކެނެޑާއިން ބުނުމުންނެވެ.
ހައްޔަރުކޮށްފައިވާ މީހުންގެ ތެރޭގައި ސައުދީއާއި އެމެރިކާއަށް ނިސްބަތްވާ، އަންހެނުންގެ ހައްގުތަކަށް ވަކާލާތުކުރާ އެކްޓިވިސްޓެއްކަމަށްވާ ސަމަރް ބަދާވީ ހިމެނެއެވެ.
ސަމަރް ބަދާވީ ގެންދިޔައީ ސައުދީގައި އަންހެނުންގެ ބަލަދުވެރިކަން ފިރިހެނުންގެ މައްޗަށް އޮންނަ އޮތުން ނިމުމަކަށް ގެނައުމަށް ގޮވާލަމުންނެވެ.
ސައުދީގެ ފޮރިން މިނިސްޓްރީއިން ބުނެފައިވަނީ "ދާޚިލީ ކަންކަމާއި ބެހޭ އެއްވެސް ފަރާތެއް ބަލައި ނުގަންނާނެ" ކަމަށެވެ.
އެ ގައުމުން އިޝާރާތް ކޮށްފައިއެވަނީ، މަދަނީ ޖަމްއިއްޔާތަކުގެ ފަރާތްތަކާއި އަންހެނުންގެ ހައްގުތަކަށް މަސައްކަތްކުރާ ފަރާތްތައް ވަގުތުން މިނިވަންކުރުމަށް މިދިޔަ ހަފްތާގައި ކެނެޑާއިން ގޮވާލި ގޮވާލުމަށެވެ.
ސައުދީ އަރަބިއާއިން އެޅި ޑިޕްލޮމެޓިކް ފިޔަވަޅުތަކާއިމެދު ކެނެޑާ ސަރުކާރުގެ ރަސްމީ ބަހެއް އަދި ހާމަކޮށްފައެއް ނުވެއެވެ.
