ގާދިއްފުށީ އަންހެނުންގެ ފަރިހަރާކާތްތަކާއި އެކު އިބޫ އަށް ހޫނު މަރުޙަބާއެއް
މި ދަތުރުފުޅުގައި ތިމަރަފުށި އަދި ގަމުގައި ބޮޑު ޖަލްސާއެއް ބާއްވާނެ
ގާދިއްފުށިން އިބޫއަށް ހޫނު މަރުޙަބާއެއް ދަންނަވަނީ
ތ. އަތޮޅު ގާދިއްފުށީ އަންހެނުންގެ ފަރި ހަރަކާތްތަކާއިއެކު, ގުޅިފައިވާ ޕާޓީތަކުގެ ފަރާތުން އިންތިހާބުގައި ވާދަކުރާ އެމްޑީޕީގެ ކެންޑިޑޭޓް އިބްރާހިމް މުހައްމަދު ސޯލިހު (އިބޫ) އަށް ހޫނު މަރުޙަބާއެއް ދަންނަވާއިފިއެވެ.
އާބާދީގައި ގާތްގަނޑަކަށް 600 މީހުން ދިރިއުޅޭ މިރަށަށް އިބޫ ވަޑައިގެންނެވީ އާދީއްތަ ދުވަހު ހެނދުނު އެވެ. އިބޫ ގާދިއްފުއްޓަށް ވަޑައިގެންނެވުމުން އެރަށުގެ ގިނަ ރައްޔިތުން ވަނީ ބަނދަރު މައްޗަށް ޖަމާވެ އެމަނިކުފާނަން މަރުޙަބާ ދަންނަވާފައެވެ. ގާދިއްފުށީ އަންހެނުން އިބޫ އަށް މަރުޙަބާ ކިޔުމުގެ ގޮތުން "ދުރައްދާންވީހެ ގައުމު އެކީ ދީފަ" މި ލަވައަށް ވަނީ ސަގާފީ ނެށުން ހުށަހަޅައިދީފަ އެވެ.
ގާދިއްފުށީ ރައްޔިތުންނާއި ބައްދަލުކުރެއްވުމަށް ފަހު އެމަނިކުފާން ދެން ވަޑައިގަންނަވަނީ އެ އަތޮޅު ގުރައިދޫއަށެވެ.
Caption
ހަތަރު ދުވަހުގެ މި ދަތުރުފުޅުގައި އިބޫގެ އަރިހުގައި ތިމަރަފުށީ ދާއިރާގެ މެމްބަރު މުހައްމަދު މުސްތަފާ އާއި ޖުމްހޫރީ ޕާޓީގެ ޑެޕިއުޓީ ލީޑަރު ޑރ. ހުސައިން ރަޝީދާއި އަދާލަތު ޕާޓީގެ ނައިބު ރައީސް އަލީ ޒާހިރުގެ އިތުރުން ކުރީގެ ރައީސް މައުމޫން އަބްދުލްގައްޔޫމްގެ ރިފޯމް މޫވްމެންޓުގައި އުޅުއްވާ، ތުލުސްދޫ ދާއިރާގެ މެމްބަރު މުހައްމަދު ވަހީދު އިބްރާހިމް (ލޯޔަރު ވައްޑެ) އާއި ގަމު ދާއިރާގެ މެމްބަރު ފައްޔާޒު އިސްމާއިލް އަދި އައްޑޫ މީދޫ ދާއިރާގެ މެމްބަރު ރޮޒެއިނާ އާދާމް ބައިވެރިވަޑައިގަންނަވަ އެވެ.
އިބޫ އާދީއްތަ ދުވަހު ދެން ވަޑައިގެންނެވުމަށް ހަމަޖެހިފައި ވަނީ ގުރާދޫ، މަޑިފުށި، ވިލިފުށި، ހިރިލަންދޫއަށެވެ. ހޯމަ ދުވަހު ވޭމަންދޫ، ކިނބިދޫ، އޮމަދޫ ވަޑައިގެންނަވާއިރު، ތ އަތޮޅަށް ހާއްސަކޮށްގެ ބާއްވާ ބޮޑު ޖަލްސާ ހޯމަ ދުވަހުގެ ރޭ އޮންނާނީ ތިމަރަފުށީގަ އެވެ.
ދެ ދުވަހަށް ފަހު އެ މަނިކުފާނު ވަޑައިގަންނަވާނީ ލ. އަތޮޅަށެވެ. ލ. އަތޮޅުގެ ބޮޑު ޖަލްސާ ބާއްވަން ހަމަޖެހިފައި ވަނީ އަންގާރަ ދުވަހުގެރޭ ގަމު ތުނޑި ބަނދަރު ސަރަހައްދުގައެވެ.
