މީރާ ހަމައަކަށް އަޅުވާނެ ކަމަށް އިބޫ ވިދާޅުވުމުން، ޔަޒީދު ބަހުގެ ހަމަލާތަކެއް
4 އޯގަސްޓު 2018 | ހޮނިހިރު 08:14އިބޫ ވިދާޅުވެފައި ވަނީ މީރާ ބިރުގަންނަ ތަނަކަށް ވެގެން ނުވާނެ ކަމަށް
ޔަޒީދާއި އިބޫ: އިބޫއަށް ޔަޒީދު ފާޑުވިދާޅުވީ ޓެކްސްގެ ނިޒާމު ހަރުދަނާ ކުރާނެ ކަމަށް ވިދާޅުވެ، ދެއްކެވި ވާހަކަފުޅުތަކާ ގުޅިގެން
ގުޅިފައިވާ ޕާޓީތަކުގެ ވެރިކަމެެއްގައި މޯލްޑިވްސް އިންލަންޑް ރެވެނިއު އޮތޯރިޓީ (މީރާ)އަކީ ވިޔަފާރިވެރިން ބިރުގަންނަ ތަނަކަށް ވެގެން ނުދާނެ ކަމަށް ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސާލިހު (އިބޫ) ވިދާޅުވުމުން، ކޮމިޝަނާ ޖެނެރަލް އޮފް ޓެކްސޭޝަން ޔަޒީދު މުހައްމަދު އެމަނިކުފާނަށް ބަހުގެ ހަމަލާތަކެއް ރައްދު ކުރައްވައިފިއެވެ.
މީރާއަށް އަށް އަހަރު ފުރުމުގެ މުނާސަބަތުގައި ހުކުރު ދުވަހުގެ ރޭ ދަރުބާރުގޭގައި ބޭއްވި ޖަލްސާގައި ވާހަކަފުޅު ދައްކަވަމުން ޔަޒީރު ވިދާޅުވީ އަމިއްލަ މަސްލަހަތު ހިމާޔަތް ކުރަން އުޅޭ ބަޔަކު މީރާގެ ތަސައްވުރު ހުތުރު ކުރަން މަސައްކަތް ކުރަމުންދާ ކަމަށެވެ. ޖީއެސްޓީގެ ސަބަބުން ކުދި ވިޔަފާރިތައް ބަނގުރޫޓުވަމުންދާ ކަމަށް ބަޔަކު ބުނަމުންދާ ކަމަށާއި ވިޔަފާރީގެ ފައިދާއިން ނަގާ ޓެކްސްގެ ސަބަބުން ކުދި ވިޔަފާރިތައް ހީނަރުވަމުންދާ ކަމަށް ވެސް ބުނަމުންދާ ކަމަށް ޔަޒީދު ވިދާޅުވިއެވެ.
އޭނާ ވިދާޅުވީ ގަވާއިދުތައް ހަދަހަދައިގެން ކުދި ވިޔަފާރިތައް ޖޫރިމަނާ ކުރަމުންދާ ކަމަށް ބަޔަކު ބުނަމުންދާއިރު، އެ ގަވާއިދުތަކަކީ މަޖިލީހުން ފާސްކޮށްފައިވާ ގާނޫނުތަކުގައި ކަނޑައަޅާފައިވާ ޖޫރިމަނާތަކެެއް ކަމަށެވެ. އަދި ފާޑުކިޔާ ފަރާތްތަކަށް އެކަން ނޭނގެެނީ ކީއްވެގެންތޯ ވިދާޅުވެ، ޔަޒީދު ވަނީ ސުވާލުތަކެއް ކުރިމަތި ކުރައްވާފައެވެ.
"އަމިއްލަ މަސްލަހަތުތަކެއް ހިމާޔަތް ކުރަން އުޅޭ މަދު ބަޔަކު، މީރާގެ ތަސައްވުރު ހުތުރުކޮށް، ރާއްޖޭގަައި ގާއިމުކޮށްފައިވާ ޓެކްސްގެ ނިމާޒު ހަލާކުކޮށްލުމަށް ހަގީގަތާ ހިލާފު ވާހަކަތަކެއް ފަތުރަމުންދާ ކަމީ އަޅުގަނޑު ވަރަށް ހިތާމަ ކުރާ ކަމެއް. ޖީއެސްޓީގެ ސަބަބުން ކުދި ވިޔަފާރިތައް ބަންގުރޫޓުވަމުންދާ ކަމަށް ބުނަމުންދާއިރު، ޖީއެސްޓީއަކީ މުދަލާއި ހިދުމަތް ހޯދާ ފަރާތްތަކުން އާދެ، އާންމު ރައްޔިތުން ދައްކާ އެއްޗެއްކަން އެބޭފުޅުންނަށް އެނގިވަޑައިނުގަންނަވަނީތޯ؟... ގަވާއިދުތައް ހަދަހަދައިގެން ކުދި ވިޔަފާރިތައް ޖޫރިމަނާ ކުރަމުންދާ ވާހަކަ ދައްކާއިރު، މިއީ ސީދާ ގާނޫނު ހަދާ މަޖިލީހުން ހައްދަވާފައިވާ ޓެކުހުގެ ގާނޫނުތަކުގައި ކަނޑައަޅާފައިވާ ޖޫރިމަނާތަކެެއްކަން ހަމަ އެނގިވަޑައިނުގަންނަވަނީތޯ،" ޔަޒީދު ވިދާޅުވިއެވެ.
އިބޫ ވިދާޅުވެފައިވާ ވާހަކަފުޅުތަކަށް ރައްދު ދެއްވައި ޔަޒީދު އެގޮތަށް ވާހަކަފުޅު ދެއްކެވިއިރު، ރާއްޖެއަށް ތައާރަފްކޮށްފައިވާ ޓެކްސްގެ ނިޒާމަކީ އެމްޑީޕީގެ ވެރިކަމުގައި ރާއްޖެއަށް ތައާރަފު ކުރި ނިޒާމެކެވެ. އެގޮތުން 17 ވަނަ ރައްޔިތުންގެ މަޖިލީހަށް ރައީސް މުހައްމަދު ނަޝީދު ހުށަހެޅުއްވި އިގްތިސާދީ ސިޔާސަތުގެ ދަށުން ޓެކްސް ނެގުމާ ބެހޭ އިދާރީ ގާނޫނެއް ހަދައި މީރާ އުފައްދަވައި، ޓެކްސް އެޕީލް ޓްރައިބިއުނަލް ވެސް އުފެއްދެވިއެވެ. އަދި ޖީއެސްޓީ އާއި ޓީޖީއެސްޓީ އާއި ބީޕީޓީ ނެގުމާ ގުޅޭ ގާނޫނުތައް ރައްޔިތުންގެ މަޖިލީހަށް ހުށަހަޅައި ފާސްކުރީ އެމްޑީޕީގެ ޕާލަމެންޓްރީ ގްރޫޕުގެ ވޯޓުންނެވެ. ޓެކްސާ ގުޅޭ ބިލުތައް މަޖިލީހުން ފާސް ކުރުމަށް އޭރުގެ އިދިކޮޅު ފަރާތްތަކުން ކުރިމަތިކުރުވި ފިއްތުންތަކާ އެކުގައި ރައީސް ނަޝީދު ހުށަހެޅުއްވި އިގްތިސާދީ ޕެކޭޖުގައި ހިމެނޭ ޓެކްސްގެ ގާނޫނުތައް މަޖިލީހުން ފާސްކުރިއިރު، އެމްޑީޕީ ޕާލަމެންޓްރީ ގްރޫޕުގެ ލީޑަރަކަށް ހުންނެވީ އިބޫއެވެ.
ރައީސް ނަޝީދު މަޖިލީހަށް ހުށަހަޅުއްވައިގެން، ކޮމިޝަނާ ޖެނެރަލްގެ މަގާމަށް 2010 ވަނަ އަހަރު އައްޔަން ކުރެއްވި ޔަޒީދު، އިބޫއަށް ފާޑުވިދާޅުފައި ވަނީ ކެމްޕެއިން ދަތުރުފުޅެއްގައި ބ. އޭދަފުއްޓަށް ވަޑައިގެން އިބޫ ދެއްކެވި ވާހަކަފުޅަކާ ގުޅިގެންނެވެ.
މިދިޔަ މަހުގެ 29 ވަނަ ދުވަހު އޭދަފުށީގައި ވާހަކަފުޅު ދައްކަވަމުން އިބޫ ވިދާޅުވީ އެމްޑީޕީގެ ސަރުކާރުން ރާއްޖެއަށް ތައާރަފް ކުރި ޓެކްސްގެ ނިޒާމު ސަރުކާރުން ގަޑުބަޑުކޮށް ނާޖާއިޒް ފައިދާ ނަގަމުންދާ ކަމަށެވެ. މީރާއިން ޓެކްސްގެ ނިޒާމު ނުހައްގު ގޮތުގައި ޖޫރިމަނާތަކެއް ކުރަމުންދާ ކަމަށާއި އޭގެ ސަބަބުން މެދުފަންތީގެ ވިޔަފާރިތައް ބަންގުރޫޓުވެ، ރޫޅެމުންދާތަން ފެންނަމުންދާ ކަމަށް އިބޫ ވިދާޅުވިއެވެ.
އެމަނިކުފާނު ވިދާޅުވީ ގުޅިފައިވާ ޕާޓީތަކުގެ ވެރިކަމެއްގައި އެންމެ ފުރަތަމަ ހަމަޔަކަށް އަޅުވަންޖެހޭ ތަނަކީ މީރާ ކަމަށެވެ.
"އިރާދަ ކުރެއްވިއްޔާ އަޅުގަނޑުމެންގެ ވެރިކަމެއްގައި ޓެކްސް ނިޒާމަށް ގެންނަ ބަދަލުން މީރާއަކީ ވިޔަފާރިވެރިން ބިރުގަންނަ ތަނެއްގެ ގޮތަކު ނޯންނާނެ. މީރާއަށް ބޭނުންހާ ގަވާއިދެއް ހަދައިގެން ވިޔަފާރިވެރިންގެ އަތަކުންނެއް މަޖުބޫރުކޮށްގެނެއް ޖޫރިމަނާތަކެއް ނުކުރެވޭނެ. ރައްޔިތުންގެ އަތުން ނަގަންޖެހޭ ފައިސާއެއް ވެއްޖެއްޔާ ނަގަންޖެހޭނީ ރައްޔިތުންގެ މަޖިލީހުން ފާސްކުރާ ގާނޫނަކުން. އެއީ ގާނޫނުއަސާސީ ދަންނަ އުސޫލަކީ،" ބ. އަތޮޅު ނުވަ ރަށަކަށް ކުރެއްވި ދަތުރުފުޅުގައި އޭދަފުއްޓަށް ވަޑައިގެން އިބޫ ވިދާޅުވެފައިވެއެވެ.
