ބޭރުގެ ފަރާތްތަކަށް ބިން މިލްކުކުރެވޭ ގޮތަށް 2015 ވަނަ އަހަރު ޤާނޫނު އަސާސީއަށް ގެނައި އިސްލާހު ބަދަލު ކުރައްވާނެ ކަމަށާއި އެ އިސްލާހަށް އޭރު ވޯޓު ނުދެއްވާ ކަމަށް ގުޅިފައިވާ ސިޔާސީ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހު (އިބޫ) ވިދާޅުވެއްޖެއެވެ.
ބުރާސްފަތި ދުވަހުގެ ރޭ "ގެޓް ޓު ނޯ އިބޫ" ގެ ނަމުގައި ބޭއްވި ފޯރަމްގައި ޒުވާނުންގެ ސުވާލުތަކަށް ޖަވާބު ދެއްވަމުން އިބޫ ވިދާޅުވީ އެ އިސްލާހަކީ ރަނގަޅަށް ގެނެވުނު އިސްލާހެއް ކަމަށް ޤަބޫލުނުކުރައްވާ ކަމަށާއި ޕާލިމެންޓްރީ ގްރޫޕްގެ ބައްދަލުވުމުގައި އޭރު ފާސްކޮށްފައި ވަނީ ފްރީ ވިޕެއް ނެރުމަށް ކަމަށެވެ.
އެ އިސްލާހަށް އެމްޑީޕީގެ ބައެއް މެމްބަރުންގެ ތާއީދު ކުރެއްވިކަން ފާހަގަކުރައްވައި އިބޫ ވިދާޅުވީ އޭރު ބިން މިލްކު ކުރެވޭ އިސްލާހަށް ވޯޓު ނުދެއްވީ "އަމިއްލަ ޟަމީރު އެކަން ޤަބޫލުނުކުރާތީ" ކަމަށެވެ.
ރައްޔިތުންގެ މަޖިލީހަށް 2015 ވަނަ އަހަރުގެ ޖުލައި 21 ވަނަ ދުވަހު ސަރުކާރުގެ ފަރާތުން އެ ބިލް ހުށަހެޅުއްވީ ވެރިކަންކުރާ ޕީޕީއެމްގެ ޕާލިމެންޓްރީ ގުރޫޕްގެ ލީޑަރު އަހްމަދު ނިހާން ހުސެއިން މަނިކުއެވެ.
ބިން މިލްކްކުރެވޭ ޤާނޫނަށް ގެނައި އިސްލާހުގައިވާ ގޮތުން ރާއްޖެ އިން ބިން ވިއްކާނީ އެއް ބިލިއަން ޑޮލަރަށް ވުރެ ބޮޑު އިންވެސްޓެއްކުރާ ބޭރުގެ ފަރާތްތަކަށެވެ. އެ ފަރާތްތަކަށް ވިއްކާ ބިމަކީ އެ އިންވެސްޓަރު އަމިއްލައަށް ރާއްޖޭގެ ފަޅުން ބައެއް ހިއްކުމުން އެތަނެއްގައި ކުރާ އިންވެސްޓްމަންޓަކަށް ޔަގީންކަން ދިނުމަށް ވިއްކާ ބިމެކެވެ.
ރާއްޖެއިން ބިމެއް ވިއްކި ނަމަވެސް އެ ބިން ގަންނަ ފަރާތަކަށް ބިމުގެ މިލްކުވެރިކަމުގެ ހައްގުތައް ދިނުމާ ގުޅިގެން އެ ސަރަހައްދެއްގެ މައްޗަށް އޮތް ރާއްޖޭގެ ސިޔާދަތީ ބާރު ގެއްލިގެން ނުދާނެ ކަމަށް ވެސް އިސްލާހުގައި ވެއެވެ.
ދިވެހިރާއްޖޭގެ ބިން ބިދޭސީންނަށް މިލްކް ކޮށްދިނަސް ދިވެހިން އަޅުވެތިކަމެއްގައި ތިބެން ނުޖެހޭނެ ކަމަށް 2015 ވަނަ އަހަރު ރައީސުލްޖުމްހޫރިއްޔާ އަބްދުﷲ ޔާމީން ވަނީ ވިދާޅުވެފައެވެ. އަދި ބިދޭސީންނަށް ރާއްޖޭގެ ވަކި ސަރަހައްދުތަކަކުން ބިން މިލްކް ކޮށްދިނަސް ދިވެހިން އުޅެން ބޭނުންވާ ބިން ހުސް ނުވާނެ ކަމަށާއި ކުރިއަށް އޮތް 100 އަހަރަށް ވެސް ދިވެހިން އުޅެން ބޭނުންވާ ބިން އެއްވެސް ދައްޗެއް ނެތި ލިބޭނެ ކަމަށް އޭރު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި އެމަނިކުފާނު ވަނީ ވިދާޅުވެފައެވެ.
ބިދޭސީންނަށް ބިން މިލްކު ކުރެވޭ ގޮތް ހެދުމަށް ގާނޫނު އަސާސީއަށް ގެނެވުނު އިސްލާހަކީ އިގްތިސޯދީ ބަދަލުތައް ގެނައުމަށް ސަރުކާރުން ކުރަމުންދާ މަސައްކަތުގެ ތެރެއިން ކުރެވުނު މުހިއްމު މަސައްކަތެއް ކަމަށް އޭރު އެމަނިކުފާނު ވަނީ ފާހަގަކުރައްވާފައެވެ.
