ދަނގެތި ކުރީގެ ޕީޕީއެމް ޖަގަހަ ކޯލިޝަންގެ ޖަގަހައަކަށް، މިވީ ކިހިނެއް؟
31 ޖުލައި 2018 | އަންގާރަ 12:19ޖަގަހަ ހުޅުވުމަށް ކޯލިޝަން ރަނިންގމޭޓް ފައިސަލް ނަސީމް މިރޭ އެރަށަށް ވަޑައިގަންނަވާނެ
ޖަގަހަ މިހާރު ހުރިގޮތް
އދ .ދަނގެތީގައި ހުރި ޕީޕީއެމްގެ ޖަގަހައެއް ކުއްލި ގޮތަކަށް ކޯލިޝަންގެ ޖަގަހައަކަށް ބަދަލުކޮށް، ޕީޕީއެމްއަށް ސަޕޯޓަރުން ކޯލިޝަނާއި ގުޅެމުންދާ ކަމަށް މައުލޫމާތު ލިބިއްޖެއެވެ.
އިސްލާހީ މަސައްކަތުގައި އިސްކޮށް މިހާރު ހަރަކާތްތެރިވާން ފަށާފައިވާ އެކަމަކު ކުރިން ޕީޕީއެމަށް ސަޕޯޓް ކުރި މިހަކު ރާއްޖެއެމްވީއަށް ކިޔައިދިން ގޮތުގައި ދަނގެއްޗަކީ މީގެ ކުރިން ޕިޕީއެމްއަށާއި ރައީސް މައުމޫނަށް ސަޕޯޓްކުރަމުން އައި މެޖޯރިޓީއެއް އޮތްރަށެއް ކަމަށެވެ. އެކަމަކު ސިވިލް ސާވަންޓުންނަށް ކައިރީގައި ހުރި ރިސޯޓްތަކުގައި އުޅޭ މުއައްޒަފުން ނަށް ސަރުކާރުގެ ނުފޫޒާއި އެކު ދައްކަމުންދާ ބިރުގެ ސަބަބުން އެމީހުންގެ ފިކުރު މިހާރު ވަނި ބަދަލުވެފައި ކަމަށެވެ. އަދި ކުރިން ސިއްރުން މަސައްކަތް ކުރި މީހުން ވެސް އަދި ސިވިލް ސާވަންޓުން ވެސް ބިރެއްނެތި މި އަނިޔާވެރިކަމާއި ދެކޮޅަށް މަސައްކަތް ކުރަން ފަށާފައިވާ ކަމަށެެވެ.
"ރަށުގައި ވެސް އަނިޔާވެރިކަން އިންތިހާއަށް ގޮސް ވަޒީފާގެ ބިރު އިންތިހާއަށް އޮތީ ގޮސްފަ. އެކަމު އެ އަނިޔާވެރިކަމަށް މިއަދު ގޮންޖަހާލާ ފާޅުގައި އެމީހުން މަސައްކަތް ކުރަން ފަށައިފި. އެކަމުގެ ސަބަބުން ލިބުނު ހިތްވަރެއްމީ. ކުރިން އެއީ ހަމަ ސީދާ ޕިޕީއެމްގެ މީހުން ހިންގި ޖަގަހަ. އަޅުގަނޑުމެން މިހާރު އިއްޔެ އެތަނުގެ ކުލަ ބަދަލުކޮށް، ކޮލިޝަންގެ ކުލަތައް އެތަނުގައި ލައިފިން" ނަން ނުޖެހުމަށް އެދި އޭނާ ބުންޏެވެ.
ޕީޕީއެމްގެ ޖަގަހައިގައި އަލުން ކުލަލަނީ
އޭނާ ބުނިގޮތުގައި ކޯލިޝަންއަަށް ވެސް އަދި އެމްޑީޕީއަށް ވެސް ޖަގަހައެއް ހަދާނެ ބިމެއް ކައުންސިލުން ވެސް އަދި އަމިއްލަ މީހަކަށް ވެސް އޮތީ ދޭން ނުކެރިފައެވެ. އެކަން އެހެން އޮތީ މި ސަރުކާރުގެ ޖެއްސުމާއި އަނިޔާވެރިކަމުގެ ސަބަބުން ކަމަށް އޭނާ ބުންޏެވެ.
އޭނާ ބުނިގޮތުގައި މުޅި ރަށަށް ވަނީ ކުއްލި ބަދަލެއް އައިސްފައެވެ. އަދި އެ ބަދަލު އަންނަ އިންތިޚާބުން ފެނިގެންދާނެ ކަމަށް އޭނާ ބުންޏެވެ.
މައުލުމާތު ލިބިފައިވާ ގޮތުގައި ކޯލިޝަން ކުލަތަކަށް ބަދަލުކުރި ޕިޕީއެމްގެ ކުރީގެ ޖަގަހަ ހުޅުވުމަށް ކޯލިޝަން ރަނިންގމޭޓް ފައިސަލް ނަސީމް މިރޭ އެރަށަށް ވަޑައިގަންނަވާނެއެވެ.
އދ. ދަނގެތި ކައުންސިލްގައި ތިއްބަވަނީ މިނިވަން ދެ ކައުންސިލަރުންނާއި، ޕީޕީއެމްގެ ކައުންސިލަރެކެވެ.
