އެމަނިކުފާނުގެ ވެރިކަމެއްގައި މާޅޮހުގެ ފެނާއި ނަރުދަމާގެ ނިޒާމެއްް ގާއިމުކޮށްދެއްވާނެ ކަމަށް އިދިކޮޅު ކޯލިޝަނުގެ ރިޔާސީ ކެނޑިޑޭޓް އިބްރާހިމް މުހައްމަދު ސޯލިހް ވިދާޅުވެއްޖެ އެވެ.
އާދިއްތަ ދުވަހު މާޅޮހަށް އިބޫ ވަޑައިގެން އެރަށުގައި އެމްޑީޕީގެ ޖަގަހަ އެއް ހުޅުވައިދެއްވައި، ވާހަކަދައްކަވަމުން ވިދާޅުވީ މާޅޮހުގެ ފެނާއި ނަރުދަމާގެ ނިޒާމް ގާއިމު ކޮށްދިނުމަށް އެމްޑީޕިގެ ސަރުކާރުގައި މަސައްކަތް ކުރި ނަމަވެސް އެކަން ހާސިލް ނުވެ އުޅެނިކޮށް އެމްޑީޕީގެ ސަރުކާރު ބަދަލުވީ ކަމަށެވެ.
އަދި ވިދާޅުވީ ފެނާއި ނަރުދަމާގެ ނިޒާމް ގާއިމުކޮށްދިނުމަށް މިހާރުގެ ސަރުކާރުން ވަނީ އިހްމާލުވެފައި ކަމަށެވެ. ހަމައެހެންމެ މާޅޮހުގައި ބޭނުން ކުރަމުންދާ ބަނދަރު ކުޑަ ކަމަށް ފާހަގަ ކުރައްވައި ވިދާޅުވީ މިރަށުގެ މައްސަލައަށް ހައްލެއް ހޯއްދަަވައިދެއްވާނެ ކަމަށެވެ.
މީގެ އިތުރުން އިބޫ ވިދާޅުވީ މާޅޮހު ކައުންސިލަކީ ނަމޫނާ ކައުންސިލެއް ކަމަށާއި އެ ކައުންސިލުން ވަނީ އެރަށަށް ބޭނުންވާ ބައެއް ކަންކަން ސަރުކާރުގެ އެއްވެސް ފައިސާއެއް ބޭނުންކުރުމެއް ނެތި ކޮށްފައި ކަމަށެވެ. މި ގޮތުން ކުނި ނައްތާލުމުގެ ނިޒާމާއި ބޯފެނުގެ ޕްލާންޓެއް ބެހެއްޓުން ފާހަގަކުރެއްވި އެވެ.
