މިއަދު ބާއްވަން އުޅުނު މައުމޫންގެ އަޑުއެހުން މާދަމާއަށް ފަސްކޮށްފި
މާދަމާއަށް އަޑުއެހުން ފަސްކުރި ސަބަބެއް ނުބުނޭ
ރައީސް މައުމޫން
ކުރީގެ ރައީސް މައުމޫން އަބްދުލް ގައްޔޫމްގެ މައްޗަށް އުފުލާފައިވާ ޓެރަރިޒަމްގެ ދައުވާއާ ގުޅިގެން ހޯމަ ދުވަހު ބާއްވަން ތާވަލު ކުރި އަޑުއެހުން، އަންގާރަ ދުވަހަށް ފަސްކޮށްފިއެވެ.
ހޯމަ ދުވަހުގެ މެންދުރުފަހު ބާއްވަން އޮތް އަޑު އެހުން އަންގާރަ ދުވަހަށް ފަސްކުރި ސަބަބެއް ކްރިމިނަލް ކޯޓަކުން ނުބުނެއެވެ.
ރައީސް މައުމޫނަށް ކުރާ ޓެރަރިޒަމްގެ ދައުވާގެ އިބްތިދާއީ އަޑުއެހުމެއް، މިދިޔަ މަހު 26 ވަނަ ދުވަހަށް ވެސް ތާވަލު ކުރިއެވެ. ނަމަވެސް އެ އަޑުއެހުން ވެސް ވަނީ ފަހުން ކެންސަލްކޮށްފައެވެ.
ރައީސް މައުމޫނާ ދެކޮޅަށް ޓެރަރިޒަމުގެ ދައުވާ ކުރަނީ 2013 ވަނަ އަހަރުން ފެށިގެން ފަނޑިޔާރުންނަށް ރިޝްވަތުދީގެން ހުކުމްތައް ވަކިގޮތަކަށް ނެރުމަށް ފަނޑިޔާރުންނަށް މަޖުރޫބުކޮށްފައިވާ ކަމަށް ބުނެއެވެ. ގާނޫނާ ހިލާފަށް ސަރުކާރު ވައްޓާލުމަށް ރައްޔިތުންގެ މަޖިލީހުގެ ދަނގެތީ ދާއިރާގެ މެމްބަރު އިލްހާމް އަހުމަދާއި މައްޗަންގޮޅީ ދެކުނު ދާއިރާގެ މެމްބަރު އަބްދުﷲ ސިނާނަށް ރިޝްވަތު ދިނުމުގެ އިތުރުން 1 ފެބްރުއަރީގައި ސުޕްރީމް ކޯޓުން އަމުރު ނެރުމުގައި ރައީސް މައުމޫން ނުފޫޒު ފޯރުވާފައިވާ ކަމަށް ވެސް ދައުވާގައި ބުނެފައިވެއެވެ.
ޓެރަރިޒަމް ދައުވާގެ އަޑުއެހުމަކަށް ރައީސް މައުމޫން އަންގާރަ ދުވަހު ކޯޓަށް ހާޒިރު ކުރާއިރު، އެންމެ ފަހުން އެމަނިކުފާނު ކޯޓަށް ހާޒިރުކޮށްފައި ވަނީ މިދިޔަ މަހުގެ 13 ވަނަ ދުވަހުއެވެ. އެ ދުވަހު އެމަނިކުފާނުގެ މައްޗަށް ވަނީ އެއް އަހަރާއި ހަތް ހަމާއި ހަ ދުވަހަށް ޖަލު ހުކުމެއް އިއްވާފައެވެ. އެ ހުކުމް އިއްވީ ފުލުހުންގެ ތަހުގީގަށް ފޯނު ނުދެއްވި މައްސަލާގައެވެ.
ކ. މާފުށީ ޖަލުގައި ބަންދުކޮށްގެން ގެންގުޅޭ ކުރީގެ ރައީސް މައުމޫންގެ ސިއްހީ ހާލަތުކޮޅު ހުރި ގޮތުން، އެމަނިކުފާނު ގެއަށް ބަދަލުކޮށްދޭން ރައީސް މައުމޫންގެ އާއިލާއިން އެދުމުން ވެސް، ސަރުކާރުން ވަނީ އެކަމަށް ދެކޮޅު ހަދާފައެވެ.
ސުޕްރީމް ކޯޓުން އެކެއް ފެބްރުއަރީގައި ނެރުނު އަމުރާ ގުޅިގެން،ކުއްލި ނުރައްކަލުގެ ހާލަތު އިއުލާން ކުރުމަށްފަހު، ރައީސް މައުމޫން ހައްޔަރު ކުރީ މިއަހަރުގެ ފެބްރުއަރީ މަހުގެ ފަސް ވަނަ ދުވަހުގެ ރޭގައެވެ. ރައީސް މައުމޫން ޖަލުގައި ބަންދުކޮށްގެން، ގެންގުޅޭތާ ފަސް މަހާއި 18 ދުވަސް ވަނީ ވެފައެވެ.
