އީރާނު ހިމެނޭ ސަރަހައްދުގެ ގައުމުތަކަށް ތެޔޮ ބޭރުކުރަން ހުއްޓާލަން ޖެހިދާނެ ކަމުގެ އިޝާރާތެއް މި ޖުލައި މަހު އީރާނުގެ ރައީސް ހަސަން ރޫހާނީ ދެއްވާފައިވާއިރު އެކަމަށް އިރާނުގެ ރޫހީ ލީޑަރު އާޔަތުﷲ އަލީ ޚާމަނާއީ ތާއިދު ކުރައްވައިފިއެވެ. 

އެމެެރިކާ އާއި އީރާން ހިމެނޭގޮތުން 2015 ވަނަ އަހަރު އެކުލަވާލެވުނު ނިއުކްލިއާ ޑީލުން އެމެރިކާ އިން ވަކިވެފައިވާއިރު، އެކަމާ ގުޅިގެން އީރާނުގެ ރައީސް ހަސަން ރޫހާނީ ޖުލައި މަހުގެ ކުރީކޮޅު ވިދާޅުވީ އީރާނުގެ ތެޔޮ ޝިޕްމަންޓުތައް ހުއްޓުވާނެ ކަމަށް ބުނެ އެމެރިކާ އިން ދައްކާ ބިރަށް ޖެހިލުމެއް ނެތި އިރާނުން އޮންނާނީ ސާބިތުކަމާ އެކު ކަމަށެެވެ. އެމެރިކާގެ އަމަލުތަކުގެ ސަބަބުން ނަތީޖާ ހިތިވާނެ ކަމަށް އިންޒާރު ދެއްވަމުން ރޫހާނީ ވިދާޅުވެފައި ވަނީ "އިރާނުން ތެޔޮ ބޭނުންކުރާ މިންވަރު ސުމަކަށް ހަދަން އެެމެރިކާ އިން ބުނާ" ކަަމަށާއި، މިހެން އެމެރިކާ އިން ބުނަމުން ގެންދަނީ ނިކުންނާނެ ނަތީޖާ އަށް ނުބަލައި ކަމަށެވެ. ރޫހާނީ މިހެން ވިދާޅުވީ އީރާނުގެ ރަސްމީ ނޫސް އެޖެންސީ އައިއާރްއެންއޭ މެދުވެރިކޮށެވެ. 

އީރާނުގެ ނިއުކްލިއާ ޑީލުން އެމެރިކާ ވަކިވެ، އެމެރިކާ އިން ވަނީ އީރާނުގެ ތެޔޮ، ގައުމުތަކަށް އެތެރެކުރުން ހުއްޓާލުމަށް ގޮވާލާފައެވެ. ނޮވެމްބަރު 4 އިން މި ގޮތަށް އަމަލު ކުރުމަށް ގައުމުތަކަށް އެމެރިކާ އިން ގޮވާލާފައިވާއިރު، މިކަން ނުކުރާ ގައުމުތަކަށް އެެމެރިކާ އިން މާލީ ފިޔަވަޅުތަކެއް އަޅާނެ ކަަމަށް ބުނެފައިވެއެވެ. 

ރައީސް ރޫހާނީގެ ވާހަކަތަކަށް ތާއިދު ކުރައްވައި އީރާނުގެ ރޫޫހީ ލީޑަރު އާޔަތުﷲ އަލީ ޚާމަނާއީގެ ވެބްސައިޓުގައި ހޮނިހިރު ދުވަހު ބުނެފައި ވަނީ ތެޔޮ ބޭރުކުރުމުގެ މައްސަލާގައި ރައީސް ރޫހާނީގެ ވާހަކަފުޅަކީ "މުހިއްމު އަދި އީރާނުގެ ޕޮލިސީ ދައްކައިދޭ ވާހަކަފުޅެއް ކަމަށެވެ."

އެމެރިކާ ހިމެނޭ ގޮތުން ދުނިޔޭގެ ބައެއް ބާރުގަދަ ގައުމާތަކާ އެކު 2015 ވަނަ އަހަރު އީރާނުން ވަނީ ނިއުކްލިއާ ޑީލެއްގައި ސޮއެ ކޮށްފައެވެ. މިދިޔަ މެއި މަހު އެމެރިކާ އިން މި އެއްބަސްވުމުން ވަކިވެފައިވެއެވެ. 2015 ވަނަ އަހަރުގެ ނިއުކްލިއާ ޑީލުގައި އީރާނުން އެއްބަސްވީ އިރާނުގެ ނިއުކްލިއާ ޕްރޮގްރާމަށް ލިމިޓޭޝަންތަކެއް ގެނައުމަށް ކަމަށްވާއިރު، އޭގެ ބަދަލުގައި އީރާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކަށް ލުޔެއް ދޭން އެއްބަސްވެފައިވެއެވެ.