ކެންޔާގެ ރީތީގެ ރާނީ މެރުމަށް ހުކުމް ކޮށްފި

ލޯބިވެރިޔާގެ ގަޔަށް 25 ފަހަރު ވަޅިޖެހައި މަރާލުމުގެ ކުށް ސާބިތުވުމާއި ގުޅިގެން ކެންޔާގެ ރީތީގެ ރާނީ ރޫތު ކަމަންޑޭ މެރުމަށް ހުކުމް ކޮށްފިއެވެ.

ރޫތު ކަމަންޑޭ އޭނާގެ ލޯބިވެރިޔާ ކަމަށްވާ 24 އަހަރުގެ ފާރިދު މުހައްމަދު މަރާލާފައިވަނީ 2015 ވަނަ އަހަރުގައެވެ. އޭނާގެ މައްޗަށް ކުށް ސާބިތުވެފައިވަނީ މިދިޔަ މެއި މަހުގައެވެ.

ރޫތު ކަމަންޑޭއަށް މަރުގެ ހުކުމް ކުރުމަށްފަހު ގާޒީ ޖެސީ ލެސިޓް ވިދާޅުވީ އޭނާ މަރަން ހުކުމް ކުރީ ރުޅިއަންނަ ކޮންމެ ފަހަރަކު ނުވަތަ ނުތަނަވަސްވާ ކޮންމެ ފަހަރަކު ލޯބިވެރިޔާ މެރުން އެއީ ކުށެއްކަން ޒުވާނުންނަށް އެންގުމުގެ ގޮތުންކަމަށެވެ. އަދި އެގޮތަށް ކަންތައްތައް ނުކުރުމަށް ޒުވާނުންގެ ކިބައިން ގާޒީ ވަނީ އެދިވަޑައިގެންފައެވެ.

ރޫތުގެ ލޯބިވެރިޔާ މަރާލުމަށްފަހު އޭނާ ވަނީ އަމިއްލަ ހަށިގަނޑުގައި ވަޅިން އަޅައި އަދި ލޯބިވެރިޔާގެ ފޯނު ވެސް ބަލާފައި ކަމަށް ގާޒީ ވިދާޅުވިއެވެ.

ރޫތު މެރުމަށް ހުކުމް ކުރުމާއެކު އެމްނެސްޓީ އިންޓަނޭޝަނަލުން ވަނީ އެއީ އިންސާނިއްޔަތާ ޚިލާފު ކަމެއް ކަމަށް ބުނެފައެވެ.