ރާއްޖޭގައި މިއަހަރުގެ މިހާތަނަށް ހިނގި އެކްސިޑެންޓުތަކުގައި މަރުވި މީހުންގެ އަދަދު 10 އަރައިފިއެވެ.

ރާއްޖެއެމްވީން އެއްކޮށްފައިވާ ތަފާސްހިސާބުތަކުން ދައްކާ ގޮތުން އެއްގަމު ދަތުރުފަތުރުގައްޔާއި ކަނޑުމަތީގައި ހިނގި އެކްސިޑެންޓުތަކުގައި ނުވަ ފިރިހެނަކާއި އަންހެނަކު ވަނީ މަރުވެފައެވެ. އެގޮތުން ކަނޑުމަތީގައި ހިނގި އެކްސިޑެންޓެއްގައި ދެ މީހަކު މަރުވެފައިވާއިރު، އެއްގަމު ދަތުރުފަތުރުގައި އަށް މީހަކު ވަނީ މަރުވެފައެވެ.

މިއަހަރު އެންމެ ފުރަތަމަ އެކްސިޑެންޓެއްގައި މީހަކު މަރުވެފައި ވަނީ ފެބްރުއަރީ މަހު ފުވައްމުލަކުގެ ލިންކު ރޯޑުގައި ހިންގި އެކްސިޑެންޓެއްގައެވެ. ފުވައްމުލަކު އެކްސިޑެންޓުގައި މަރުވެފައި ވަނީ 74 އަހަރުގެ ފިރިހެނެކެވެ. އަދި ޖެހިގެން އައި މާޗު މަހު ހުޅުމާލޭގައި ހިނގި އެކްސިޑެންޓެއްގައި 32 އަހަރުގެ މީހަކު ވަނީ މަރުވެފައެވެ.

އެކްސިޑެންޓުތަކުގައި މިއަހަރު ތިން ވަނަ މީހަކު މަރުވެފައި ވަނީ އައްޑޫ ސިޓީ ލިންކުރޯޑުގައެވެ. މިދިޔަ އެޕްރީލް މަހު ހިނގި އެ އެކްސިޑެންޓުގައި އުމުރުން ދުވަސްވީ މީހަކު މަރުވެފައިވާއިރު، ހަމަ އެ މަހު ގދ. ވާދޫގައި ހިނގި އެކްސިޑެންޓެއްގައި ވެސް އުމުރުން ދުވަސްވީ މީހަކު ވަނީ މަރުވެފައެވެ.

ކަނޑުމަތީގައި ދެ ލޯންޗެއް ޖެހިގެން ދިވެއްސަކާއި ބިދޭސީއަކު މިއަހަރުގެ މެއި މަހު ކުރީކޮޅު މަރުވެފައިވާއިރު، އެ މަހުގެ ފަހުކޮޅު ނ. ހޮޅުދޫ ބަނދަރުމަތީގައި ބާރު ސްޕީޑުގައި ދުއްވާފައި ދިޔަ ސައިކަލެއް ކޮންޓްރޯލު ނުވެ، މޫދަށް ވެއްޓި، އަންހެނަކާއި ފިރިހެނަކު ވަނީ މަރުވެފައެވެ. އަދި މިދިޔަ ޖޫން މަހު، ހުޅުމާލޭގައި ޖޮގިންއަށް ނުކުމެ އުޅުނު 24 އަހަރު ޒުވާނެއްގެ ގައިގައި ސަކަލަކުން ޖެހި ވަނީ މަރުވެފައެވެ. އަދި މިދިޔަ ހުކުރު ދުވަހުގެ ރޭ ހުޅުމާލޭގައި 18 އަހަރުގެ ޒުވާނަކު ދުއްވި ސައިކަލެއް ކަހާލައިގެން ވެއްޓި އޭނާގެ ބޮލަށް ލިބުނު އަނިޔާތަކުގައި ވަނީ މަރުވެފައެވެ.

އެކްސިޑެންޓުތަކުގައި މަރުވާ މީހުންގެ ތަފާސް ހިސާބުތައް ފުލުހުން އާންމެއް ނުކުރެއެވެ. އަދި އެއްގަމު ދަތުރުފަތުރުގެ ރައްކާތެރިކަން ކަށަވަރު ކުރުމަށް ބާރު އަޅާ ޓްރާސްޕޯޓް އޮތޯރިޓީން ވެސް އެ މައުލޫމާތެއް ހާމައެއް ނުކުރެއެވެ.

އައްޑޫ ލިންކުރޯޑުގައި ހިނގާ ނުރައްކާތެރި އެކްސިޑެންޓުތަކުގައި މީހުން މަރުވާ ރޭޓް އިތުރުވެގެންދާއިރު، ހުޅުމާލޭގައި ވެސް ނުރައްކާތެރި އެކްސިޑެންޓުތައް ހިނގުން އިތުރުވެ، މީހުން މަރުވާ ރޭޓް ދަނީ ގިނަވަމުންނެވެ. އެގޮތުން ހުޅުމާލޭގައި މިއަހަރުގެ މިހާތަނަށް ހިނގި ނުރައްކާތެރި އެކްސިޑެންޓުތަކުގައި ތިން މީހަކު ވަނީ މަރުވެފައެވެ.