މިއަހަރުގެ ސެޕްޓެމްބަރު މަހު ބާއްވާ ރިޔާސީ އިންތިޚާބުގައި ރަށްވެހިވެފައިވާ ރަށް ނޫން އެހެން ރަށެއްގައި ވޯޓުލުމަށް ރީ ރަޖިސްޓްރީ ކުރުމަށް ގުޅިފައިވާ ސިޔާސީ ޕާޓީތަކުގެ ރައްޔިތުންގެ މަޖިލީހުގެ މެމްބަރުން ދޮރުން ދޮރަށް ހިންގެވުމަށް ހޮނިހިރު ދުވަހު ފެށި ހަރަކާތް ކާމިޔާބުކަމާ އެކު ނިންމާލައިފިއެވެ.
ހޮނިހިރު ދުވަހު ހެނދުނު މ. ކުނޫޒުގައި އެ ހަރަކާތް ފައްޓަވައިދެއްވީ ގުޅިފައިވާ ސިޔާސީ ޕާޓީތަކުގެ ފަރާތުން އިންތިހާބުގައި ވާދަކުރައްވާ އެމްޑީޕީ ކެންޑިޑޭޓް އިބްރާހިމް މުހައްމަދު ސޯލިހު (އިބޫ) ގެ ރަނިންގ މޭޓް ކާށިދޫ ދާއިރާގެ ރައްޔިތުންގެ މަޖިލީހުގެ މެމްބަރު ފައިސަލް ނަސީމެވެ. ފައިސަލް ވެސް ވަނީ ބައެއް ގެތަކަށް ވަޑައިގެންފައެވެ.
ހޮނިހިރު ދުވަހުގެ ރޭ 10:00 ގައި މި ހަރަކާތް ނިންމާލުމަށް ފަހު އެމްޑީޕީގެ ނާއިބު ރައީސް މުހައްމަދު ޝިފާޒު ވިދާޅުވީ މި ހަރާކާތުން ރައްޔިތުންގެ ގިނަ ކަންބޮޑުވުންތަކެއް އެނގިގެން ދިޔަ ކަމަށެވެ. އަދި ހަރަކާތުގެ އަމާޒަކީ ކޮންމެ ދާއިރާއަކުން 100 މީހުން ރީރަޖިސްޓްރޭޝަން ކުރުން ކަމަށާއި އެކަން ހާސިލްކުރެވުނު ކަމަށެވެ. އަދި އެންމެ ބޮޑު ގޮންޖެހުމެއް ދިމާވީ ގުޅިފައިވާ ސިޔާސީ ޕާޓީތަކަށް ނިސްބަތްވާ ރައްޔިތުންގެ މަޖިލީހުގެ މެމްބަރުން ނެތް ދާއިރާތަކުގެ ފޯމްތައް ރީރަޖިސްޓްރޭޝަންގެ މަސައްކަތް ކުރިއަށް ގެންދަން ކަމަށާއި، އެހެންނަމަވެސް އެ ދާއިރާގެ ކެމްޕެއިން ޓީމްތަކުގެ އެހީތެރިކަމާ އެކު ވަރަށް ކާމިޔާބާ އެކު ހަރަކާތް ކުރިއަށް ގެންދެވުނު ކަން ޝިފާޒް ފާހަގަކުރެއްވިއެވެ.
މި ހަރަކާތުގައި މަޖިލިސް މެންބަރުން ވަނީ އެ މެންބަރުންގެ ދާއިރާތަކަށް ނިސްބަތްވާ ރައްޔިތުންގެ ތެރެއިން މާލޭ ސަރަހައްދުގައި ދިރިއުޅޭ ރައްޔިތުންގެ ކައިރިއަށް ވަޑައިގެންފައެވެ.
ރަށްވެހިވެފައިވާ ރަށް ނޫން އެހެން ރަށެއްގައި ވޯޓުލާ ނަމަ އޯގަސްޓް 11 ގެ ކުރިން ރީރަޖިސްޓްރީ ކުރަންޖެހެއެވެ.
