އިހަވަންދިއްޕޮޅުގައި ތަރައްޤީ ކުރުމަށް ސަރުކާރުން ވައުދު ވެފައިވާ "އައިހެވަން" މަޝްރޫއު އާއި ބޮޑެތި އިންވެސްޓުމަންޓުތައް ރާއްޖެއަށް ނުގެނެވޭނެ ސަބަބު، ރައީސް އަބްދުﷲ ޔާމީންގެ އަރިހުގައި ވިދާޅުވުމުން އެމަނިކުފާނު ކޯފާ އިސްކުރެއްވި ކަމަށް، ޖަލު ހުކުމް ތަންފީޒު ކުރައްވަމުން ގެންދަވާ ކުރީގެ ނާއިބު ރައީސް އަހުމަދު އަދީބު ވިދާޅުވެއްޖެއެވެ.
އަދީބު ޖަލަށްލިތާ 1،000 ދުވަސް ވުމާ ގުޅިގެން، އޭނާގެ ގާނޫނީ ވަކީލުން ނެރުނު ބަޔާނުގައި އައިހެވަން މަޝްރޫއާ ގުޅޭ ގޮތުން އަދީބު ކުރިން ވިދާޅުވެފައި ނުވާ ވާހަކަތަކެއް ވަނީ ހާމަކޮށްފައެވެ.
އަދީބާ ހަވާލާދީ އެ ބަޔާނުގައި ބުނެފައި ވަނީ ސިޔާސީ ފަރާތްތައް ސަރުކާރުން މިނިވަން ނުކުރާހާ ހިނދަކު، އައިހެންވަން ޕްރޮޖެކްޓާއި ބޮޑެތި އިންވެސްމެންޓުތައް ރާއްޖެއަށް ނުގެނެވޭނެ ކަމަށް ރައީސް ޔާމީންގެ އަރިހުގައި އަދީބު ވިދާޅުވި ކަމަށެވެ. އެ ވާހަކަތައް ރައީސް ޔާމީން އަރިހުގައި އަދީބު ވިދާޅުވީ، 2015 ވަނަ އަހަރު އިދިކޮޅު ފަރާތްތަކާ އެކު ސިޔާސީ މަޝްވަރާތައް ކުރިއަށް ދިޔަ ދުވަސްވަރުގައި ކަމަށް އެ ބަޔާނުގައި ބުނެފައިވެއެވެ.
އެ ބަޔާނުގައި ބުނެފައި ވަނީ ސިޔާސީ ފަރާތްތައް މިނިވަން ކުރުމަށް އަދީބު އެދިވަޑައިގެންނެވުމުން، ރައީސް ޔާމީން ކޯފާ އިސްކުރައްވައި އެ ބޭފުޅުން މިނިވަން ނުކުރާނެ ކަމަށް ވިދާޅުވި ކަމަށެވެ.
ރައީސް ޔާމީނާއި އަދީބާ ދެމެދު އެކަންތައްތައް ހިނގައިދިޔަތާ ދުވަސްކޮޅެއް ފަހުން، ރިޔާސީ ލޯންޗުކޮޅުގައި ހާދިސާއެއް ހިނގައި އަދީބުގެ މައްޗަށް ތުހުމަތުތަކެއްކޮށް، "ފްރޭމް"ކޮށްފައިވާ ކަމަށް އޭނާގެ ވަކީލުން ނެރުނު ބަޔާނުގައިވެއެވެ.
އެ ބަޔާނުގައި ބުނެފައި ވަނީ ރައީސް ޔާމީނާއި އަދީބާ ދެމެދު ދެބަސްވުން އުފެދެން ފެށީ 2015 ވަނަ އަހަރުގައި ބޭއްވި ސިޔާސީ ޕާޓީތަކުގެ މަޝްވަރާތަކުގައި ސަރުކާރުން އެއްބަސްވި ކަންތައްތައް ތަންފީޒު ކުރަން ރައީސް ޔާމީން ދެކޮޅު ހެއްދެވި ހިސާބުން ކަަމަށެވެ.
ސިޔާސީ މަޝްވަރާތަކަށް ސަރުކާރުގެ އިސް ބޭފުޅެއްގެ ގޮތުގައި އޭރު ހުންނެވީ އަދީބު ކަމަށް ފާހަގަކޮށް، އެ ބަޔާނުގައި ބުނެފައި ވަނީ އެ މަޝްވަރާތަކުގައި އިދިކޮޅު ފަރާތްތަކަށް ހުށަހެޅި ހުރިހާ ކަމެއް ވެސް އެއްބަސްވި ގޮތަށް ކޮށްފައިވާ ކަމަށެވެ.
"ނަމަވެސް ސަރުކާރުގެ ފަރާތުން ކޮށްދިނުމަށް އެއްބަސްވި ކަންތައްތައް ކޮށްދޭން ރައީސް ޔާމީން ދެކޮޅު ހެދި ކަމަށް އަދީބު ވިދާޅުވިއެވެ. އެހެން ކަމަށް ހިނގުމުން އަދީބުގެ ފަރާތުން ރައީސް ޔާމީނު އަރިހުގައި ސިޔާސީ ފަރާތްތަކަށް ދޮގު ހަދައިގެން އެ މީހުން ޖަލުން މިނިވަން ނުކޮށް، އައިހެވަން ޕްރޮޖެކްޓާއި ބޮޑެތި އެއްބަސް އިންވެސްޓުމެންޓެއް ނެގެނެވޭނެ ކަމަށް ވިދާޅުވި ކަމަށް އަދީބު ވިދާޅުވި" ކަމަށް އެ ބަޔާނުގައި ވެއެވެ.
