ވަޒީފާއަށްޓަކައި ތިމާގެ ނަފްސު ވިއްކާ ނުލުމަށް ދީނީ އިލްމުވެރިޔާ ޑރ. އިޔާޒު ގޮވާލައްވައިފި

ވަޒީފާއަށްޓަކައި ތިމާގެ ނަފްސު ވިއްކާ ނުލުމަށް ރާއްޖޭގެ މަޝްހޫރު ދީނީ އިލްމުވެރިޔާ ޑރ. މުހައްމަދު އިޔާޒު އަބްދުއްލަތީފް ގޮވާލައްވައިފިއެވެ.

ބުދަ ދުވަހު ޑރ. އިޔާޒު ކުރެއްވި ޓްވީޓެއްގައި ވިދާޅުވެފައި ވަނީ ވަޒީފާއަށްޓަކައި ތިމާގެ އަމިއްލަ ނަފްސު ވިއްކާ ނުލުމަށާއި ވަގުތީ ގޮތުން ލިބޭ އުފަލާއި އާމްދަނީއަށް ވުރެ ތިމާގެ އަބުރު ރައްކާތެރިކުރުން މުހިއްމު ކަމަށެވެ.

އިޔާޒު އެގޮތަށް ވިދާޅުވެފައި މިވަނީ މިއަހަރު ބާއްވާ ރިޔާސީ އިންތިހާބާ ދިމާކޮށް، ވަޒީފާގެ ބިރު ދައްކައި ސިޔާސީ ގޮތުން މަންފާ ހޯދުމަށް ސަރުކާރުން މަސައްކަތްކުރަމުންދާ ދަނޑިވަޅެއްގައެވެ. އަދި ބައެއް ފަރާތްތަކުން ވަޒީފާގެ ދަހިވެތިކަމުގައި އަމިއްލަ ނަފްސު ވިއްކާލަމުންދާ ދަނޑިވަޅެއްގައެވެ.

ރައީސް އަބްދުﷲ ޔާމީންގެ ރަނިންގ މޭޓް އަދި ދީނީ އިލްމުވެރިޔާ ޑރ. މުހައްމަދު ޝަހީމް އަލީ ސައީދު ވަނީ ހުރިހާ ދީނީ އިލްމުވެރިން ސަރުކާރާ އެކު ކުރިއަށް ދިއުމަށް ގޮވާލައްވާފައެވެ. އަދި މިއަހަރު ބާއްވާ ރިޔާސީ އިންތިހާބުގައި ރައީސް ޔާމީންގެ ފަހަތްޕުޅަށް ހުރިހާ ދީނީ އިލްމުވެރިން އަރާވަޑައިގެންނެވުމަށާއި ރައީސް ޔާމީން ނޫން ބޭފުޅެއް އިންތިހާބު ވެއްޖެ ނަމަ އިސްލާމު ދީނަށް ބޮޑެތި ގޮންޖެހުންތައް ކުރިމަތި ވާނެ ކަމަށް ވެސް ޝަހީމު ވަނީ ވިދާޅުވެފައެވެ.

ރަނިންގ މޭޓަކަން ޝަހީމު ކަނޑައެޅުމާ އެކު އިސްލާމިކް މިނިސްޓްރީގެ ވަޒީފާގައި އުޅުއްވާ ބައެއް ދީނީ އިލްމުވެރިން ވަނީ ރައީސް ޔާމީނަށް ތާއީދު ކުރަން ނިންމާފައެވެ. އަދި އެ ނޫސްވެރިންގެ ބައްދަލުވުމުގައި ބައިވެރިވެވަޑައިގެންނެވި އިލްމުވެރިއަކަށް އޭގެ ފަހުން ވަނީ ސަރުކާރުން ވަޒީފާ ވެސް ދީފައެވެ. އަދި ވެސް ސިޔާސީ ބައެއް މަގާމުތަކަށް އެކި ފަރާތްތައް އައްޔަން ކުރަމުންދާކަން ވެސް ފާހަގަ ކުރެވެއެވެ.

ޑރ. އިޔާޒަކީ އަދާލަތު ޕާޓީއަށް ނިސްބަތްވާ ދީނީ އިލްމުވެރިއެކެވެ. އަދާލަތު ޕާޓީން ދަނީ ގުޅިފައިވާ ސިޔާސީ ޕާޓީތަކާ އެކު މަސައްކަތް ކުރަމުންނެވެ. އަދާލަތުން ބުނަމުންދަނީ ރައީސް ޔާމީންގެ ސަރުކާރަކީ ކޮރަޕްޝަނާއި އަނިޔާވެރިކަން އިންތިހާއަށް އޮތް ސަރުކާރެއް ކަމަށާއި ރައީސް ޔާމީންގެ ވެރިކަން ނިމުމަކަށް ގެންނަންޖެހޭ ކަމަށެވެ.

ޑރ. އިޔާޒަކީ ސޯޝަލް މީޑިއާއިންނާއި އެކިއެކި ވަސީލަތްތައް މެދުވެރިކޮށް ދީނީ ގޮތުންނާއި އިޖުތިމާއީ ގޮތުން ރައްޔިތުން ހޭލުންތެރިކަން އިތުރު ކުރުމަށް މަސައްކަތް ކުރައްވަމުން ގެންދަވާ ދީނީ އިލްމުވެރިއެކެވެ.