ކެމްޕެއިން ދަތުރުތައް މެދުކަނޑާލެއްވުމަށް ފަހު، އިބޫ ރާއްޖެ އިން ބޭރަށް ވަޑައިގަންނަވަނީ
16 ޖުލައި 2018 | ހޯމަ 06:51ވަޑައިގަންނަވާ ގައުމެއް ވިދާޅެއް ނުވޭ
ކެމްޕެއިން ދަތުރުފުޅަށް ފަހު އިބޫ އެއާޕޯޓުގައި: ދެން ވަޑައިގަންނަވާނީ ރާއްޖެއިން ބޭރަށް
ރިޔާސީ އިންތިހާބަށް އަތޮޅު ތެރޭގެ ރަށްތަކަށް ކުރައްވާ ދަތުރުތައް މެދުކަނޑާލެއްވުމަށް ފަހު، ގުޅިފައިވާ ޕާޓީތަކުގެ ކެންޑިޑޭޓް އިބްރާހިމް މުހައްމަދު ސާލިހު (އިބޫ) ރާއްޖެ އިން ބޭރަށް ވަޑައިގެންނެވުމަށް ނިންމަވައިފިއެވެ.
އެމަނިކުފާނު "ކުއްލި ދަތުރުފުޅެއްގައި" ރާއްޖެ އިން ބޭރަށް ވަޑައިގަންނަވާކަން ހާމަކުރެއްވީ އައްޑޫ ސިޓީ އާއި ފުވައްމުލަކަށް ކުރެއްވި ދަތުރުފުޅު ނިންމަވާލެއްވުމަށް ފަހު، އެނބުރި ވަޑައިގެން ވެލާނާ އިންޓަނޭޝަނަލް އެއާޕޯޓުގައި ހުންނަވައިގެން، މީޑިއާތަކަށް އިންޓަވިއު ދެއްވަމުންނެވެ.
އެމަނިކުފާނު ވަޑައިގަންނަވަނީ ކޮން ގައުމަކަށް ކަމެއް ވިދާޅެއް ނުވެއެވެ. އެންމެ ފަހުން އެމަނިކުފާނު ވަޑައިގެންނެވީ އެމްޑީޕީގެ ކޮންގްރެސްގެ މަޝްވަރާތަކަށް އަވަށްޓެރި ސްރީލަންކާއަށެވެ. އެ ދަތުރުފުޅުގައި އިބޫ ވަނީ ރައީސް މުހައްމަދު ނަޝީދުއާ ބައްދަލު ކުރައްވާފައެވެ.
އައްޑޫ އާއި ފުވައްމުލަކަށް ކުރެއްވި ދަތުރުފުޅު ނިންމަވާލެއްވުމަށް ފަހު ހުޅުލެ އަށް ވަޑައިގެން މާލެ ވަޑައިގަތުމަށް އިބޫ ލޯންޗަށް އަރައިވަޑައި ގަންނަވަނީ
އިބޫ ވިދާޅުވީ ރާއްޖެ އިން ބޭރަށް ކުރައްވާ ދަތުރުފުޅު ނިންމަވާލެއްވުމަށް ފަހު، ކެމްޕެއިން ދަތުރުފުޅުތައް އަލުން ފައްޓަވާނީ އަންނަ ހަފްތާގެ ހޯމަ ދުވަހު ކަމަށެވެ.
މިދިޔަ ހުކުރު ދުވަހުން ފެށިގެން، ހޯމަ ދުވަހުގެ ނިޔަލަށް އިބޫ އައްޑޫ ސިޓީއަށް ކުރެއްވި ދަތުރުފުޅުގައި އެމަނިކުފާނު ވަނީ އައްޑޫ ސިޓީ އާއި ފުވައްމުލަކުގެ ގިނަ ގެތަކަކަށް ވަޑައިގެންފައެވެ. އަދި އެ ދެ ސިޓީގެ މުހިއްމު ތަންނަށް ވަޑައިގެން، ހުރި މައްސަލަތައް އެމަނިކުފާނު ވަނީ ބައްލަވާލައްވާފައެވެ.
އިބޫ ވިދާޅުވީ އައްޑޫ ސިޓީ އާއި ފުވައްމުލަކަށް ކުރެއްވި ދަތުރުފުޅުގައި އެ ދެ ސިޓީގެ ރައްޔިތުންގެ އިހްސާސުތައް ދެނެގަނެ، ބޭނުންތައް އޮޅުންފިލުއްވާފައި ވާ ކަމަށެވެ. އެ ދެ ސިޓީގެ ރައްޔިތުން ތިބީ އަނިޔާވެރިކަން ނިންމުމަށް "ކެތްމަދުވެފައި" ކަމަށް އިބޫ ވިދާޅުވިއެވެ.
މާލެ ވަޑައިގަތުމަށް އިބޫ ފްލައިޓްގައި
""ރައްޔިތުން ތިބީ މި ސަރުކާރުގެ މި އަނިޔާވެރިކަން ނިމުމަކަށް ގެނައުމަށް، ކެތްމަދުވެފައި ތިބިތަން އަޅުގަނޑުމެންނަށް ފެނޭ. ރައްޔިތުންނަށް އެނގޭ މި ސަރުކާރުގެ އަމަލުތައް ހުރި ގޮތް. މި ވަގުތު ރައްޔިތުން ތިބީ، އަޅުގަނޑުމެންނަށް ގަބޫލު ކުރެވުނީ ވޯޓުލާނެ ދުވަހެއްގެ އިންތިޒާރުގައި، ހަމަ ޔަގީނުން ވެސް، އިރާދަ ކުރެއްވިއްޔާ އެ ދެ އަތޮޅުން، އަޅުގަނޑުމެންނަށް ބޮޑު ތާއީދެއް ލިބިގެންދާނެ،" ރައްޔިތުންގެ މަޖިލީހުގެ މައިނޯރިޓީ ލީޑަރު އަދި ހިންނަވަރު ދާއިރާގެ މެމްބަރު އިބްރާހިމް މުހައްމަދު ސޯލިހު ވިދާޅުވިއެވެ.
މާލެ ވަޑައިގަތުމަށް އިބޫ ފްލައިޓަށް އަރާވަޑައިގަންނަވަނީ
