ރަނިންގ މޭޓްކަމަށް ގާސިމްގެ އަނބިކަނބަލުން އައިޝާ ކުރިމަތިނުލައްވާނެ ކަމަށް ވިދާޅުވެއްޖެ
12 ޖުލައި 2018 | ބުރާސްފަތި 10:17ރަނިންގ މޭޓު ކަމަށް ކުރިމަތިލުމުގެ އެއްވެސް ވިސްނުމެއް ނެތް
ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ ހަގު އަނބިކަނބަލުން އަދި ޖޭޕީގެ ކައުންސިލް މެންބަރު އައިޝަތު ނަހުލާ
ކުރިއަށް އޮތް ރިޔާސީ އިންތިޚާބުގައި އިދިކޮޅުން ނެރޭ ރަނިންމޭޓަކަށް ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ ހަގު އަނބިކަނބަލުން އަދި ޖޭޕީގެ ކައުންސިލް މެންބަރު އައިޝަތު ނަހުލާ ކުރިމަތި ނުލައްވާނެ ކަމަށް އޭނާ ވިދާޅުވެއްޖެއެވެ.
ބުރާސްފަތި ދުވަހު ނަހުލާ ނެރުއްވި ނޫސްބަޔާނެއްގައި ވިދާޅުވެފައި ވަނީ ރަނިންގ މޭޓު ކަމަށް ވާދަކުރެއްވުމުގެ އެއްވެސް ވިސްނުމެއް އޭނާގެ ނެތް ކަމަށާއި އެއްވެސް ސިފައެއްގައި އެކަމަށް ޝައުޤުވެރިކަން ފާޅުކޮށްފައި ވެސް ނުވާނެ ކަމަށެވެ.
ޖުމްހޫރީ ޕާޓީގެ ސެކެޓްރީ ޖެނެރަލް އަހުމަދު ސަމީރު ވަނީ ނަހުލާ ރަނިންގ މޭޓު ކަމަށް ކުރިމަތިނުލައްވަން ނިންމަވާފައިވާކަން ރާއްޖެއެމްވީ އަށް ކަށަވަރު ކޮށްދެއްވާފައެވެ.
"އަޅުގަނޑު އަބަދު ވެސް ދެމި ހުންނާނީ ދިވެހި ރައްޔިތުންގެ ހައްޤުގައި ޖުމްހޫރީ ޕާޓީ އާއި ގުޅިފައިވާ އިއްތިހާދުން ކުރަމުންދާ އިސްލާހީ މަސައްކަތުގައި އެހީތެރިވެ، ޤައުމަށް ހަމަޖެހުން ގެނައުމުގެ މަސައްކަތުގައި. އިޖުތިމާއި ގޮތުންނާއި ސިޔާސީ ގޮތުން އަންހެނުން ބާރުވެރިކޮށް މުޖުތަމައުގައި އަންހެނުންނަށް ހަމަހަމަ ފުރުސަތުތައް ހޯދައި ދޭން ވަކާލާތު ކުރުމުގައި ދެމި ހުންނާނަން،" އައިޝާ ބަޔާނުގައި ބުނެފައިވެއެވެ.
އާއިޝާ ރަނިންގް މޭޓް ކަމަށް ގެންނަން ފެންނަ ކަމަށް ޖޭޕީގެ އިސް ބައެއް ބޭފުޅުން ސޯޝަލް މީޑިއާގައި ހާމަކޮށްފައި ވެއެވެ. އެގޮތުން އެޕާޓީގެ ރައީސް އަލީ ވަހީދާއި ޕާޓީގެ ޗީފް ސްޕޯކްސްޕާސަން އަލީ ސޯލިހުގެ އިތުރުން ކައުންސިލްގެ ބައެއް މެންބަރުން ވެސް ވަނީ އާއިޝާ އަށް ތާއީދުކުރާކަން ހާމަކޮށްފައެވެ.
ގުޅިފައިވާ ޕާޓީތަކުގެ ފަރާތުން ނެރޭ ރަނިންގ މޭޓު ކަމަށް ޖުމްހޫރީ ޕާޓީގެ ފަރާތުން ކުރިމަތިލައްވާފައި ވަނީ އެ ޕާޓީގެ ނާއިބު ލީޑަރު އަބްދުﷲ އަމީން އާއި ޖުމްހޫރީ ޕާޓީގެ ނާއިބު ލީޑަރު ޑރ. ހުސެއިން ރަޝީދު ހަސަންގެ އިތުރުން ކާށިދޫ ދާއިރާގެ މެންބަރު ފައިސަލް ނަސީމް އަދި ކެންދޫ ދާއިރާގެ މެންބަރު އަލީ ހުސައިންއެވެ.
