އެމްޑީޕީގެ ވެރިކަމުގައި މުހައްމަދު އަސްލަމް ހައުސިން މިނިސްޓަރުކަމުގައި ހުންނެވި އިރު ފޯނު ބިލްތަކަށް އެރި ތިން ލައްކަ އަށް ވުރެ ގިނަ ރުފިޔާ ދައުލަތަށް ދައްކަން ސިވިލް ކޯޓުން ކުރި ހުކުމާ އެއްގޮތަށް އެ ފައިސާ ދައްކަވައިފިއެވެ.

އަސްލަމްގެ މައްޗަށް ހުކުމް ކޮށްފަ އިވަނީ މިނިސްޓަރު ކަމުގައި ހުންނަވައިގެން މިނިސްޓްރީގެ ބަޖެޓުން އަމިއްލަ ފޯނު ބިލް ދައްކާފައިވާ ކަމަށް ސާބިތުވާ ކަމަށް ބުނެއެވެ.

މި އަހަރުގެ ޖޫން މަހުގެ 24 ވަނަ ދުވަހު ސިވިލް ކޯޓުގެ ގާޒީ އަލީ އަބްދުﷲ ކުރައްވާފައިވާ ހުކުމުގައި ވަނީ އަސްލަމް މިނިސްޓަރުކަމުގައި ހުންނަވައިގެން 2009 ވަނަ އަހަރުގެ ޖޫން މަހުން ފެށިގެން 2011 ވަނަ އަހަރުގެ އޯގަސްޓް މަހުގެ ނިޔަލަށް ހައުސިން މިނިސްޓްރީގެ ބަޖެޓުން އަސްލަމްގެ ފޯނު ބިލަށް 312،928 (ތިން ލައްކަ ބާރަ ހާސް ނުވަ ސަތޭކަ އަށާވީސް ރުފިޔާ) ދައްކާފައިވާ ކަން އެނގޭ ކަމަށެވެ.

ބުރާސްފަތި ދުވަހު ފިނޭންސް މިނިސްޓްރީ އަށް އެ ފައިސާ ދެއްކުމަށް ފަހު ރާއްޖެއެމްވީއަށް ދެއްވި އިންޓަވިއުގައި އަސްލަމް ވިދާޅުވީ ފައިސާ ދެއްކި ނަމަވެސް ކޯޓުން ކުރި ހުކުމް އެއްވެސް ހާލެއްގައި ބަލައި ނުގަންނަ ކަމަށާއި އެ ފައިސާ ދައްކާފައި ވަނީ ހުކުމަށް ތަބާވުމުގެ ގޮތުން ކަމަށެވެ.

"ކަން ހިނގައިދިޔަ ގޮތަކީ އަޅުގަނޑާއި ވަޒީރުކަން ހަވާލު ކުރުމާ އެކީ އަޅުގަނޑު ވުޒާރާއަށް ދިޔުމުން އެ ވުޒާރާގެ ޕާމަނަންޓް ސެކެޓްރީ އޭނަ އަޅުގަނޑު ކައިރީ ވިދާޅުވި ވަޒީރުންގެ ފޯނު ބިލް ދައްކާނީ އޮފީހުންނޭ، އަޅުގަނޑު ދެންނެވިން އަޅުގަނޑުގެ ފޯނު ނަންބަރެއް ބަދަލެއް ނުކުރާނަމޭ، ދެން ޕާމަނަންޓް ސެކްޓްރީ ވިދާޅުވި ބިލްގް އެޑްރެސް ބަދަލުކުރުމަށް، އެޑްރެސް ބަދަލު ކުރުމަށްފަހު ބިލް އަންނަމުންދިޔައީ މިނިސްޓްރީގެ އޮފީހަށް. އެ އޮންނަ އުސޫލުގެ ތެރެއިން ހަމަ ކަންތައްތައްވަމުން ދިޔައީ" އަސްލަމް ވިދާޅުވިއެވެ.

އަސްލަމް އިތުރަށް ވިދާޅުވީ މައްސަލަ އިސްތިއުނާފު ކުރެއްވުމަށް ބޭނުންވެ ވަޑައިގަންނަވާ ކަމަށާއި އެހެންނަމަވެސް އެކަމުގައި ހުރަސްތަކެއް ކުރިމަތިވެފައިވާ ކަމަށެވެ. އަދި ގާޒީ ނިންމަވާފައިވާ ކަންތައްތަކުގެ މައްޗަށް ބިނާކޮށް މައްސަލަ އިސްތިއުނާފު ކުރާއިރު މައްސަލައިގެ ހުލާސާ ބަޔާނެއް ބޭނުންވާއިރު، އަސްލަމްގެ ވަކީލު ކުރެއްވި މަސައްކަތުން އެ ހުލާސާ ބަޔާން އެ އޮންނަ މުއްދަތުގެ ތެރޭގައި ލިބިފައިނުވާ ކަމަށް ވެސް އަސްލަމް ވިދާޅުވިއެވެ.

"އަޅުގަނޑު ޤަބޫލެއްނުކުރަން މިއީ އެއްވެސް ގޮތެއްގައި ދައްކަންޖެހޭނެ ފައިސާއެއް ކަމަށް. އަޅުގަނޑުގެ މައްޗަށް ދައުލަތުން ކުރި ދައުވާއަކީ ފޯނު ބިލް ބޮޑުވެގެން ކޮށްފައިވާ ދައުވާއެއް ނޫން. އަޅުގަނޑުގެ މައްޗަށް ކުރި ދައުވާ އަކީ ދައުލަތުން ފޯނު ބިލް ދެއްކީތީވެ ކުރާ ދައުވާއެއް. އޭގެ ތެރޭގައި ހަމަ ޔަޤީނުންވެސް ހުންނާނެ ދައުލަތުގެ މަސައްކަތުގައި އަޅުގަނޑު ކޮށްފައިވާ ފޯނު ކޯލުތައް ބައިވަރު ހުންނާނެ" އަސްލަމް ވިދާޅުވިއެވެ.

ދައުލަތުން މިހާރު ވެސް އެކި ވުޒާރާތަކުގެ ވަޒީރުންގެ ފޯން ބިލް ދައްކާކަން ފާހަގަކުރައްވާ އަސްލަމް ވިދާޅުވީ އެބޭފުޅުންގެ މައްޗަށް ދައުލަތުން ދައުވާ ނުކުރާ ކަމަށެވެ. އަދި މި ހުކުމަކީ އިންސާފުން ކުރެވުނު ހުކުމެއް ނޫން ކަމަށް ވެސް އަސްލަމް ވިދާޅުވިއެވެ.

އަސްލަމްގެ މައްސަލަ ސިވިލް ކޯޓަށް ހުށަހެޅުމުގެ ކުރިން ފިނޭންސް މިނިސްޓްރީން ވަނީ އެ ފައިސާ ދެއްކުމަށް އަސްލަމަށް އަންގާފައެވެ. ނަމަވެސް އެއީ ދައްކަންޖެހޭ ފައިސާއެއް ކަމަށް ގަބޫލުނުކުރައްވާ ކަމަށެވެ.