ޝަހީމް އުޅުއްވަނީ އިބޫގެ ވެރިކަމެއްގައި އިމްރާންގެ އެހީގައި ޗާންސެލަރގެ މަޤާމު ދިފާޢުކުރައްވަން: ނަޒީރު

ރައީސް އަބްދުﷲ ޔާމީންގެ ރަނިންގ މޭޓް ޑރ. މުހައްމަދު ޝަހީމް އަލީ ސަޢީދު އިސްލާމިކް ޔުނިވަރސިޓީގެ ޗާންސެލަރގެ މަޤާމުން އިސްތިއުފާ ނުދެއްވައި ހުންނެވީ ގުޅިފައިވާ ޕާޓީތަކުގެ ވެރިކަމެއްގައި އެމަޤާމު ދިފާޢުކުރެއްވޭނެ ކަމުގެ އުއްމީދުގައި ކަމަށް އަދާލަތު ޕާޓީގެ މީޑިއާ ކޮމިޓީގެ މުޤައްރިރު އަލީ ނަޒީރު ވިދާޅުވެއްޖެއެވެ.

ގުޅިފައިވާ ޕާޓީތަކުގެ މެދުގައި ކަންކަމާއި މަޝްވަރާކުރުމަށް އެކުލަވާލާފައިވާ 'އަށާރަ ނަވާރަ ކޮމިޓީ'ގައި އަދާލަތު ޕާޓީގެ ފަރާތުން ހުންނަވާ އަލީ ނަޒީރު އަންގާރަ ދުވަހު ވިދާޅުވީ އިސްލާމިކް ޔުނިވަރސިޓީގެ ޗާންސެލަރގެ މަޤާމުން އިސްތިއުފާ ދެއްވުމަށް ޑރ. ޝަހީމް ދެކޮޅު ހައްދަވަނީ ރައީސް ޔާމީން ބޮޑުތަނުން ބަލިވާނެކަން ކަށަވަރުވާތީ ކަމަށެވެ. އަދި އެހެންކަމުން ޑރ. ޝަހީމް އުއްމީދުކުރައްވަނީ އިބްރާހިމް މުހައްމަދު ސޯލިޙް (އިބޫ)ގެ ވެރިކަމެއްގައި ޢަދާލަތު ޕާޓީގެ ރައީސް ޝައިޚް ޢިމްރާން އަބްދުﷲގެ އެހީތެރިކަމާ އެކު ޗާންސެލަރގެ މަޤާމު ދިފާއުކުރުމަށް ކަމަށް އަލީ ނަޒީރު ވިދާޅުވިއެވެ.

ރައީސް ޔާމީންގެ ރަނިންގމޭޓްގެ ގޮތުގައި ޑރ. ޝަހީމްގެ ނަންފުޅު ޕީޕީއެމް އިން އިއުލާންކުރުމުން އެމަނިކުފާނު ވަނީ އިސްލާމިކް ޔުނިވަރސިޓީގެ ޗާންސެލަރގެ މަޤާމުން އިސްތިއުފާ ދެއްވާނެކަން ހާމަކުރައްވާފައެވެ. އެހެން ނަމަވެސް ފަހުން ވިދާޅުވީ އެމަޤާމުން އިސްތިއުފާ ނުދެއްވަން ރައީސް ޔާމީން އެންގެވި ކަމަށާއި، އެމަޤާމުގައި ހުންނަވައިގެން ރަނިންގ މޭޓްގެ ހައިސިއްޔަތުން ސިޔާސީ ކަންކަމުގައި އުޅުއްވުން ޤާނޫނުން މަނާ ނުކުރާ ކަމަށެވެ.

އެހެން ނަމަވެސް އިސްލާމިކް ޔުނިވަރސިޓީގެ ޤާނޫނު ބުނާ ގޮތުން ސިޔާސީ އެފަދަ ކަމެއްގައި އުޅުއްވާ ބޭފުޅަކަށް ޔުނިވަރސިޓީގެ އެފަދަ މަޤާމުތަކުގައި ނުތިއްބެވޭނެ ކަމަށް ޤާނޫނީ ބޭފުޅުން ފާހަގަކުރައްވައެވެ. އަލީ ނަޒީރު ވެސް ވަނީ އެކަން ފާހަގަކުރައްވައި، އިސްލާމިކް ޔުނިވަރސިޓީގެ ޤާނޫނު ވަރަށް ސާފުކަމަށް ވިދާޅުވެފައެވެ.

ޝައިޚް އިމްރާންގެ އެހީގައި މަޤާމު ދިފާޢުކުރެއްވޭނެކަމުގެ އުއްމީދުގައި ޝަހީމް ހުންނެވި ކަމަށް އަލީ ނަޒީރު ވިދާޅުވިއިރު، ޑރ. ޝަހީމް ވަނީ ޝައިޚް އިމްރާނަށް އެންމެ ހެޔޮ އެދިވަޑައިގަންނަވަނީ އެބޭފުޅާ ކަމަށް އަމިއްލަފުޅަށް ވިދާޅުވެފައެވެ. އެހެންނަމަވެސް އެވާހަކަތަކަށް ރައްދު ދެއްވަމުން އަދާލަތު ޕާޓީގެ އިސް ބޭފުޅެއް ކަމަށްވާ ޝިދާތާ ޝަރީފް ވިދާޅުވީ އެބޭފުޅާ އަށް ހެޔޮ އެދިވަޑައިގަންނަވަނީ ކޮން ބޭފުޅުންނެއްކަން ނިންމަވާނީ ޝައިޚް އިމްރާން އަމިއްލަފުޅަށް ކަމަށެވެ.