10ރ. އާއި 100ރ. ނޫޓުގެ އާ ޝިޕްމެންޓެއް ގެނެސްފި

ސްޓޮކް މަދުވުމުގެ ސަބަބުން 10ރ. އާއި 100ރ. ގެ ނޫޓު އަލުން ޗާޕުކޮށް ރާއްޖެ ގެނެސްފިއެވެ.

މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބުނީ އެ އޮތޯރިޓީން ނެރެފައިވާ ރަން ދިހަ ފަހެއް ނޫޓު ސީރީޒްގެ ނޫޓުތަކުގެ ތެރެއިން 10 އަދި 100ރ. ގެ ނޫޓުގެ އާ ޝިޕްމެންޓެއް ގެނައީ ސްޓޮކް މަދުވުމުގެ ސަބަބުން ކަމަށެވެ. އަދި މިއަދު ރާއްޖެ ގެނެވި، ދައުލަތުގެ ޚަޒާނާގައި ރައްކާކޮށްފައި ވާކަމަށް އެއޮތޯރިޓީން ބުނެއެވެ. ނަމަވެސް ރާއްޖެ ގެނައީ ކިހާ ނޫޓެއް ކަމެއް އެމްއެމްއޭ އިން ހާމަކޮށްފައެއް ނުވެއެވެ.

ރާއްޖޭގެ މިނިވަން ކަމަށް 50 އަހަރު ފުރުމާ ދިމާކޮށް 2016 ވަނަ އަހަރުގެ ޖެނުއަރީގައި ރަންދިހަ ފަހެއްގެ ނަމުގައި ބޭނުން ކުރަން ފެށި އާ ނޫޓުތައް ހަދާފައި ވަނީ ޕޮލިމާ ކަރުދާހުގައި އާ ޑިޒައިނަކަށެވެ. ރަން ދިހަ ފަހެއްގެ ނޫޓު ސީރީޒްގައި ހިމެނެނީ 5، 10، 20، 50، 100، 500 އަދި 1،000ރ. ގެ ނޫޓުތަކެވެ.