ސުއޫދު ހުށަހެޅުއްވި ވައުދު: ސާވިސް ޗާޖު ނުދޭނަމަ، ރިސޯޓް މެނޭޖަރު 30 ދުވަހަށް ޖަލަށް
4 ޖުލައި 2018 | ބުދަ 11:58ސުއޫދު ގެންދަވަނީ ރިޔާސީ ވައުދުތަކެއް ހުށަހަޅުއްވަމުން
ސުއޫދު: ގާނޫނަށް ބަދަލު ގެންނާނެ ކަމަށް ވިދާޅުވި
ރައްޔިތުން އެދޭ ވެރިކަމެއްގައި ރިސޯޓް މުވައްޒަފުންނަށް ދިނުމަށް ގާނޫނުގައި ލާޒިމުކޮށްފައިވާ ސާވިސް ޗާޖު ނުދޭ ރިސޯޓުތަކުގެ ޖެނަރަލް މެނޭޖަރުން ޖަލަށް ލާނެ ކަމަށް ކުރީގެ ބަންޑާރަ ނައިބު، އަދި މަޝްހޫރު ގާނޫނީ ވަކީލު ހުސްނުއްސުއޫދު ވިދާޅުވެއްޖެއެވެ.
ސުއޫދު ކުރެއްވި ޓްވީޓެއްގައި ވިދާޅުވީ ގާނޫނަށް ބަދަލު ގެނެސް، ސާވިސް ޗާޖު ނުދޭ ރިސޯޓުތަކުގެ ޖެނަރަލް މެނޭޖަރުން 30 ދުވަަހަށް ޖަލަށްލާނެ ކަމަށެވެ. ސުއޫދު އެ ވައުދު ހުށަހެޅުއްވީ "އަހަރުމެން އެދޭ ވެރިކަމެއްގައި"ގެ ނަމުގައި ސިލްސިލާ ވައުދުތަކެއްގެ ގޮތުގައި އޭނާ ކުރައްވަމުން ގެންދަވާ ޓްވީޓުތަކުގެެ ތެރެއިން، ބުދަ ދުވަހު ކުރެއްވި ޓްވީޓެއްގައެވެ.
ރިޔާސީ ކެންޑިޑޭޓުންނާއި ޕާޓީތަކުން ރިޔާސީ ވައުދު ރައްޔިތުންނަށް ހުށަހަޅަމުންދާ ދަނޑިވަޅުގައި "އަހަރުމެން އެދޭ ވެރިކަމެއްގެ" ނަމުގައި ސުއޫދު ހުށަހަޅުއްވާފައި ވަނީ މުދަލާއި ހިދުމަތުގެ އަގުން ޓެކްސް ނެގުން މަދު ކުރާނެ ކަމަށާއި ވިޔަފާރިވެރިންގެ އަތުން، އިންކަމް ޓެކްސް ނަގާނެ ކަމަށެވެ. އެގޮތުން އިންކަމް ޓެކްސްގެ ގޮތުގައި 60،000 ރުފިޔާއިން މަތިން އާމްދަނީ ލިބޭ މީހުންގެ އަތުން ތިން ޕަސެންޓުގެ ޓެކްސް ނަގާނެ ކަމަށް ސުއޫދު ވިދާޅުވެފައިވެއެވެ.
ސުއޫދު ހުށަހަޅުއްވާފައިވާ ވައުދުތަކުގެ ތެރޭގައި އެއް ރަށުން އަނެއް ރަށަށް ހިޖުރަ ކުރުމަށް އެއްވެސް ހުރަހެއް ނޯންނާނެ ގޮތަށް ހައްލެއް ހޯއްދައި ދެއްވާނެ ކަމަށާއި މާލޭ ދަފްތަރު އުވާލާނެ ކަމަށެވެ.
