ތިން ދުވަހުގެ މަސައްކަތަށްފަހު، ކޮންގްރެސް ބާއްވާ ދަރުބާރު ތައްޔާރުކޮށް ނިންމައިފި
ޖާފަތަށް ވެސް ހާއްސަ ތަނެއް ހަދާފައިވޭ
ކޮންގްރެސް ބާއްވާ ދަރުބާރު: 800 މަންދޫބުނަށް ޖާގަ ތަނަވަސްކޮށްފައި
އއ. އުކުޅަހުގައި ހޮނިހިރު ދުވަހު ބާއްވާ އެމްޑީޕީގެ ކޮންގްރެސްގެ ހަރަކާތްތައް ކުރިއަށް ގެންދާ ދަރުބާރުގޭގެ މަސައްކަތް ތިން ދުވަހުގެ މަސައްކަތަށްފަހު، ނިންމާލައިފިއެވެ.
ސަތޭކަފަސްދޮޅަސް ފޫޓު ދިގު ޓެންޓަކުން ހިޔާކޮށްފައިވާ އެ ދަރުބާރަކީ 800 އެއްހާ މީހުންގެ ޖާގައިގެ ތަނެކެވެ. އުކުޅަހު ބަނދަރު ސަރަހައްދުގައި އެ ތަން ހެދުމުގެ މަސައަކަތް ފެށީ މިދިޔަ އަންގާރަ ދުވަހުއެވެ. ކޮންގްރެސް ބާއްވާ ދަރުބާރުގޭގެ މަސައްކަތް ބުރާސްފަތި ދުވަހުގެ ރޭ ނިންމާލާފައިވާއިރު، ތަފާތު އެކި ކުލަތަކުން އެ ތަން ވަނީ ދިއްލާފައެވެ.
ކޮންގްރެސްއަށް އުކުޅަހަށް އަންނަ މަންދޫބުންނާއި އެހެން ޕާޓީތަކުގެ ވަފުދުތަކާއި އެމްޑީޕީގެ ސަޕޯޓަރުންނަށް ހާއްސަކޮށްގެން ޖާފަތެއް ބޭއްވުމަށް ވެސް ހާއްސަ ތަނެއް ވަނީ ހަދާފައެވެ. އެތަން ވެސް ވަނީ ތަފާތު ކުލަތަކުން ޖަރީކޮށްފައެވެ.
ޖާފަތަށް ހާއްސަކޮށްފައިވާ ތަން ދިއްލާލާފައި-- ރާއްޖެއެމްވީ ފޮޓޯ/ ޙުސައިން ޙަސަން
އެމްޑީޕީގެ ކޮންގްރެސްއަކީ އެ ޕާޓީގެ އެންމެ މުހިއްމު ނިންމުންތައް ނިންމާ މަހާސިންތާއެވެ. އެ ބައްދަލުވުމުގައި އެ ޕާޓީގެ އަސާސީ ގަވާއިދަށް ވެސް އިސްލާހުތަކެއް ގެންނާނެއެވެ. އަދި ކުރިން ނިންމާފައިވާ ނިންމުންތަކަށް ބަދަލު ގެނައުމުގެ ބާރުގެ ވެސް ކޮންގްރެސްއަށް ލިބިގެންވެއެވެ.
އެމްޑީޕީގެ އެންމެ މުހިއްމު އެއް ގުނަވަން ކަމަށްވާ، އެ ޕާޓީގެ ކޮންގްރެސް ހޮނިހިރު ދުވަހުގެ 11:00 ގައި އުކުޅަހުގައި ފެށުމަށް ނިންމާފައިވާއިރު، ކޮންގްރެސްއަށް ދީފައިވާ ނަމަކީ "އާދަޔާ ހިލާފު ކޮންގްރެސް" މި ނަމެވެ.
އެމްޑީޕީގެ ކޮންގްރެސް ބާއްވާ ދަރުބާރު: 800 އަށް ވުރެ ގިނަ މީހުންނަށް ޖާގަ ވަނީ ތަނަވަސްކޮށްފައި-- ރާއްޖެއެމްވީ ފޮޓޯ/ ޙުސައިން ޙަސަން
ރިޔާސީ އިންތިހާބަށް 83 ދުވަހަށް ވެފައި ވަނިކޮށް، އެމްޑީޕީން ބާއްވާ ކޮންގްރެސް ވެގެންދާނީ އެ ޕާޓީގެ އާންމު މެމްބަރުންނަށް އުފާވެރި ނިންމުންތަކެއް ފާސްވެގެންދާ ކޮންގްރެސްއަކަށް ކަމަށް އެމްޑީޕީން ބުނެއެވެ.
އެމްޑީޕީގެ ފުރަތަމަ ކޮންގްރެސް ބާއްވާފައި ވަނީ 2005 ވަނަ އަހަރުއެވެ. ދެ ވަނަ ކޮންގްރެސް ބާއްވާފައި ވަނީ 2010 ވަނަ އަހަރުއެވެ. އެ ދެ ކޮންގްރެސް ވެސް ދަރުބާރުގޭގައި ބާއްވާފައިވާއިރު، މިއީ މާލެއިން ބޭރުގައި ބާއްވާ ފުރަތަމަ ކޮންގްރެސްއެވެ.
