ވޯޓަރސް ލިސްޓަށް ޝަކުވާ ހުށަހެޅުމުގެ ވަގުތު އިތުރު ކޮށްފި
20 ޖޫން 2018 | ބުދަ 13:39ޝަކުވާ ހުށަހެޅުމުގެ ފުރުސަތު މިމަހުގެ 11 ވަނަ ދުވަހުން ފެށިގެން ހުޅުވާލާފައި
އިލެކްޝަންސް ކޮމިޝަން އިންތިޚާބަށް ވޯޓު ދިނުމުގެ ހައްގު ލިބިފައިވާ ފަރާތްތަކުގެ ލިސްޓަށް ޝަކުވާ ހުށަހެޅުމުން މިރޭ 10:30 ހަމައަށް ހުޅުވާލާފައިވާ ކަމަށް
މިއަހަރުގެ ސެޕްޓެމްބަރު މަހުގެ 23 ވަނަ ދުވަހު ބޭއްވުމަށް ހަމަޖެހިފައިވާ ރިޔާސީ އިންތިޚާބަގައި ވޯޓު ދިނުމުގެ ހައްގު ލިބިފައިވާ މީހުންގެ ލިސްޓަށް ޝަކުވާ ހުށަހެޅުމަށް ދިން ވަގުތު އިތުރުކޮށްފި އެވެ.
އިލެކްޝަން ކޮމިޝަން (އީސީ) އިން ބުނީ އިންތިޚާބަށް ވޯޓު ދިނުމުގެ ހައްގު ލިބިފައިވާ ފަރާތްތަކުގެ ލިސްޓަށް ޝަކުވާ ހުށަހެޅުން މިރޭ 10:30 ހަމައަށް ހުޅުވާލާފައިވާ ކަމަށާއި، ލިސްޓުގައި މައްސަލައެއް އޮތްކަން ފާހަގަ ކުރެވިއްޖެނަމަ ވީހާވެސް އަވަހަށް އެ ކޮމިޝަނަށް މައްސަލަ ހުށަހެޅުމަށް އެދޭ ކަމަށެވެ.
މިމަހުގެ 11 ވަނަ ދުވަހުން ފެށިގެން މި ލިސްޓަށް ޝަކުވާ ހުށަހަޅުމަށް ހުޅުވާލާފައިވާއިރު ފުރަތަމަ އެފުރުސަތު ހަމަވާ ގޮތަށް އޮތީ މިއަދު (ބުދަ ދުވަހު) މެންދުރުފަހު 01:30 ގެ ނިޔަލަށެވެ.
އީސީން މި މަހުގެ 10 ވަނަ ދުވަހުގައި ވޯޓަރސް ލިސްޓު އާންމު ކޮށްފައިވަނީ ޑިޕާޓްމަންޓް އޮފް ނޭޝަނަލް ރެޖިސްޓްރޭޝަންގެ މައުލޫމާތުތައް އަސްލަކަށް ބަލައިގެންނެވެ. އެހެންކަމުން މިލިސްޓުގައި ބައެއް މައްސަލަތައް ހުރުން އެކަށީގެންވާ ކަމަށް ވެސް އީސީން މައުލޫމާތު ދެއެވެ.
މި ލިސްޓު ދިވެހި ސަރުކާރުގެ ގެޒެޓުގައި އަދި، އިލެކްޝަންސް ކޮމިޝަނުގެ ވެބްސައިޓް (www.elections.gov.mv) ގައި ވަނީ ޢާންމުކޮށްފައެވެ. މީގެއިތުރުން (VR Space IDNO Send to 1414) އެސްއެމްއެސް ކޮށްގެން ވެސް ޗެކްކުރެވޭނެ އިންތިޒާމް ވަނީ ހަމަޖައްސާފައެވެ.
ލިސްޓަށް ޝަކުވާ ބަލައިގަތުމަށް ހަމަޖެހިފައި ވަނީ މާލެ ފިޔަވައި މީހުން ދިރިއުޅޭ އެހެން ހުރިހާ ރަށަކުން އެރަށެއްގެ ކައުންސިލް އިދާރާއިންނާއި އައްޑޫ ސިޓީ އަދި ފުވައްމުލަކު ސިޓީގެ އަވަށްތަކުގެ އޮފީސްތަކުންނެވެ. މާލޭގައި ނަމަ، އިލެކްޝަންސް ކޮމިޝަން (ޕޯޓް ކޮމްޕްލެކްސް ބިލްޑިންގ) އިންނެވެ. އަދި ޝަކުވާ ފޯމް، ކޮމިޝަންގެ ވެބްސައިޓުންނާއި ކައުންސިލް އިދާރާތަކުން ލިބެން ހުންނާނެ ކަމަށް އީސީން ވަނީ ބުނެފައެވެ.
އިލެކްޝަންސް ކޮމިޝަނުން ބުނީ ހޯމަ ދުވަހުގެ ނިޔަލަށް ލިސްޓާ ގުޅޭ ގޮތުން 34 ޝަކުވާއެއް ލިބިފައިވާ ކަމަށާއި އެ ޝަކުވާތައް ބަލަމުން ގެންދާ ކަމަށެވެ. އަނެއްކޮޅުން ޕާޓީތަކުން ބުނެފައި ވަނީ ނަންތައް އާންމުކުރި އިރު އައިޑީކާޑު ހާމަކޮށްފައި ނުވާތީ ލިސްޓްތަކުގައި ހުރި މައްސަލަތައް ދެނެގަތުމަށް އުނދަގޫތަކެއް ހުރި ކަމަށެވެ. އަދި ޕާޓީތަކަށް ޝަކުވާ ހުށަހެޅޭނެ އިންތިޒާމު ހަމަޖެހިފައި ނުވާތީ އާއި އެ ނޫން ވެސް ތަފާތު މައްސަލަތަކާ ގުޅޭ ގޮތުން އިދިކޮޅު އެމްޑީޕީން ވަނީ އިލެކްޝަންސްގެ މެންބަރުންނާ ބަދައްލުކޮށް މަޝްވަރާކޮށްފައެވެ.
