ޖަޒީރާ ރާއްޖެ އައްޑޫ ސިޓީ - މާލެ ޖަގަހަ ހުޅުވައިފި
19 ޖޫން 2018 | އަންގާރަ 00:27ރިޔާސީ އިންތިޚާބު ހިންގަނީ ހިސޯރު ކުރެވިފައިވާ މުއައްސަސާތަކެއްގެ ދަށުން
އެމްޑީޕީގެ ޖަޒީރާ ރާއްޖެ ކެމްޕެއިންގެ ތެރެއިން، އައްޑޫ ސިޓީގެ ރައްޔިތުންނަށް ޚާއްސަކޮށްގެން މާލޭގައި ޖަގަހައެއް ހުޅުވުން، މި ޖަގަހަ ހުޅުވައިދެއްވީ ކުރީގެ ބަންޑާރަ ނައިބު ހުސްނުއް ސުއޫދު
މި އަހަރުގެ ރިޔާސީ އިންތިޚާބަށް ވާދަކުރައްވާނެ ކަމަށް އިއުލާން ކުރައްވާފައިވާ ކުރީގެ ރައީސް މުހައްމަދު ނަޝީދުގެ ކެމްޕެއިން ހަރަކާތްތައް ވަރުގަދަ ކުރުމުގެ ގޮތުން "ޖަޒީރާ ރާއްޖެ އައްޑޫ ސިޓީ-މާލެ" ގެ ނަމުގައި ހ.ތަނޑިރަތްމާގޭގައި ކެމްޕެއިން ޖަގަހައެއް ހުޅުވައިފިއެވެ.
ޖަގަހަ ހުޅުވާ ދެއްވައިފައި ވަނީ މަޝްހޫރު ޤާނޫނީ ވަކީލު އަދި ކުރީގެ ބަންޑާރަނައިބު އަލްއުސްތާޛް ހުސްނުސް ސުއޫދެވެ. ޖަގަހަ ހުޅުވުމަށް ބޭއްވި ހަފްލާގައި އެމްޑީޕީގެ އާންމު މެންބަރުންނާއި، ރައްޔިތުންގެ މަޖިލީހުގެ މެމްބަރުންނާއި އެމްޑީޕީގެ ވެރިކަމުގެ ޑިފެންސް މިނިސްޓަރުކަމާއި ރައީސުލްޖުމްހޫރިއްޔާގެ އެޑްވައިޒަރުކަން ކުރެއްވި އަމީން ފައިސަލްވެސް ބައިވެރިވެވަޑައި ގެންނެވިއެވެ.
މި ރަސްމިއްޔާތުގައި ވާހަކަފު ދައްކަމުން ހުސްނުސް ސުއޫދު ވަނީ އެމްޑިޕީގެ މެންބަރުން މިހާރު ފަށައިގަނެފައިވަނީ ވަރަށް ބޮޑު މަސައްކަތެއް ކަމަށް ވިދާޅުވެފައެވެ. އެ މަސައްކަތަކީ ރައީސް ޔާމީންގެ ވެރިކަން ބަދަލު ކުރުން ކަމަށާއި، އެކަން ކުރަން ބޭނުން ވަނީ މައިގަނޑު ތިން ސަބަބައްޓަކާ ކަމަށްވެސް ހުއްނުއް ސުއޫދު ވިދާޅުވިއެވެ. އެ ތިން ސަބަބަކީ އަދުލު އިންސާފު ގެއްލިފަ އޮތުމާއި އަނިޔާވެރިކަން އިތުރުވުމާއި އަދި ކޮރަޕްޝަންގެ އަމަލުތަށް އިންތިހާއަށް އިތުރުވުން ކަމަށް ސުއޫދު ވިދާޅުވިއެވެ.
އައްޑޫ ސިޓީ މާލޭ ޖަގަހަ ހުޅުވުމަށް ބޭއްވި ރަސްމިއްޔާތުގައި ވާހަކަދައްކަވަމުން ރައްޔިތުންގެ މަޖިލީހުގެ މީދޫ ދާއިރާގެ މެންބަރު ރޮޒެއިނާ އާދަމް ވިދާޅުވީ، މި އަހަރު ބާއްވާ ރިޔާސީ އިންތިޚާބަކީ ހިސޯރު ކުރެވިފައިވާ މުއައްސަސާތަކަކުން ބާއްވާ ރިޔާސީ އިންތިޚާބެއް ކަމަށެވެ. ރޮޒައިނާ ވިދާޅުވީ، މިނިވަންކަމުގެ ނަމުގައި، ޣުލާމުން ތިބި މިނިވަން މުއައްސަސާތަކެއްގެ ދަށުން އިންތިޚާބު ބާއްވަން ޖެހުމުން މި އިންތިޚާބުގައި އެތަށް ބައިވަރު ދަތިތަކާއި، ގޮންޖެހުންތަކާއި ކުރިމަތިލާން ޖެހޭނެކަމަށެވެ.
އެމްޑީޕީގެ ރިޔާސީ ޕްރައިމަރީގައި ރައީސް ނަޝީދު ވާދަ ކުރައްވާނެ ކަމަށް އިއުލާން ކުރެއްވުމާއެކު އެމްޑީޕީގެ ޕާލަމެންޓްރީ ގްރޫޕުގެ މެމްބަރުންނާއި ޕާޓީގެ އިސް ބޭފުޅުން ވަނީ އެމަނިކުފާނަށް ބައިއަތު ހިއްޕަވާފައެވެ. އަދި އެމަނިކުފާންގެ ކެމްޕޭން ހަރަކާތްތައް ވަރަށް ފޯރިއާއި ޖޯޝާ އެކު އަތޮޅުތެރޭގެ ރަށްތަކުގައި ކުރިއަށްދާކަން ފާހަގަކޮށްލެއެވެ.
