ފާރިސް އަށް ކުރާ ޝަހްސު އޮޅުވާލުމުގެ ދައުވާ: ވަކީލުން އެދިގެން އަޑުއެހުން ފަސްކޮށްފި
12 ޖޫން 2018 | އަންގާރަ 12:02ދެން އަޑުއެހުން އޮންނާނީ އަންނަ ހަފްތާގައި
ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު އަހުމަދު ފާރިސް މައުމޫން
ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު އަހުމަދު ފާރިސް މައުމޫންގެ މައްޗަށް ކުރާ ޝަހްސު އޮޅުވާލުމުގެ ދައުވާގެ ޝަރީއަތުގެ އަޑުއެހުން ފަސްކޮށް ދިނުމަށް އޭނާގެ ވަކީލުން އެދިވަޑައިގަތުމުން އަޑުއެހުން އަންނަ ހަފްތާއަށް ފަސްކޮށްފި އެވެ.
ކުރީގެ ރައީސް މައުމޫން އަބްދުލްގައްޔޫމްގެ ދަރިކަލުން، ފާރިސް މައުމޫނު އާ ދެކޮޅަށް އުފުލާފައިވާ މި ދައުވާގެ އަޑުއެހުން ގިނަ ދުވަސްތަކަކަށް ފަހު ބާއްވަން ތާވަލުކޮށްފައި އޮތީ އަންގާރަ ދުވަހުގެ މެންދުރު ފަހު އެވެ. އަޑުއެހުން ފެށުމާއެކު ފާރިސް ދިފާއީ ވަކީލް އިބްރާހިމް ޝަމީލް ވަނީ މައްސަލައިގައި ތައްޔާރު ވުމަށް އެކަށީގެންވާ ވަގުތު ނުލިބުނުކަން ފާހަގަ ކުރައްވާފަ އެވެ. އޭނާ ވިދާޅުވީ ފާރިސްއާ އެކު މި ހަފުތާގައި ބައްދަލުވުމެއް ބާއްވައި ދިނުމަށް މޯލްޑިވްސް ކަރެކްޝަނަލް ސާވިސްގައި އެދުމުން އެ ފުރުސަތު ދީފައި ނުވާ ކަމަށާއި މި ޝަރީއަތާ ގުޅޭ ގޮތުން މަޝްވަރާ ކުރައްވަން ބޭނުންވާތީ އަޑުއެހުން ފަސްކޮށް ދިނުމަށް އެދިވަޑައިގަންނަވާ ކަމަށެވެ.
ފާރިސް ވެސް ވިދާޅުވީ އަޑުއެހުން އޮންނަ ކަން އެނގިވަޑައިގަތީ އަންގާރަ ދުވަހުގެ ހެނދުނު ކަމަށެވެ. އެހެން ނަމަވެސް ކޯޓުގައި އޮތީ ކޮން މައްސަލައެއްކަން ކަރެކްޝަންސްގެ ފަރާތުން އެނގިވަޑައިގެންފައި ނުވާ ކަމަށާއި އޭނާގެ މައްޗަށް ދައުލަތުން ބޮޑެތި ތުހުމަތުތަކެއް ކޮށްފައިވާއިރު ފާރިސް ވިދާޅުވީ މި މައްސަލަ މުރާޖައާކުރަން ވަގުތު ބޭނުންވާ ކަމަށެވެ.
އެހެންވެ މި މައްސަލަ ބައްލަވާ ކްރިމިނަލް ކޯޓުގެ ގާޒީ އިބްރާހިމް އަލީ އެންމެ ފުރަތަމަ ނިންމެވީ ބުދަ ދުވަހު އަޑުއެހުމެއް ބޭއްވުމަށެވެ. ގާޒީ ވިދާޅުވި ގޮތުގައި، މީގެކުރިން ބޭއްވި އަޑުއެހުމުގައި 47 ހެކިންގެ ހެކި ބަސް ނުނަގަން ވަނީ ނިންމައިފަ އެވެ. އެއީ ގިނަ އަދަދަކަށްވުމާއި ހުރިހާ ހެކިން ހާޒިރުކުރަން އުނދަގޫވާނެތީ ކަމަށް އޭނާ ވިދާޅުވި އެވެ. އެކަމަކު އެންމެ މުހިންމު ހެކިން ހުށަހެޅުމަށް ފުރުސަތު ދޭނެ ކަމަށް އޭނާ ވިދާޅުވި އެވެ. ނަމަވެސް، ޝަމީލް ވިދާޅުވީ ހެކިން ކަނޑައެޅުމަށް ގާޒީ ދެއްވީ އެންމެ އެކަށީގެންވާ ވަގުތެއް ނޫން ކަމަށެވެ. އަދި އަޑުއެހުން އަންނަ ހަފުތާގެ ދުވަހަކަށް ފަސް ކޮށް ދިނުމަށް އޭނާ އެދިވަޑައިގެންނެވުމުން ފަހުން އަޑު އެހުން އޮންނާނެ ތާރީހެއް އަންގާނެ ކަމަށް ގާޒީ ވިދާޅުވި އެވެ. މި އަޑުއެހުން އެހެން ދުވަހަކަށް ފަސްކުރުމަށް ދައުލަތުން ވެސް އިންކާރުކޮށްފައިނުވެ އެވެ.
މި މައްސަލައިގައި އަޑުއެހުން އަންނަ ހަފްތާގެ ހޯމަ ދުވަހު ބާއްވާނެކަން ފާރިސްގެ ވަކީލުންނަށް ފަހުން ވަނީ އަންގާފަ އެވެ. ރިޝްވަތު ދިނުމުގެ ތުހުމަތުގައި މިދިޔަ އަހަރުން ފެށިގެން ހައްޔަރުކޮށްގެން ގެންގުޅުމަށް ފަހު، ގާނޫނާ ހިލާފަށް ސަރުކާރު ވައްޓާލަން އުޅުމުގެ ތުހުމަތުގައި، މި އަހަރުގެ ފެބްރުއަރީ މަހުގެ ތެރޭގައި ފާރިސް ހައްޔަރުކޮށްފައިވާއިރު އޭނާއާ ދެކޮޅަށް ތިން ދައުވާއެއް ކޮށްފައިވެ އެވެ. އެއީ ޝަހްސު އޮޅުވައިލުމުގެ ދައުވާގެ އިތުރުން ރައްޔިތުންގެ މަޖިލީހުގެ މެމްބަރުންނަށް ރިޝްވަތު ދިނުމުގެ ދައުވާ އާއި މިދިޔަ ފެބްރުއަރީ 1 ގައި ސުޕްރީމް ކޯޓުން ނެރުނު އަމުރާ ގުޅިގެން ސަރުކާރު ވައްޓާލަން އުޅުނު ކަމަށް ބުނެ ކުރާ ޓެރަރިޒަމްގެ ދައުވާ އެވެ.
