އިނގުރައިދޫ ބަނދަރު ތަރައްގީ ކުރުމުގެ 90 އިންސައްތަ މަސައްކަތް ނިމިއްޖެ
މިމަޝްރޫއުގެ ދަށުން އިނގުރައިދޫ ބަނދަރު 750 ފޫޓަށް ދިގު ކުރާނެ
އިނގުރައިދޫ ބަނދަރު
ރ.އިނގުރައިދޫ ބަނދަރު ތަރައްގީކުރުމުގެ 90 އިންސައްތަ މަސައްކަތް ނިމިފައިވާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީން ބުނެފި އެވެ.
އިނގުރައިދޫ ބަނދަރުގެ މަސައްކަތްތައް ކުރިއަށްދާ ގޮތާބެހޭ ގޮތުން އެމްޓީސީސީން ބުނީ ބަނދަރު ފުން ކުރުމުގެ މަސައްކަތް މިހާރު ގާތްގަނޑަކަށް ނިމިފައިވާ ކަމަށެވެ. އެމްޓީސީސީން ބުނީ ޖުލައި 15 ވަނަ ދުވަހުގެ ނިޔަލަށް ނިންމާލެވޭނެ ކަމަށް ލަފާކޮށްފައި ވާއިރު ބަނދަރު ފުންކުރުމުގެ މަސައްކަތް މެއި މަހުގެ ނިޔަލަށް 90 އިންސައްތަ މަސައްކަތް ނިމިފައިވާ ކަމަށެވެ.
އެގޮތުން ބަނދަރުގައި އެލް-ބްލޮކްސް ޖެހުމުގެ 81 އިންސައްތަ މަސައްކަތް ނިމިފައިވާ ކަމަށާއި ތޮށީގެ 72 އިންސައްތަ މަސައްކަތް ނިމިފައިވާ ކަމަށެވެ. އަދި ޕޭމަންޓް ގާ އެތުރުމުގެ 25 އިންސައްތަ މަސައްކަތް ނިމިފައިވާ ކަމަށް އެމްޓީސީސީން ބުންޏެވެ.
މިމަޝްރޫއުގެ ދަށުން އިނގުރައިދޫ ބަނދަރު 750 ފޫޓަށް ދިގު ކުރާނެ އެވެ. 288 މީޓަރުގެ ބޮޑު ހިލައިގެ ބޭރު ތޮއްޓެއް ޖެހުމާއި، 65 މީޓަރުގެ ސިމެންތި ބަސްތާ ރިވެޓްމެންޓެއް ޖެހުމާއި، 353 މީޓަރުގެ ކޮންކްރީޓް ބްލޮކް އެއްގަމުތޮއްޓެއް ޖެހުމަށް ވަނީ ހަމަޖެހިފައެވެ. މީގެ އިތުރަށް ބަނދަރު ސަރަޙައްދުގައި ބައްތި ޖަހައި، ނެރު ބައްތި ޖެހުމާއި، އެއްގަމު ތޮށްޓާއި އިންވެގެން ދުވާރެއް ހަދައި ބަނދަރުތެރެ ތިލަވެފައިވާ ސަރަޙައްދުތައް ތިން މީޓަރު ފުނަށް ކޮންނާނެ އެވެ.
އެމްޓީސީސީއާ މިމަސައްކަތް ހަވާލުކޮށްފައިވަނީ 2015 ވަނަ އަހަރު އޭޕްރީލް މަހުގެ 14 ވަނަ ދުވަހު 42.2 މިލިއަން ރުފިޔާއަށެވެ.
