ޔާމީންގެ ނަންފުޅު ވޯޓްކަރުދާސް ކޮޅުގައި އޮންނާކަށް ނުޖެހޭ: އަސްލަމް
މި ސަރުކާރުގެ އަނިޔާވެރިކަމާއި ޚުދު މުހުތާރުކަން އޮތީ ހައްދު ފަހަނަ އަޅާފައި ކަމަށް ވިދާޅުވި
ހިތަދޫ އުތުރު ދާއިރާގެ މެންބަރު މުހައްމަދު އަސްލަމް
ރައީސް ޔާމީންގެ ނަންފުޅު ވޯޓްކަރުދާސް ކޮޅުގައި އޮންނަން ނުޖެހޭ ކަމަށް ހިތަދޫ އުތުރު ދާއިރާގެ މެންބަރު މުހައްމަދު އަސްލަމް ވިދާޅުވެއްޖެއެވެ.
ރާއްޖެޓީވީގެ ފަލަ ސުރުޚީ ޕްރޮގްރާމްގައި ބުދަ ދުވަހުގެ ރޭ ވާހަކަފުޅު ދައްކަވަމުން އަސްލަމް ވިދާޅުވީ، ތާއިދު ނެތް އަނިޔާވެރި ވެރިއެއްގެ ނަން ރިޔާސީ އިންތިޚާބުގެ ވޯޓް ކަރުދާސްކޮޅުގައި ނޯންނާނޭ ކަމަށެވެ.
އަސްލަމް ވިދާޅުވީ، އިންތިޚާބެއް ބޯ މަތިވަމުން އަންނަ އިރު ރައްޔިތުންނަށް އެންމެ ގާތުން ޚިދުމަތް ކުރުމަށް ރައްޔިތުން ހޮވާފައި ތިއްބެވި ކައުންސިލަރުންނަށް ޖެއްސުންކޮށް އެ ކައުންސިލަރުން ސަސްޕެންޑް ކުރުމަކީ ބިރުދެއްކުމަށް ރައީސް ޔާމީންގެ ސަރުކާރުން ހިންގާ ޖަރީމާއެއް ކަމަށެވެ.
މި ސަރުކާރުގެ އަނިޔާވެރިކަމާއި ޚުދު މުހުތާރުކަން އޮތީ ހައްދު ފަހަނަ އަޅާފައި ނަމަވެސް ރައްޔިތުން ތިބީ ދައްކާ ބިރަށް ފަހަތަށް ޖެހޭ ގޮތަށް ނޫން ކަަމަށް އަސްލަމް ވިދާޅުވިއެވެ.
އޭނާ ވިދާޅުވީ، ބާރާއި މަގާމަކީ ވަކި މީހަކަށް ދެއްވާ އެއެްޗެއް ނޫން ކަމަށާއި ވެރިކަން ފެށެނީ ރައްޔިތުން ކިބައިން ކަމަށެވެ. އަދި އެ ވެރިކަން ދެމި އޮންނާނީ ވެސް ރައްޔިތުންގެ އަތުގައިކަމަށްވާއިރު، ރައީސް ޔާމިން ދޫ ނުކުރެއްވިޔަސް މި ވެރިކަން ނިމޭނެ ކަމަށެވެ.
ރައީސް ނަޝީދުގެ ނަންފުޅު ވޯޓްކަރުދާސްކޮޅު ގައި އޮންނާނެތޯ، ނޫންތޯ ދެންނެވުމުން އަސްލަމް ވިދާޅުވީ، ކެމްޕެއިން މެނޭޖަރެއްގެ ހައިސިއްޔަތުން އެކަމަށް އޭނާ ޝައްކު ނުކުރައްވާ ކަމަށެވެ. ރައްޔިތުން ވެސް ތިބީ ރައީސް ނަޝީދު މި އިންތިޚާބުގައި ވާދަކުރެވޭނެ ކަމަށް ވަރަށް ބޮޑަށް އުއްމީދުކޮށް ވޯޓްއަޅަން ތައްޔާރަށް ކަމަށް އޭނާ ވިދާޅުވިއެވެ. އަސްލަމް ވިދާޅުވީ،ގުޅިފައިވަ ޕާޓީތަކުން ކެނޑިޑޭޓަކު ނެރޭއިރު، އެ ކެނޑިޑޭޓަކީ އެމްޑިޕީން ހުށައަޅާ ކެނޑިޑޭޓަށް ވުމުގެ ފުރުސަތު ވަރަށް ބޮޑު ކަމަށެވެ. އަދި އެބޭފުޅުންގެ އުއްމީދަކީ ރިޔާސީ އިންތިޚާބުގައި އެއްލައްކަ އަށްޑިހަހާހަށް ވުރެ ގިނަ ވޯޓް ގުޅިފައިވާ ޕާޓިތަކުން ހޯދޭނެ ކަމަށެވެ.
އަސްލަމް ވިދާޅުވީ، ޕީޕީއެމްގެ އެކްޓިވިސްޓުން އިލެކްޝަންސް ކޮމިޝަންގައި ތިއްބަވައިގެން މި އިންތިޚާބު މިނިވަން އިންސާފުވެރި އިންތިޚާބަކަށް ނުވާނެ ކަމަށެވެ. އެހެންއެކަން އޮތުމުން މި އިންތިޚާބާއި މެދު އެބޭފުޅުން ވަރަށް ބޮޑަށް ފާރަވެރިވެ ކޮންމެ ވޯޓް ފޮއްޓެއްގެ ކައިރީގައި އެބޭފުޅުންގެ މިހަކު އަބަދުވެސް ބަހައްޓަވާނެ ކަމަށް ވިދާޅުވިއެވެ.
އޭނާ ވިދާޅުވި ރައީސް ޔާމީންގެ އަމަލުފުޅުތައް ހުންނަގޮތުން އާއްމު ރައްޔިތުންނާއި އަރިހުގައި ތިއްބެވި ބޭފުޅުން ތިބީ ފޫހިވެފައި ކަމަށާއި، އެމަނިކުފާނަށް ތާއީދު ކުރާ މީހަކު ފެނިވަޑައި ނުގަންނަވާ ކަމަށެެވެ. އަދި އެމަނިކުފާނަށް ވެސް މިހާރު އޮތް އެންމެ މޮޅު ގޮތަކީ، މި ދައުރުވެސް ނުނިމެނީސް އަވަހަށް އިސްތިއުފާ ދެއްވުން ކަމަށެވެ.
