ޖިންސީ ފުރައްސާރައިގެ ތުހުމަތުތަކެއް ހޮލީވުޑްގެ ލެޖެންޑް މޯގަން ފްރީމަންއަށް ވެސް!

ހޮލީވުޑްގެ ލެޖެންޑުން ތެރޭގައި ހިމެނޭ މޯގަން ފްރީމަންއަށް ވެސް ޖިންސީ ފުރައްސާރައިގެ ތުހުމަތު ތަކެއް ކޮށްފިއެވެ.

ފްރީމަންގެ މައްޗަށް މި ތުހުމަތު ކޮށްފައިވަނީ ސީއެންއެން އިނެވެ. ސީއެންއިންއިން ބުރާސްފަތި ދުވަހު ގެނެސްދިން ރިޕޯޓެއްގައި ބުނާ ގޮތުން ފްރީމަންގެ މައްޗަށް ޖިންސީ ފުރައްސާރައިގެ ތުހުމަތު ކުރާ 16 ފަރާތަކާ އެމީހުން ވަނީ ވާހަކަ ދައްކާފައެވެ.

އެތަނުން އަށް މީހުންނަށް ފްރީމަން ޖިންސީ ފުރައްސާރަ ކޮށްފައިވާކަމަށް ބުނެފައިވާ އިރު، އަނެއް އަށް މީހުންނަށް ފްރީމަންގެ ފަރާތުން އެފަދަ މަންޒަރު ފެނިފައިވާކަމަށް ބުނެފައިވެއެވެ. ފްރީމަންއަށް ތުހުމަތު ކުރާ ފަރާތްތަކުން ބުނަނީ 'އުނދަގޫ ވަންދެން ހަށިގަނޑަށް ބަލާނެ" ކަމަށާއި "ހަށިގަނޑު ނުވަތަ ލާފައި ހުންނަ ހެދުމަށް ބަލާފައި ކޮމެންޓް ކުރާނެ" ކަމަށެވެ.

އެ ރިޕޯޓް ދެއްކުމާއެކު ފްރީމަން ވަނީ މައާފަށް އެދިފައެވެ. އަދި އެއާ އެކު ގިނަ ބައެއް ހީކުރީ އޭނާ އެކަމަށް އިއުތިރާފުވީ ކަމަށެވެ. ނަމަވެސް މައާފަށް އެދުނުތާ އެއް ދުވަސް ފަހުން އޭނާ އިތުރު ބަޔާނެއް ނެރުނެވެ.

"އަހަރެން އެއްޗެއް ސާފު ކޮށްދޭން ބޭނުން. އުނދަގޫވާ، ބިރުވެރި މަސައްކަތުގެ މާހައުލެއް ނުގެންގުޅެން. އަހަރެން އަންހެނުންނަށް ފުރައްސާރައެއް ނުކުރަން. ޖިންސީ ގުޅުމުގެ ބަދަލުގައި ވަޒީފާ ދޭން ނުވަތަ އެހެން އެއްޗެއް ދޭނަމެކޭ ނުބުނަން. މިއާ ހިލާފަށް ދެކެވޭ ހުރިހާ ވާހަކަތަކަކީ ދޮގު ވާހަަކަތެކެއް،" ފްރީމަން ބުންޏެވެ.

ސީއެންއެންގެ ތަހުގީގުގައި ވާހަކަ ދެއްކި ބައެއް މީހުން ފްރީމަންގެ ފަރާތުން އެފަދަ ކަމެއް ފެނިފައިނުވާކަން ބުނެފައިވާކަން ވެސް ފާހަގަކޮށްފައިވެއެެވެ.

މި ތުހުމަތުތަކާ އެކު 'ވީސާ'އިން ވަނީ ފްރީމަންއާއެކު ހަދާފައިވާ މާކެޓިންގ ކެމްޕޭން ސަސްޕެންޑް ކޮށްފައެވެ. އަދި ސްކްރީން އެކްޓަރސް ގިލްޑްއިން ވެސް ދަނީ ފްރީމަންއާ ދެކޮޅަށް ފިޔަވަޅު އެޅުމާ މެދު ވިސްނަމުންނެވެ.

އައްޑިހަ އަހަރުގެ މޯގަން ފްރީމަން ފިލްމީ ދާއިރާގައި މަސައްކަތް ކުރާތާ 50 އަހަރު ވެއްޖެއެވެ. ސަތޭކައަށް ވުރެ ގިނަ ފިލްމް ކުޅެފައިވާ ފްރީމަންއަށް 'މިލިއަން ޑޮލަރ ބޭބީ'ގައި އޭނާ ކުޅުނު ރޯލަށް އެކަޑަމީ އެވޯޑެއް، ނުވަތަ އޮސްކާއެއް، ވެސް ވަނީ ލިބިފައެވެ.