ޖޭއެސްސީގެ ހާޒިރީގެ ފުލަށް މަސީހާއި އަނިލް އަދި ގާޒީ އީސާފުޅު

ޖުޑީޝަލް ސާވިސް ކޮމިޝަން (ޖޭއެސްސީ)ގެ މިދިޔަ އަހަރުގެ ހާޒިރީގެ ފުލަށް ޖުވެނައިލް ކޯޓުގެ ގާޒީ މުހައްމަދު އީސާފުޅާއި މަޖިލީހުގެ ރައީސް އަބްދުﷲ މަސީހު މުހައްމަދާއި ބަންޑާރަ ނައިބު މުހައްމަދު ވެއްޓިއްޖެއެވެ.

ޖޭއެސްސީން އާންމުކޮށްފައިވާ އެ ކޮމިޝަންގެ އަހަރީ ރިޕޯޓުން ދައްކާ ގޮތުން މިދިޔަ އަހަރު ބޭއްވި 26 ޖަލްސާގެ ތެރެއިން، އެންމެ މަދުން ޖަލްސާތަކަށް ވަޑައިގެންނެވީ ގާޒީ އީސާފުޅެވެ. އޭނާ ހާޒިރުވެވަޑައިގެންނެވީ ނުވަ ޖަލްސާއަކަށް ކަމަށް ޖޭއެސްސީން އާންމުކޮށްފައިވާ މެމްބަރުންގެ ހާޒިރީން ދައްކައެވެ. ހާޒިރީ ރިޕޯޓުގައި ބުނެފައިވާ ގޮތުން އީސާފުޅު ވަޑައިނުގަންނަވާ ޖަލްސާތަކުގެ އަދަދު 13އަށް އަރާ ކަމަށާއި އޭނާ ހާޒިރު ވާންޖެހޭނީ 22 ޖަލްސާއަކަށް ކަމަށެވެ.

ޖޭއެސްސީގެ ޖަލްސާތަކަށް އެންމެ މަދުން ވަޑައިގެންނެވި ދެ ވަނަ ބޭފުޅަކީ ރައްޔިތުންގެ މަޖިލީހުގެ ރައީސް އަބްދުﷲ މަސީހު މުހައްމަދެވެ. އޭނާ ހާޒިރުވެވަޑައިގެންނެވީ 13 ޖަލްސާއަކަށް ކަމަށާއި ވަކި ސަބަބެއް ނާންގައި ހަ ޖަލްސާއަކަށް މަސީހު ވަޑައިނުގަންނަވާ ކަމަށް ހާޒިރީ ރިޕޯޓުގައިވެއެވެ.

ހާޒިރީގެ ފުލުން ތިން ވަނަގައި ވަނީ ބަންޑާރަ ނައިބު މުހައްމަދު އަނިލްއެވެ. އަނިލް ހާޒިރުވެވަޑައިގެންނެވީ 11 ޖަލްސާއަކަށް ކަމަށާއި ސަބަބެއް ނާންގައި ހަތަރު ޖަލްސާއަކަށް ވަޑައިނުގަންނަވާ ކަމަށް ވެސް ހާޒިރީ ރިޕޯޓުގައިވެއެވެ.

ޖޭއެސްސީގައި މިހާރު ތިއްބެވި ނުވަ މެމްބަރުން-- ފޮޓޯ/ ޖޭއެސްސީ

ޖޭއެސްސީން ބުނީ މިދިޔަ އަހަރު ބޭއްވި ހުރިހާ ޖަލްސާތަކަށް ވަޑައިގެންނެވީ އެ ކޮމިޝަންގެ 10 މެމްބަރުންގެ ތެރެއިން ދެ މެމްބަރުން ކަމަށެވެ. އެ ދެ މެމްބަރުންނަކީ ގާނޫނީ ވަކީލުންގެ ތެރެއިން ޖޭއެސްސީއަށް އައްޔަންކޮށްފައިވާ ލަތީފާ ގާސިމާއި ރައީސްގެ މެމްބަރެއްގެ ހައިސިއްޔަތުން ޖޭއެސްސީގައި އިންނަވާ މުހައްމަދު ފައިސަލެވެ.

ޖޭއެސްސީން މިދިޔަ އަހަރު 83 ޖަލްސާއެއް ބޭއްވުމަށް އެޖެންޑާ ކުރިއެވެ. ނަމަވެސް ކޯރަމް ހަމަނުވެގެން 57 ޖަލްސާ ކެންސަލް ކުރަންޖެހުނެވެ. އެ ކޮމިޝަނުން މިދިޔަ އަހަރު ބާއްވާފައި ވަނީ ޖުމްލަ 26 ޖަލްސާއެވެ. ޖޭއެސްސީގެ ގާނޫނުގައި ބުނެފައިވާ ގޮތުން މަދުވެގެން ކޮންމެ މަހަކު އެއް ފަހަރު ޖަލްސާ ބާއްވަންޖެހޭނެއެވެ.

ޖޭއެސްސީއަކީ ފަނޑިޔާރުންނާ ބެހޭ ގޮތުން އުފުލާ ޝަކުވާތައް ބަލައި އެ ފަރާތްތަކާ މެދު އަޅަންޖެހޭ ފިޔަވަޅުތައް އެޅުމަށް އުފައްދާފައިވާ ކޮމިޝަނެކެވެ.