ސިޔާސީ ނުފޫޒުން ކޮށްފައިވާ ޝަރީއަތެއް ކަމަށް ސުޕްރީމް ކޯޓުން ނިންމާފައިވާ ޝަރީއަތަކުން ޙުކުމްކޮށް، ޖަލަށް ލާފައިވާ ކުރީގެ ނައިބު ރައީސް އަޙުމަދު އަދީބު ޢަބްދުލްޣަފޫރު ދޫނިދޫގައި ބަންދުކޮށްފައިވާއިރު، އަދީބުއާއިމެދު ތަފާތުކުރުން ގެންގުޅޭކަން ފާހަގަކޮށް، އެކަމުގައި ޒިންމާވާ ފަރާތްތަކާއި މެދު ފިޔަވަޅު އަޅައިދިނުމަށް ހިއުމަން ރައިޓްސް ކޮމިޝަން އޮފް ދި މޯލްޑިވްސް (އެޗްއާރްސީއެމް) ގައި އެދިއްޖެއެވެ.
އަދީބުގެ ފަރާތުން އެޗްއާރްސީއެމްއަށް މި މައްސަލަ ހުށަހަޅުއްވާފައިވަނީ އަދީބުގެ ޤާނޫނީ ވަކީލުންގެ ޓީމުގައި ހިމެނިވަޑައިގަންނަވާ އަލްއުސްތާޛް އިބްރާހިމް ޝިޔާމެވެ.
އެޗްއާރްސީއެމަށް މައްސަލަ ހުށަހަޅުއްވައި ޝިޔާމް ފޮނުއްވެވި ސިޓީގައިވަނީ، އަދީބަށް ވަކީލުންނާއި ބައްދަލުކުރެއްވުމުގެ ފުރުޞަތު ނުދޭ ކަމަށާއި، އަދި އެކަމުގައި ތަފާތުކުރުން ގެންގުޅޭ ކަމަށެވެ. އަދި ކުއްލި ގޮތަކަށް އަދީބު ދޫނިދޫ ޖަލަށް ބަދަލު ކުރުމަކީ އެންޓި ޓޯޗަރ ޤާނޫނުގެ ދަށުން ޓޯޗަރގެ އަމަލެއްކަންވެސް ޝިޔާމްގެ ސިޓީގައި ވާނީ ފާހަގަކުރައްވާފައެވެ.
މީގެ އިތުރުން، ޝަރުއީ ހުކުމެއް ތަންފީޒު ކުރަމުންދާ ޤައިދީން ބަންދުކޮށްފައި ބަހައްޓަންވާނީ އާންމު ޖަލެއްގައި ކަމަށް ޖަލުތަކާއި ޕެރޯލްގެ ޤާނޫނުގައި ބުނެފައިވާއިރު، އަދީބް މިހާރު ބަހައްޓާފައިވަނީ ޤާނޫނާއި ޚިލާފަށް ކަސްޓޯޑިއަލް ޖަލެއްގައިކަމާއި، އަދި އެގޮތަށް ބަހައްޓާފައި ހުރީ އެއްވެސް މީހަކާއި ވާހަކަ ނުދެއްކޭ ގޮތަށް އެކަހެރިކޮށްކަންވެސް ޝިޔާމްގެ ސިޓީގައި ވާނީ ފާހަގަކުރައްވާފައެވެ.
އެހެންކަމުން، މި މައްސަލަ ތަހުޤީޤުކޮށް، ޒިންމާވާންޖެހޭ ހުރިހާ ފަރާތްތަކާއި މެދު ފިޔަވަޅު އަޅައިދިނުމަށް ޝިޔާމް ވަނީ އަދީބުގެ ފަރާތުން އެޗްއާރްސީއެމްގައި އެދިވަޑައިގެންފައެވެ.
މި މައްސަލަ ބަލައިދިނުމަށް އެދި އަދީބުގެ ފަރާތުން އެޗްއާރްސީއެމަށް ހުށަހަޅާފައިވާއިރު، އަދީބު އެކަހެރިކޮށްފައި ބަހައްޓާ މައްސަލަ އާއި އަދީބަށް ވަކީލުންނާއި ބައްދަލުވުމުގެ ފުރުޞަތު ނުދޭތާ ދެ ހަފްތާ ވެފައިވާ މައްސަލައިގައި އަދީބުގެ އާއިލާއިން ވަނީ ކަންބޮޑުވުން ފާޅުކޮށްފައެވެ.
