ކުރީގެ ރައީސް މުހައްމަދު ނަޝީދަކީ ރާއްޖެ ދުށް އެންމެ އަމިއްލަ އެދުން ބޮޑު ސިޔާސީ ފަރާތްކަމަށް ފިޝަރީޒް މިނިސްޓަަރ ޑރ މުހައްމަދު ޝައިނީ ވިދާޅުވެއްޖެއެވެ.
އެމްޑީޕީގެ ރިޔާސީ ޕްރައިމަރީއަށް ރައީސް ނަޝީދު އެކަނި ކުރިމަތިލެއްވުމާއި ގުޅިގެން ޑރ. ޝައިނީ ކުރެއްވި ޓްވީޓެއްގައި ވިދާޅުވީ ރައީސް ނަޝީދުގެ ސިޔާސީ ޙަޔާތުގައި އެމަނިކުފާނާއި ވާދަކުރުމަށް އެޕާޓީގެ އެހެން ބޭފުޅަކަށް ފުރުސަތު ނުދެއްވާކަމަށެވެ. އަދި ޤާނޫނު އަސާސީގައިވާ ގޮތުން މިއަހަރުގެ ރިޔާސީ އިންތިޚާބުގައި ރައީސް ނަޝީދަށް ވާދަކުރެއްވުމުގެ ފުރުސަތު ބަންދުވެފައިވާކަން އެނގިވަޑައިގެން ހުންނަވާވެސް، އެޕާޓީގެ އެހެން ފަރާތަކަށް ޕްރައިމަރީގައި ވާދަކުރެއްވުމުގެ ފުރުސަތު ރައީސް ނަޝީދު ނުދެއްވިކަމަށް ޑރ. ޝައިނީ ވިދާޅުވިއެވެ.
The most selfish politician this country hve ever seen, @MohamedNasheed . In his entire political career never allowed anyone else to compete frm his party n while knowing his name cannot be in ballot accrdng to constitution, he didn’t allow anyone else frm MDP to contest. pic.twitter.com/1fmOo0Ifgf
— Mohamed Shainee (@mshainee) May 20, 2018
ރިޔާސީ ޕްރައިމަރީގައި ވާދަކުރުމަށް މިމަހުގެ 15 ވަނަ ދުވަހު ފުރުސަތު އެމްޑީޕީއިން ހުޅުވާލުމުން، ހޮނިހިރު ދުވަހު 12:00އަށް ސުންގަޑި ހަމަވިއިރު، ޕްރައިމަރީއަށް ކުރިމަތިލައްވާފައިވަނީ ހަމައެކަނި ކުރީގެ ރައީސް އަދި އެމްޑީޕީގެ ލީޑަރު މުހައްމަދު ނަޝީދެވެ. ޕްރައިމަރީގައި ވޯޓުލުން އޮންނާނީ މިމަހުގެ 30 ވަނަ ދުވަހުއެވެ.
ރައީސް ނަޝީދު އެކަނި ޕްރައިމަރީއަށް ކުރިމަތިލެއްވުމުން ސަރުކާރުން އެކަމަށް ފާޑުކިޔަމުން ދިޔަނަމަވެސް، އެމްޑީޕީއިން ބުނަމުންދަނީ އެޕާޓީއިން ހުޅުވާލެވިފައިވާ ޕްރައިމަރީއަކަށް ގޮވާލުމުން ރައީސް ނަޝީދާއި ވާދަކުރުމަށް އެހެން ފަރާތަކުން ކުރިމަތިލާފައިނުވަނީ ރައީސް ނަޝީދަށް އެމްޑީޕީގެ ތާޢިދު އޮތުމުންކަމަށެވެ.
ރައީސް ނަޝީދަށް ކުރިއަށް އޮތް ރިޔާސީ އިންތިޚާބުގައި ވާދަނުކުރެވޭނެކަމަށް ތަކުރާރުކޮށް ސަރުކާރުންނާއި ޕީޕީއެމްއިން ބުނިނަމަވެސް، ރައީސް ނަޝީދު ވިދާޅުވަމުން ގެންދަވަނީ އެމަނިކުފާނަށް އިންތިޚާބުގައި ވާދަކުރެވޭނެކަމަށެވެ. އަދި އެމްޑީޕީގެ މެމްބަރުން އެމަނިކުފާނު ކެންޑިޑޭޓެއްގެ ގޮތުގައި ހޮވައިފިނަމަ، އެމަނިކުފާނުގެ ކެންޑިޑެސީ ޤަބޫލުކުރަން ސަރުކާރަށް މަޖުބޫރުވާނެކަމަށް ރައީސް ނަޝީދު ގެންދަވަނީ ވިދާޅުވަމުންނެވެ.
