7،000 ވުރެ ގިނަ ސޮޔާއެކު، ޕްރައިމަރީގައި ވާދަ ކުރައްވަން ނަޝީދު ހުށަހަޅުއްވައިފި
ރައީސް ނަޝީދު ފޯމު ހުށަހެޅުއްވީ އަސްލަމް
ޕްރައިމަރީގައި ވާދަ ކުރެއްވުމަށް ނަޝީދުގެ ފޯމު ހުށަހަޅުއްވަނީ--
އެމްޑީޕީ ރިޔާސީ ޕްރައިމަރީގައި ވާދަ ކުރެއްވުމަށް 7،000 ވުރެ ގިނަ މެމްބަރުންގެ ސޮޔާއެކު، ކުރީގެ ރައީސް މުހައްމަދު ނަޝީދު، ފޯމު ހުށަހަޅުއްވައިފި އެވެ.
އެމްޑީޕީ ޕްރައިމަރީގައި ވާދަ ކުރެއްވުމަށް، ރައީސް ނަޝީދުގެ ފޯމު އެ ޕާޓީއަށް ހުށަހެޅުމުގެ ރަސްމިއްޔާތު އޮތީ ހޮނިހިރު ދުވަހުގެ މެންދުރު އެމްޑީޕީ އޮފީހުގައެވެ. ރައީސް ނަޝީދުގެ ފަރާތްޕުޅުން އެ ފޯމު އެމްޑީޕީއަށް ހުށަހެޅުއްވީ އެމަނިކުފާނުގެ ކެމްޕެއިން މެނޭޖަރު ހިތަދޫ އުތުރުދާއިރާގެ މެންބަރު މުހައްމަދު އަސްލަމެވެ. އެމްޑީޕގެ ފަރާތުން ފޯމާ ހަވާލުވެވަޑައިގެންނެވީ ޕާޓީގެ ޗެއާޕާސަން ހަސަން ލަތީފެވެ.
ޕްރައިމަރީގައި ރައީސް ނަޝީދު ވާދަ ކުރައްވަން ހުށަހެޅުއްވި ފޯމާއެކު، 7،739 މެމްބަރުންގެ ސޮއި ހިމެނޭ ތާއިދު ފޯމުތަކެއް ވެސް ވަނީ އެމްޑީޕީގެ އޮފީހަށް ހުށަހަޅާފައެވެ. އެމްޑީޕީ ޕްރައިމަރީގައި ވާދަ ކުރައްވާ ކެންޑިޑޭޓުން މަދުވެގެން 500 މެމްބަރުންގެ ތާއީދު ސޮއި ހުށަހަޅަން ޖެހެއެވެ.
ޕްރައިމަރީގައި ވާދަ ކުރެއްވުމަށް ނަޝީދުގެ ފޯމު ހުށަހަޅުއްވަނީ
ޕްރައިމަރީގެ ފޯމު އެމްޑީޕީ އޮފީހަށް ހުށަހެޅުއްވުމަށްފަހު، އެމަނިކުފާނުގެ ކެމްޕެއިން މެނޭޖަރު އަސްލަމް ވިދާޅުވީ ކުރު މުއްދަތެއްގެ ތެރޭގައި 7،000އަށް ވުރެ ގިނަ މެމްބަރުންގެ ސޮއި ލިބުމުން، ޕްރައިމަރީގައި ޕާޓީގެ ހުރިހާ މެމްބަރުންގެ ތާއީދު ލިބޭނެ ކަމަށް އުންމީދު ކުރައްވާ ކަމަށެވެ.
"ޕާޓީގެ މެމްބަރުންގެ ދިހަ ޕަސެންޓަށް ވުރެ އިތުރަށް ސޮއި މި ލިބުނީ. ޕްރައިމަރީގައި އެއް ކެންޑިޑޭޓެއް އޮތްނަމަ އަޅުގަނޑުމެން ހޯދަންޖެހޭ އަދަދަކީ ވެސް 10 ޕަސެންޓް. އެއީ ގާތްގަނޑަކަށް 5،000 ވަރަކަށް ސޮއި. އެހެންވީމަ އެ އަދަދު ވެސް ތާއިދުން ސޮއާއެކު މި ވަނީ ލިބިފަ،" ރައްޔިތުންގެ މަޖިލީހުގެ ހިތަދޫ އުތުރުދާއިރާގެ މެންބަރު ވިދާޅުވިއެވެ.
އެމްޑީޕީ ރިޔާސީ ޕްރައިމަރީގައި ވާދަ ކުރެއްވުމަށް "ޖަޒީރާ ރައީސް"ގެ ނަމުގައި ރައީސް ނަޝީދު ވަނީ ކެމްޕެއިން ފައްޓަވާފައެވެ. އެމަނިކުފާނުގެ ކެމްޕެއިން ޓީމުތަކުން ވަނީ ރާއްޖޭގެ 30 އަށް ވުރެ ގިނަ ރަށްތަކަށް ޒިޔާރަތް ކޮށްފައެވެ. އަދި ސްކައިޕް މެދުވެރިކޮށް، ރައީސް މުހައްމަދު ނަޝީދު ވަނީ 40 ވުރެ ގިނަ ރަށްރަށަށް ވީޑީއޯ ކޮންފަރެންސް މެދުވެރިކޮށް ގުޅުއްވައި، ތާއީދު ހޯއްދެވުމުގެ މަސައްކަތް ފައްޓަވާފައެވެ.
