ޔުރޮޕާ ލީގު: އާސެނަލް އަދި އެޓްލެޓިކޯގެ ކުރިމަތިލުން އެއްވަރުވެއްޖެ

ޔުއެފާ ޔުރޮޕާ ލީގުގެ ސެމީ ފައިނަލުގައި އިނގިރޭސިވިލާތުގެ އާސެނަލް އަދި ސްޕެއިންގެ އެޓްލެޓިކޯ މެޑްރިޑް ކުޅުނު މެޗު އެއްވަރުވެގެން ނިމިއްޖެއެވެ.

އާސެނަލްގެ އެމިރޭޓްސް ސްޓޭޑިއަމްގައި ކުޅުނު މި މެޗު ނިމިފައިވަނީ 1-1 ގެ ނަތީޖާއަކުން އެއްވަރުވެގެންނެވެ. އާސެނަލް ސެމީއަށް ދަތުރުކުރީ 6-3 ގެ އެގްރިގޭޓް ނަތީޖާއަކުން ރަޝިއާގެ ސީއެސްކޭއޭ މޮސްކޯ ބަލިކޮށްގެންނެވެ. ހަމައެހެންމެ އެޓްލެޓިކޯ ސެމީއަށް ދަތުރުކުރީ 2-1 ގެ އެގްރިގޭޓް ނަތީޖާއަކުން ޕޯޗުގަލްގެ ސްޕޯޓިން ލިސްބަން ބަލިކޮށްގެންނެވެ.

ދެ ޓީމުގެ ފަރާތުން ވެސް ފޯރިގަދަ ކުޅުމެއް މި މެޗުގައި ފެނިގެންދިޔައިރު ދެ ޓީމުން ވެސް ވަނީ ލަނޑު ޖެހުމަށް ރަނގަޅު ފުރުސަތުތަކެއް މި މެޗުގައި ތަނަވަސްކޮށްފައެވެ. މި މެޗުގައި އެޓްލެޓިކޯއަށް ދިމާވި އެންމެ ބޮޑު ގޮންޖެހުމަކީ މެޗުގެ 10 ވަނަ މިނެޓުގައި އެ ޓީމުގެ ޑިފެންޑަރު ސިމޭ ވިރްސާލްކޯއަށް ދެވަނަ ރީނދޫ ކާޑަކާއެކު ރަތް ކާޑު ދައްކައި ދަނޑުން ފޮނުވާލުމާއެކުއެވެ. އޭގެ ތިން މިނެޓު ފަހުން އެޓްލެޓިކޯގެ ކޯޗު ޑިއޭގޯ ސިމިއޯނޭ ވެސް ވަނީ ބެންޗުން ފޮނުވާލާފައެވެ.

މި ރަތް ކާޑަށްފަހު އާސެނަލްއިން ވަނީ ބޯޅަ ހިފަހައްޓައިގެން ކުޅެ ލަނޑު ޖެހުމަށް ރަނގަޅު ފުރުސަތުތަކެއް ތަނަވަސްކޮށްފައެވެ. އެ ޓީމުގެ ފޯވާޑް އެލެކްޒެންޑާ ލަކަޒެޓްއަށް ލަނޑު ޖެހުމަށް ރަނގަޅު ފުރުސަތުތަކެއް ލިބިގެންދިޔައިރު އޭނާ ފޮނުވާލި ގިނަ ހަމަލާތަކުގެ ހުރަހަކަށް ވެގެންދިޔައީ އެޓްލެޓިކޯގެ ކީޕަރު ޔާން އޮބްލަކްއެވެ.

ދެ ޓީމު އެއްވަރުވެއޮވެ ފުރަތަމަ ހާފު ނިމިގެންދިޔައިރު ދެވަނަ ހާފުގައި އާސެނަލްއިން ވަނީ އެ ޓީމުގެ ކުޅުން ވަރުގަދަކޮށްފައެވެ. ނަތީޖާއެއްގެ ގޮތުން މެޗުގެ 61 ވަނަ މިނެޓުގައި ޖެކް ވިލްޝެއާ ތަނަވަސްކޮށްދިން ފުރުސަތެއްގައި ލަނޑެއް ޖަހާ ލަކަޒެޓް ވަނީ އާސެނަލްއަށް ލީޑު ނަގައިދީފައެވެ. މި ލަނޑަށް ފަހުވެސް އާސެނަލްއަށް ވަނީ ލީޑު ފުޅާކުރުމަށް އިތުރު ފުރުސަތުތައް ލިބި ބޭކާރުވެފައެވެ. އެޓްލެޓިކޯއިން ކައުންޓާގައި އާސެނަލްގެ ގޯލަށް ނުރައްކާކުރަމުން ދަނިކޮށް މެޗުގެ 82 ވަނަ މިނެޓުގައި އެންޓޮއިން ގްރީޒްމަން ވަނީ ލަނޑެއް ޖަހާ އެ ޓީމަށް ނަތީޖާ ހަމަހަމަކޮށްދީފައެވެ.

މި މުބާރާތުގެ ދެވަނަ ސެމީގައި ފްރާންސްގެ މާސޭ ވަނީ އޮސްޓްރިއާގެ އެފްސީ ރެޑްބުލް ސަލްޒަބާގް 2-0 އިން ބަލިކޮށްފައެވެ. މި މެޗުގައި މާސޭއިން ޖެހި ލަނޑުތައް އެ ޓީމަށް ޖަހައިދިނީ ފްލޯރިއަން ތޯވިން އަދި ކްލިންޓަން ނިޔޭއެވެ.

ސެމީ ފައިނަލުގެ ދެވަނަ ލެގުތައް ކުޅުމަށް ހަމަޖެހިފައިވަނީ އަންނަ ހަފްތާގެ ބުރާސްފަތި ދުވަހުގެ ރޭއެވެ.