އަބްދުﷲ ރިޔާޒުގެ މައްސަލަ ދަށު ކޯޓުން ނިންމާފައި ވަނީ މައުލޫ އިން ބޭރުން: ހައިކޯޓު
ކްރިމިނަލް ކޯޓުން ހެކިބަހުގައި ފުށުއެރުންތަކެއް ހުރިކަމަށް ބުނި ނަމަވެސް، މައުލޫގެ ތެރެއިން ބަލާއިރު ފުށުއެރުމެއް ނެތް
އަބްދުﷲ ރިޔާޒު ކްރިމިނަލް ކޯޓަށް ހާޒިރުވުމަށް ފަހު (ފައިލް ފޮޓޯ)
ރައްޔިތުންގެ މަޖިލީހުގެ ކިނބިދޫ ދާއިރާގެ މެމްބަރު އަދި ޖުމްހޫރީ ޕާޓީގެ ނައިބު ލީޑަރު އަބްދުﷲ ރިޔާޒުގެ މައްޗަށް ދައުލަތުން އުފުލި ގާނޫނު ތަންފީޒުކުރާ މުވައްޒަފަކަށް ގަސްތުގައި ހުރަސް އެޅުމުގެ ކުށް ސާބިތު ނުވާކަމަށް ކްރިމިނަލް ކޯޓުން ނިންމާފައި ވަނީ އެމައްސަލައިގެން މައުލޫ އިން ބޭރުން ކަމަށް އެމައްސަލައިގެ އިސްތިއުނާފް މައްސަލާގައި ހައިކޯޓުން ކޮށްފައިވާ ހުކުމުގައި ބުނެފިއެވެ.
އަންގާރަ ދުވަހު ހައިކޯޓުގައި ބޭއްވި ހުކުމް ކުރުމުގެ ޝަރީއަތުގެ އަޑުއެހުމުގައި ކްރިމިނަލް ކޯޓުން އަބްދުﷲ ރިޔާޒުގެ މައްޗަށް ކުށް ސާބިތު ނުވާ ކަމަށް ނިންމާފައިވާ ނިންމުން ބާތިލުކޮށް، ހައިކޯޓުން ވަނީ ހަތަރު މަހާއި 24 ދުވަހަށް އަބްދުﷲ ރިޔާޒު ޖަލަށްލުމަށް ހުކުމް ކޮށްފައެވެ.
ދައުލަތުގެ ފަރާތުން އިސްތިއުނާފް ކުރި އެމައްސަލައިގެ ހުކުމްގައި މައިގަނޑު ގޮތެއްގައި ބުނެފައި ވަނީ ކްރިމިނަލް ކޯޓުގެ އަމުރެއްގެ ދަށުން އަބްދުﷲ ރިޔާޒުގެ ފޯނުތަކާއި ފޯނުތަކުގައިވާ ސިމްތަކާ އެކު އެ ފޯނުތަކުގައިވާ އެންމެހާ މައުލޫމާތުތައް ފުލުހުންގެ ތަހުގީގަށް ފޯރުކޮށްދިނުމަށް ނެރެފައިވާ އަމުރެއް ކަމަށާއި ނަމަވެސް ކޯޓުގެ އެ އަމުރަށް އަބްދުﷲ ރިޔާޒު ތަބާވެފައި ނުވާ ކަމަށެވެ.
ފޯނުގައިވާ މައުލޫމާތުތައް ހޯދުމަށް ފޯނުގެ ލޮކްކޯޑް ދިނުމަށް ފުލުހުން އެދުމުން އެކަމަށް ރިޔާޒު ދެކޮޅުހަދާފައިވާ ކަމަށާއި އެއީ ގާނޫނު ތަންފީޒު ކުރާ މުވައްޒަފަކަށް ގަސްތުގައި ހުރަސް އެޅުން ކަމަށެވެ.
މެމްބަރުންގެ އިމްތިޔާޒުގެ ގާނޫނާ ހިލާފަށް އަބްދުﷲ ރިޔާޒު ހައްޔަރުކޮށް ގާނޫނުއަސާސީގެ 52 ވަނަ މާއްދާއާ ހިލާފަށް ހޯދާފައިވާ ހެކިތަކެއް ކަމަށް އަބްދުﷲ ރިޔާޒުގެ ފަރާތުންނާއި ކްރިމިނަލް ކޯޓުގެ ހުކުމުގައި ބުނެފައި ވީނަމަވެސް އެއީ މިމައްސަލައާ އެއްވެސް ގުޅުމެއް ނެތް, މައްސަލައިގެ މައުލޫ އިން ބޭރުން ނިންމާފައިވާ ނިންމުމެއް ކަމަށް ވެސް ހައި ކޯޓުގެ ހުކުމުގައި ބުނެފައިވެއެވެ. ހައިކޯޓުގެ ހުކުމުގައި އިތުރަށް ބުނެފައި ވަނީ ކުރިމިނަލް ކޯޓުން ނިންމި މައްސަލާގައި އެ މައްސަލައާ ގުޅުން ހުރި ފުލުހުންގެ ހެކިބަސް ދިނުމުގައި ފުށުއެރުންތަކެއް ހުރި ކަމަށް ފާހަގަ ކޮށްފައިވާ ކަމަށާއި ހައި ކޯޓުން އެ މައްސަލަ އަލުން ބަލައި މުރާޖާ ކުރުމަށް ފަހު ބެލި ބެލުމުން ފުށު އެރުންތައް ހުރީ މައުލޫ އިން ބޭރުން ކޮށްފައިވާ ސުވާލުތަކުގައި ކަމަށެވެ. އަދި މައުލޫގެ ތެރޭގައި ކުރި ސުވާލުތަކުގައި ފުށު އެރުމެއް ނެތް ކަމަށް ވެސް ހައިކޯޓުގެ ހުކުމުގައި ބުނެފައި ވެއެވެ. ކޯޓު އަމުރެއްގެ ދަށުން ރިޔާޒުގެ ފޯނު އަތުލައި ތަހުގީގު ހިންގާފައި ވަނީ، ހަގީގަތާ ހިލާފު ދޮގު ވާހަކަ ފަތުރާ، ރައްޔިތުންގެ މެދުގައި ފިތުނަ ފަސާދަ އުފައްދަން މަސައްކަތް ކުރުމާއި ފުލުހުންގެ މަސައްކަތަށް ނުފޫޒު ފޯރުވައި، އެ މުއައްސަސާ ބަދުނާމު ކުރަމުންދާ މައްސަލައިގައެވެ. ކްރިމިނަލް ކޯޓުން ރިޔާޒުގެ މައްޗަށް ކުށް ސާބިތު ނުވާ ކަމަށް ނިންމި ނިންމުން ހައިކޯޓުން ބާތިލްކޮށް، އަބްދުﷲ ރިޔާޒު ހަތަރު މަހާއި 24 ދުވަހަށް ޖަލަށްލުމަށް ހުކުމް ކޮށްފައި ވަނީ އެމައްސަލަ ބެއްލެވި ތިން ފަނޑިޔާރުންގެ އިއްތިފާގުންނެވެ. ރިޔާޒުގެ މިމައްސަލަ ބެއްލެވި ހައިކޯޓުގެ ފަނޑިޔާރުންގެ ބެންޗުގެ އިސް ފަނޑިޔާރަކީ ޝުޖާއު އުސްމާނެވެ. ދެން ހިމެނިވަޑައިގަންވާ ފަނޑިޔާރުންނަކީ ހައިކޯޓުގެ އިސް ފަނޑިޔާރު އަބްދުﷲ ދީދީ އާއި ފަނޑިޔާރު އަބްދުޣަނީ މުހައްމަދެވެ.
