ބާޒާރު މަތީ ގޮޅިއަށް ވެސް ދިޔާނާ ހެޔޮވަރު!

އެއީ ކުރީގެ ބަންޑާރު ނައިބެއެވެ. ސާކްގެ ސެކްރެޓަރީ ޖެނެރަލް ކަން ވެސް ކުރެއްވި ބޭފުޅެކެވެ. ދައްކަން މި އުޅެނީ ފުންނާބު އުސް ގާނުނީ ވަކީލާ ދިޔާނާ ސައީދުގެ ވާހަކައެވެ. ސުވާލަކީ ދިޔާނާއަށް ބާޒާރުމަތީ ގޮޅިއެއްގައި މަސައްކަތް ކޮށްލެވިދާނެތޯއެވެ؟ އާންމުން ގިނަ ބަޔަކު ނުކުމެ އުޅޭ ދަތުރުވެރިންގެ މާރުކޭޓްގެ ގޮޅިއެއްގައި އިންނަން އޭނާ އެއްބަސް ވެދާނެ ހެއްޔެވެ

ރާއްޖެޓީވީ މިއަހަރުގެ ރަމަޝާން މަހުގައި ގެނެސްދޭ "ނުރަސްމީ ގަޑި" ޕްރޮގްރާމުން މި ސުވާލުތަކުގެ ޖަވާބްތައް ލިބިގެންދާނެވެ. ރާއްޖޭގެ މަޝްހޫރު ވިޔަފާރި ވެރިޔާ އަބްދުﷲ ޖާބިރުގެ އަނބިކަބަލުން ދިޔާނާ މާރުކޭޓް ގޮޅިއެއްގައި އެއްޗެހި ވިއްކަން އިންނަވާއިރު، އޭނާގެ މޫނު މައްޗަށް އަރާ ފައިބާ ކުލަތައް ބަލަން މީހުން ޝައުގުވެރިވާނެއެވެ. އާންމު ރައްޔިތުންނަން ދިޔާނާ މާރުކޭޓް ގޮޅިއެއްގައި އިންދާ ފެނުމުން ކުރެވޭ އިޙްސާސް ވެސް ތަފާތު ވާނެއެވެ.

މާރުކޭޓް ގޮޅިއެއްގައި ދިޔާނާ މަސައްކަތް ކުރައްނީ

"ނުރަސްމީ ގަޑި" ޕްރޮގްރާމަކީ އާންމުންގެ މެދުގައި މަގްބޫލް ބޭފުޅުންގެ ރަސްމީ ގަޑި ނިމުމުން ނުރަސްމީ ގަޑީގައި ކުރާ ކަންކަން ގެނެސްދޭ ޕްރޮގްރާމެކެވެ. ޕްރޮގްރާމްގައި މެހުމާންގެ ހަޔާތާ ގުޅޭ ގޮތުން އާއިލާ މެމްބަރުން ދީފައިވާ އިންޓަރވިއުތަކުން އިތުރު ފުރިހަމަ ކަމެއް ގެނެސްދޭނެވެ. ނުރަސްމީ ގަޑީގައި ޕްރޮގްރާމްގެ މެހުމާނުންނަށް މަސައްކަތެއް ހަވާލުކުރެއެވެ. އެކަން ވަނީ ޗެލެންޖަކަށެވެ. މީގެ ކުރީގެ ރޯދަ މަސްތަކުގައި ވެސް ތަފާތު އެކި ފަރާތްތަކުގެ ހަޔާތާ ގުޅޭ ވާހަކަތައް "ނުރަސްމީ ގަޑި" ޕްރޮގްރާމްގައި ވަނީ ގެނެސްދީފައެވެ.

"ނުރަސްމީ ގަޑި" ޕްރޮގްރާމްގެ ސޫޓިން ކުރިއަށްދާއިރު، ކުރިއަށް ދުވަސްތަކުގައި ތަފާތު ފޮޓޯތައް ދައުރުވާނެއެވެ. ރައްޔިތުންގެ މަޖިލީހުގެ މެމްބަރުންނާއި، މަގުބޫލް ބޭފުޅުން "ނުރަސްމީ ގަނޑި" ޕްރޮގްރާމްގައި އެބޭފުޅުން ރަސްމީ ގަޑީގައި ކުރާ މަސައްކަތް ނޫން އެހެން ކޮންމެވެސް މަސައްކަތެއްގައި އަމަލީ ގޮތުން ހަރަކާތްތެރިވާ މަންޒަރުތަކެވެ.

މާރުކޭޓް ގޮޅިއެއްގައި ދިޔާނާ މަސައްކަތް ކުރަނީ

"ނުރަސްމީ ގަޑި" ޕްރޮގްރާމަކީ ބެލުންތެރި މަގްބޫލްކަން ހޯދާފައިވާ ޕްރޮގްރާމެކެވެ. ވޭތެވެދިޔަ ދެ އަހަރުގެ ރަމަޟާން މަހު މި ޕްރޮގްރާމް ގެނެސް ދީފައިވާއިރު، ރައްޔިތުންގެ މަޖިލީހުގެ މެމްބަރުންނާއި އާންމުންގެ މެދުގައި މަގްބޫލް އެކި ބޭފުޅުން ވަނީ ތަފަތު މަސައްކަތް ކުރައްވާފައެވެ. އެގޮތުން ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު އަހުމަދު މަހުލޫފް މާރުކޭޓް ގޮޅިއެއްގައި މަސައްކަތް ކުރައްވާފައިވާއިރު، ރައްޔިތުންގެ މަޖިލީހުގެ މެމްބަރު އަބްދުﷲ ރިޔާޒު ވަނީ ކަންމަތީ ފިހާރައެއްގެ ސޭޓެއްގެ ގޮތުގައި މަސައްކަތް ކުރައްވާފައިވެއެވެ.