އަށާރަ އަހަރު ފަހުން މަދޫރީއާއި އަނިލް އެކީގައި

އަށާރަ އަހަރު ފަހުން މަދޫރީ ޑިކްސިޓް އާއި އަނިލް ކަޕޫރު އެއް ފިލްމެއްގައި މަސައްކަތް ކުރަން ފަށައިފިއެވެ.

އަނިލް އާއި މަދޫރީ އެންމެ ފަހުން އެކުގައި ކުޅުނު ފިލްމަކީ 2000 ވަނަ އަހަރު ނިކުތް ޕުކާރް އެވެ. އަނިލް ކޮށްފައިވާ ޓްވީޓެއްގައި ބުނެފައި ވަނީ މަދޫރީ އާއި އެކީގައި ފިލްމަކުން ވަރަށް އަވަހަށް ފެންނާނެ ކަމަށާއި މިހާރު އެ ފިލްމުގެ ޝޫޓިން ފަށާފައިވާ ކަމަށެވެ.

އަނިލް އާއި މަދޫރީ ގިނަ ދުވަސްތަކަކަށް ފަހު އެކީގައި ފެންނާނީ ޓޯޓަލް ދަމާލް ކިޔާ ފިލްމަކުންނެވެ. އެއީ ކޮމެޑީ ފިލްމެކެވެ. އަނިލް ކޮށްފައިވާ ޓްވީޓުގައި ބުނެފައި ވަނީ މަދޫރީ އާއެކު ފިލްމު ނުކުޅޭތާ ގިނަ ދުވަސްވީކަމުގައި ވިއަސް އޭނާ އާއި މަދޫރީއާ ދެމީހުންގެ ގުޅުމަށް އެއްވެސް ހީނަރުކަމެއް ނާންނަ ކަމަށެވެ.

ޓޯޓަލް ދަމާލް ޑައިރެކްޓް ކުރަނީ މަޝްހޫރު ޑައިރެކްޓަރ އިންދްރާ ކުމާރެވެ. މި ފިލްމްގެ ޝޫޓިންގެ ފުރަތަމަ ޝޮޓް ޝަރަފުވެރިކޮށް ދިނީ އިންދަރްއާ އެކު ދިލް ގައި މަސައްކަތްކޮށްފައިވާ އަދި މަޝްހޫރު ޑައިރެކްޓަރ އާމިރް ހާނެވެ.

އިންދްރާ ވެސް ވަނީ މި ފިލްމާއި ބެހޭގޮތުން ޓްވީޓު ކޮށްފައެވެ. އިންދްރާ ކޮށްފައިވާ ޓްވީޓުގައި ބުނެފައި ވަނީ އޭނާގެ "ފޭވަރިޓް" ދެ ތަރިންކަމަށްވާ އަނިލް ކަޕޫރާއި މަދޫރީ ޑިކްސިޓް އެކީގައި ފެނުންއެއީ އޭނާ ވަރަށް ލޯބި ކުރާ ކަމެއް ކަމަށެވެ. އަދި އެ ދެ މީހުންނާއި އެކީ އަނެއްކާ ވެސް އެހާ ދުވަސްތަކަކަށް ފަހު މަސއްކަތް ކުރަން ލިބުން އެއީ ވަރަށްބޮޑު އުފަލެއް ކަމަށް އިންދްރާގެ ޓްވީޓުގައި ވަނީ ބުނެފައެވެ. މި ފިލްމު ގެނެސްދިނުމުގެ ކުރިން އިންދްރާ ވަނީ މީގެ ކުރިން މި ތަރިން އެއްކޮށް ފެނިގެންދިޔަ ފިލްމު ބޭޓާ ޑައިރެކްޓުކޮށްފަ އެވެ. އެހެންކަމުން ޓޯޓަލް ދަމާލް ވެގެންދާނީ އިންދްރާގެ ފިލްމަކުން މި ދެ ތަރިން 26 އަހަރު ފަހުން ފެނިގެންދާނެ ފުރަތަމަ ފިލްމަށެވެ.

އިންދްރާގެ ޓްވީޓަށް ރީޓްވީޓު ކުރަމުން މަދޫރީ ބުނެފައިވަނީ އަނިލް އާއި އިންދްރާއެކީގައި މަސައްކަތް ކުރުން އެއީ "ހީ ހީ ހަލާކުވާނެ" ފަދަ ކަމެއް ކަމަށެވެ. އެދެމީހުންގެ މިޖާޒަށް ކުޑަވެސް ބަދަލެއް ނާންނަކަމަށް މަދޫރީ ވަނީ ބުނެފައެވެ.

ޓޯޓަލް ދަމާލަކީ މީގެ ކުރިން ގެނެސްދިން ދަމާލް ފްރަންޗައިޒްގެ ތިންވަނަ ފިލްމެވެ. ޓޯޓަލް ދަމާލުން އަނިލް އާއި މަދޫރީގެ އިތުރުން އަޖޭ ދޭވްގަން، ރިތޭޝް ދޭޝްމުކް، އަރްޝަދު ވާރްސީ އަދި ޖާވީދު ޖެފްރީ ފެނިގެންދާނެއެވެ.

ޓޯޓަލް ދަމާލް އަކީ 2014 ގައި ރިލީޒް ކުރި ގުލާބް ގޭންގްއަށް ފަހު މަދޫރީ ކުޅޭ ފުރަތަމަ ފިލްމެވެ.

ސިނަމާތަކުގައި މި ފިލްމު ދެއްކުމަށް ހަމަޖެހިފައި ވަނީ އަންނަ ޑިސެމްބަރު މަހު 7 ފެށިގެންނެވެ.