ޔުރޮޕާ ލީގު: ސެމީގައި އާސެނަލް އަދި އެޓްލެޓިކޯ

ޔުއެފާ ޔުރޮޕާ ލީގުގެ ސެމީ ފައިނަލުގައި އިނގިރޭސިވިލާތުގެ އާސެނަލް އަދި ސްޕެއިންގެ އެޓްލެޓިކޯ މެޑްރިޑް ވާދަކުރަން ޖެހިއްޖެއެވެ.

ސްވިޓްޒަލޭންޑުގެ ނިޔޯންގައި ހުންނަ ޔޫރަޕުގެ ފުޓްބޯޅައިގެ މައި އިދާރާ ޔުއެފާގެ ހެޑްކުއާޓަރ ގައި ކުރިޔަށްދިޔަ ސެމީ ފައިނަލުގެ ޑްރޯގައި އާސެނަލްއަށް ލައްވާލާފައިވަނީ އެޓްލެޓިކޯއެވެ. ހަމައެހެންމެ 2003 ވަނަ އަހަރުގެ ފަހުން ފުރަތަމަ ފަހަރަށް ޔޫރަޕުގެ ކްލަބް ފުޓްބޯޅަ މުބާރާތެއްގެ ސެމީއިން ޖާގަ ހޯދި މާސޭ ކުޅެން ޖެހޭނީ އޮސްޓްރިއާގެ އެފްސީ ރެޑްބުލް ސަލްޒަބާގްއާ ދެކޮޅަށެވެ.

އާސެނަލް ސެމީއަށް ދަތުރުކުރީ 6-3 ގެ އެގްރިގޭޓް ނަތީޖާއަކުން ރަޝިއާގެ ސީއެސްކޭއޭ މޮސްކޯ ބަލިކޮށްގެންނެވެ. އާސެނަލްގެ ދަނޑުގައި ކުޅުނު ފުރަތަމަ ލެގުގެ މެޗު 4-1 އިން އެ ޓީމު ކާމިޔާބުކުރިއިރު ސީއެސްކޭއޭ މޮސްކޯގެ ދަނޑުގައި ކުޅުނު ދެވަނަ ލެގުގެ މެޗު ނިމިފައިވަނީ 2-2 އިން އެއްވަރުވެގެންނެވެ. މި މުބާރާތް ދެ ފަހަރު ކާމިޔާބުކޮށްފައިވާ އެޓްލެޓިކޯ ސެމީގެ ޖާގައެއް ކަށަވަރުކުރީ 2-1 ގެ އެގްރިގޭޓް ނަތީޖާއަކުން ޕޯޗުގަލްގެ ސްޕޯޓިން ލިސްބަން ބަލިކޮށްގެންނެވެ. ފުރަތަމަ ލެގު 2-0 އިން އަމިއްލަ ދަނޑުގައި އެޓްލެޓިކޯ ކާމިޔާބުކުރިއިރު ރަށުން ބޭރުގައި ކުޅުނު ދެވަނަ ލެގުގެ މެޗުން އެ ޓީމު ވަނީ 1-0 އިން ބަލިވެފައެވެ.

މާސޭ ސެމީއަށް ދަތުރުކުރީ 5-3 ގެ އެގްރިގޭޓް ނަތީޖާއަކުން ޖަރުމަނުގެ އާރްބީ ލީޕްޒީގް ބަލިކޮށްގެންނެވެ. ލީޕްޒީގްގެ ދަނޑުގައި ކުޅުނު ފުރަތަމަ ލެގުގެ މެޗު 1-0 އިން އެ ޓީމު ކާމިޔާބުކުރި ނަމަވެސް މާސޭއިން ވަނީ ދެވަނަ ލެގުގެ މެޗުގައި 5-2 އިން ލީޕްޒީގް ބަލިކޮށްފައެވެ. އޮސްޓްރިއާގެ ރެޑްބުލް ސަލްޒަބާގް ސެމީގެ ޖާގައެއް ހޯދީ 6-5 ގެ އެގްރިގޭޓް ނަތީޖާއަކުން އިޓަލީގެ ލާޒިއޯ ބަލިކޮށްގެންނެވެ. މި ދެ ޓީމު ލާޒިއޯގެ ދަނޑުގައި ކުޅުނު ފުރަތަމ ލެގު 4-2 އިން ލާޒިއޯ ކާމިޔާބުކުރިއިރު ސަލްޒަބާގުން ވަނީ 4-1 އިން ދެވަނަ ލެގު ކާމިޔާބުކޮށްފައެވެ.

ސެމީ ފައިނަލުގެ ފުރަތަމ ލެގުތައް މި މަހުގެ 26 ވަނަ ދުވަހު ކުޅުމަށް ހަމަޖެހިފައިވާއިރު ދެވަނަ ލެގުގެ މެޗުތައް ކުޅުމަށް ހަމަޖެހިފައިވަނީ އަންނަ މޭ މަހުގެ ތިންވަނަ ދުވަހުއެވެ. ފުރަތަމަ ލެގު އަމިއްލަ ދަނޑުގައި އާސެނަލް ކުޅޭއިރު މާސޭ ވެސް ފުރަތަމަ ލެގު ކުޅޭނީ އަމިއްލަ ދަނޑުގައެވެ. ޔުރޮޕާ ލީގުގެ ފައިނަލް ކުޅޭނީ އަންނަ މޭ މަހުގެ 16 ވަނަ ދުވަހުއެވެ.