އޮޅުވާލައިގެން އެތައް ހާސް ބައެއްގެ އަތުން އެތައް މިލިއަން ޑޮލަރު ނެގި ކަމަށް ސާބިތުވެ އިންޑިއާގެ ދެ ފިރެހެނަކާއި އަންހެނަކު، ކޮންމެ މީހަކު 517 އަހަރަށް ޖަލަށްލުމަށް ޔޫއޭއީގެ ކޯޓަކުން ހުކުމްކޮށްފިއެވެ.

ގޯއާގެ އުތުރުގައި އޮންނަ މަޕޫސާގެ ރައްޔިތެއް ކަމަށްވާ ސިޑްނީ ލިމޯސްއަކީ ދުބާއީ މީޑިއާ ސިޓީގައި އިންވެސްޓް ކުރި އެޒެންޝިއަލް ކޮމްޕެނީގެ ކުރީގެ ސީއީއޯއެވެ.

އެޒެންޝިއަލް އެއްބަސްވި ގޮތަށް ފައިސާ ނުދެއްކުމުން އިންވެސްޓަރުންނަށް ވަނީ 200 މިލިއަން ޑޮލަރަށް ވުރެ ބޮޑު އަދަދެއް ގެއްލުންވެފައެވެ.

އެޒެންޝިއަލް އިން އެއްބަސްވީ 25،000 ޑޮލަރު ދިނުމުން އަނބުރާ ދޭއިރު އޭގެ 120 ޕަސެންޓް ދިނުމަށެވެ.

ލިމޯސް އާއި އޭނާގެ އަންހެނުން ވެލަނީ އަދި ރަޔަން ޑި ސޫޒާގެ މައްޗަށް ދުބާއީގެ މިސްޑެމިނާސް ކޯޓުން އާދީއްތަ ދުވަހު ވަނީ 515 މައްސަލައެއްގައި ކޮންމެ މައްސަލައަކަށް އެއް އަހަރުގެ ހުކުމެއް އިއްވާފައެވެ. އަދި ދެ މައްސަލައެއްގައި ދެ އަހަރުގެ ހުކުމެއް އިއްވާފައެވެ.

ޚާއްސަ ބެންޗެއް އެކުލަވާލައިގެން ކުރިޔަށްގެންދިޔަ މި މައްސަލައިގައި އިސް ފަނޑިޔާރު ޑރ. މުހައްމަދު ހަނަފީ ހުކުމް އިއްވެވީ ޣައިރު ހާޒިރުގައެވެ.

އުމުރުން 30 ގެ ފަހުގެ އަހަރުތައް ގުނަމުންދާ ލިމޯސް މިދިޔަ އަހަރުގެ ޖެނުއަރީ މަހު ހައްޔަރުކޮށްފައިވާއިރު ސުޒާ ހައްޔަރުކޮށްފައި ވަނީ ޔޫއޭއީ ދޫކޮށް ފުރަން އުޅެނިކޮށެވެ.

އެޒެންޝިއަލްގެ ނަމުގައި ހިންގާފައިވާ މި ކުންފުނިން އިންވެސްޓަރުންގެ އަތުން ފައިސާ ހޯދާފައި ވަނީ ފޮރިން އެކްސްޗޭންޖް މާކެޓްގައި އިންވެސްޓް ކުރުމަށް ފަހު ބޮޑު ފައިދާއެއް ދޭނެ ކަމަށް ބުނެއެވެ.

އެންމެ ފުރަތަމަކޮޅު ފައިސާ އަނބުރާ ދީ މީހުންގެ އިތުބާރު ހޯދުމަށް ފަހު މަޑުމަޑުން ފައިސާ އަނބުރާ ދިނުން ހުއްޓާލީ ކަމަށް ރިޕޯޓްތައް ބުނެއެވެ.