ރޯދަމަހުގެ ހާރުދަމަށް އަމާޒުކޮށް އޯލްޑްއިޒް ގޯލްޑާއި ގުޅިގެން ރާއްޖެޓީވީއިން މުނިފޫހިފިލުވައިދޭ ޝޯތަކެއް

ރޯދަމަހުގެ ހާރުދަމަށް އަމާޒުކޮށް ކޮންމެ ރެއަކު، މަޝްހޫރު ބޭންޑް އޯލްޑްއިޒް ގޯލްޑާއި ގުޅިގެން މުނިފޫހި ފިލުވައިދޭ ޝޯތަކެއް ގެނެސްދިނުމަށް ރާއްޖެޓީވީ އިން ނިންމައިފިއެވެ.

އަންގާރަ ދުވަހުގެރޭ އޯލްޑްއިޒް ގޯލްޑާއި ރާއްޖެޓީވީއާއި ދެމެދު ވަނީ މި އެއްބަސްވުމުގައި ސޮއި ކޮށްފައެވެ.

ލައިވްކޮށް ގެނެސްދޭ މިޝޯ ގެނެސްދޭނީ އޯލްޑްއިޒް ގޯލްޑް ބޭންޑުގެ ކޮންމެވެސް އެއް ފަންނާނެއް ލަވަ ހުށައަޅައިދޭ ގޮތަށެވެ.

މިރަސްމިއްޔާތުގައި އޯލްޑްއިޒް ގޯލްޑްގެ ފަރާތުން ސޮއިކުރީ އަބްދުﷲ ރާމިޒުއެވެ.

މިރަސްމިއްޔާތުގައި ވާހަކަދައްކަވަމުން ރާއްޖެޓީވީގެ ޗީފް އޮޕަރޭޓިން އޮފިސަރ ފިޔާޒު މޫސާ ވިދާޅުވީ ރާއްޖެ ޓީވީން މިފަހަރުގެ ރޯދަމަހު ހާރުދަމުގައި ރީތި ކުރީގެ ލަވަތަކެއް އަޑުއިވިގެންދާނެ ކަމަށް އުއްމީދު ކުރައްވާ ކަމަށެވެ.

މިފަހަރުގެ ރޯދަމަހުގެ ޕްރޮގްރާމް ގައިޑް އޮތީ ވަރަށް ފުރިހަމަކޮށްކަމަށާއި އަދިވެސް އިތުރު ކޮންޓެންޓް އުފެއްދުމަށް މަސައްކަތް ކުރައްވަމުން ގެންދަވާ ކަމަށް ފިޔާޒު ވިދާޅުވިއެވެ.