އިނގިރޭސި ޕްރިމިއާ ލީގުގައި މެންޗެސްޓާ ޔުނައިޓެޑްގެ ދަނޑުގައި ކުޅުނު މެޗުގައި މެންޗެސްޓާ ސިޓީއަށް ޕްރިމިއާ ލީގުގެ ތަށި ޔަގީން ކުރެވުނަ ނުދީ ޔުނައިޓެޑްއިން އެ ޓީމު ހިފަހައްޓައިފިއެވެ.

ޔުނައިޓެޑްގެ ދަނޑު ކަމަށްވާ އޯލްޑް ޓްރެފޯޑްގައި ކުޅުނު މެޗުގައި ޔުނައިޓެޑްއިން ވަނީ ފަހަތުން އަރާ 3-2 ގެ ނަތީޖާއަކުން ސިޓީ ބަލިކޮށްފައެވެ. މި މެޗު ކާމިޔާބު ކުރިނަމަ ސިޓީއަށް ޕްރިމިއާ ލީގުގެ ތަށި ޔަގީންކުރުމުގެ ފުރުސަތު އޮތް ނަމަވެސް މި މެޗުން ބަލިވުމާއެކު އެ ޓީމަށް ޕްރިމިއާ ލީގުގެ ތަށި ޔަގީންވާނީ އަންނަ ހަފްތާގައި ކުޅޭ މެޗުން މޮޅުވެގެންނެވެ. މި ދެ ޓީމު ސީޒަނުގެ ކުރީކޮޅު ސިޓީގެ ދަނޑުގައި ކުޅުނު މެޗު 2-1 އިން ކާމިޔާބު ކުރީ ސިޓީއެވެ. މިދިޔަ ހަފްތާގައި ލިވަޕޫލް އަތުން ބަލިވި ސިޓީގެ ޓީމުން ހަތަރު ބަދަލެއް ފެނިގެންދިޔައިރު ޔުނައިޓެޑްގެ ޓީމުން ފެނިފައިވަނީ ދެ ބަދަލެކެވެ.

ފުރަތަމަ ހާފު ފެށިގެން ސިޓީގެ ފަރާތުން މޮޅު ކުޅުމެއް ފެނިގެންދިޔައިރު އެ ޓީމުން ވަނީ ލަނޑު ޖެހުމަށް ރަނގަޅު ފުރުސަތުތަކެއް ތަނަވަސް ކޮށްފައެވެ. ޑޭވިޑް ޑެހޭއާ ބަލަހައްޓަމުން ދިޔަ ގޯލު ސިޓީއިން ހުޅުވާލީ މެޗުގެ 25 ވަނަ މިނެޓުގައެވެ. ލެރޯއީ ސާނޭ ތަނަވަސްކޮށްދިން ފުރުސަތަކުން މެޗުގެ ފުރަތަމަ ލަނޑު ޖަހާ ސިޓީއަށް ލީޑު ނަގައިދިނީ އެ ޓީމުގެ ކެޕްޓަން ވިންސެންޓް ކޮމްޕެނީއެވެ. އޭގެ ފަސް މިނެޓުފަހުން އައިކޭ ގުންޑޮގަން ވަނީ އިތުރު ލަނޑެއް ޖަހާ ސިޓީގެ ލީޑު ފުޅާކޮށްދީފައެވެ. މި ލަނޑަށްފަހު ވެސް ސިޓީއަށް ވަނީ ލީޑު ފުޅާކުރުމަށް ހުސް ގިނަ ފުރުސަތުތަކެއް ލިބި ބޭކާރުވެފައެވެ.

ދެ ލަނޑުގެ ލީޑެއްގައި އޮވެ ސިޓީއިން ފުރަތަމަ ހާފު ނިންމާލިއިރު ދެވަނަ ހާފުގައި ޔުނައިޓެޑްއިން ވަނީ އެ ޓީމުގެ ކުޅުން ރަނގަޅު ކޮށްފައެވެ. ނަތީޖާއެއްގެ ގޮތުން މެޗުގެ 53 ވަނަ މިނެޓުގައި އެންޑަ ހެރޭރާގެ އެހީތެރިކަމާއެކު ޕައުލް ޕޮގްބާ ވަނީ ލަނޑެއް ޖަހާ ޔުނައިޓެޑަށް ނަތީޖާގެ ފަރަގު ކުޑަކޮށްދީފައެވެ. އޭގެ ދެ މިނެޓު ފަހުން ސަންޗޭޒް ތަނަވަސްކޮށްދިން ފުރުސަތަކުން އެ ޓީމަށް ނަތީޖާ ހަމަހަމަކޮށްދިނީ ވެސް ޕޮގްބާއެވެ. ކްރިސް ސްމޯލިން ވަނީ މެޗުގެ 69 ވަނަ މިނެޓުގައި ލަނޑެއް ޖަހާ ފުރަތަމަ ފަހަރަށް ޔުނައިޓެޑަށް ލީޑު ނަގައިދީފައެވެ. ސިޓީއިން އެއްވަރު ކުރުމަށް ގިނަ މަސައްކަތްތަކެއްކުރިއިރު އެ ޓީމުން ފޮނުވާލި ހަމަލާތަކުގެ ހުރަހަކަށް ވެގެންގޮސްފައިވަނީ ޔުނައިޓެޑްގެ ކީޕަރު ޑެހޭއާއެވެ.

މި މެޗުގައި ޖެހި ދެ ލަނޑާއެކު ޕޮގްބާ ވެގެންގޮސްފައިވަނީ ސިޓީކޮޅަށް 2012 ވަނަ އަހަރުގެ ފަހުން އެއް މެޗެއްގައި ދެ ލަނޑު ޖެހި ޔުނައިޓެޑްގެ ފުރަތަމަ ކުޅުންތެރިޔާއަށެވެ. މި މެޗު ވެގެންގޮސްފައިވަނީ ގާޑިއޯލާގެ އިރުޝާދުގެ ދަށުން ކުޅުނު ޓީމެއްގެ ކޮޅަށް ޖެހިޖެހިގެން ދެ މެޗުގައި ތިން ލަނޑު ވަން ފުރަތަމަ ފަހަރަށެވެ. ހަމައެހެންމެ މި މެޗަކީ 2008 ވަނަ އަހަރުގެ ފަހުން ދެ ލަނޑުގެ ލީޑެއްގައި އޮވެ ސިޓީ މެޗަކުން ބަލިވި ފުރަތަމަ ފަހަރެވެ.

ޕްރިމިއާ ލީގުގައި ލިވަޕޫލް އަދި އެވަޓަން ބައްދަލު ކުރި މެޗު 0-0 އިން އެއްވަރުވިއިރު ރަށުން ބޭރުގައި ޓޮޓެންހަމް ވަނީ 2-1 އިން ސްޓޯކް ސިޓީ ބަލިކޮށްފައެވެ.

މި މެޗުން ބަލިވި ނަމަވެސް ކުޅުނު 32 މެޗުން ލިބުނު 84 ޕޮއިންޓާއެކު ތާވަލުގެ އެއްވަނައިގައި ސިޓީ އޮތްއިރު ދެވަނައިގައި 71 ޕޮއިންޓާއެކު އޮތީ ޔުނައިޓެޑްއެވެ. ތިންވަނައިގައި ލިވަޕޫލް އޮތްއިރު ހަތަރު ވަނައިގައި އޮތީ ޓޮޓެންހަމްއެވެ.

އަންނަ ހަފްތާގައި އަމިއްލަ ދަނޑުގައި ޓޮޓެންހަމްއާ ދެކޮޅަށް ކުޅޭ މެޗުން ސިޓީ މޮޅުވެއްޖެނަމަ އެ ޓީމަށް ޕްރިމިއާ ލީގުގެ ތަށި ޔަގީންވެގެންދާނެއެވެ.