ޔުއެފާ ޔުރޮޕާ ލީގުގެ ސެމީ ފައިނަލާއި ގާތަށް އިނގިރޭސިވިލާތުގެ އާސެނަލް އަދި ސްޕެއިންގެ އެޓްލެޓިކޯ މެޑްރިޑް ޖެހިލައިފިއެވެ.

އާސެނަލް ސެމީގެ ޖާގައަކާ ގާތަށް ޖެހިލީ އަމިއްލަ ދަނޑުގައި ރަޝިއާގެ ސީއެސްކޭއޭ މޮސްކޯގެ މައްޗަށް 4-1 ގެ ނަތީޖާއަކުން ކުރި ހޯދައިގެންނެވެ. އާސެނަލްގެ ފަރާތުން މޮޅު ކުޅުމެއް ފެނިގެންދިޔަ މި މެޗުގެ ފުރަތަމަ ލަނޑު އެ ޓީމުން ޖެހީ މެޗުގެ ނުވަވަނަ މިނެޓުގައެވެ. ހެކްޓަރ ބެލެރިން ތަނަވަސްކޮށްދިން ފުރުސަތަކުން އެ ޓީމަށް ލީޑު ނަގައިދިނީ އާރޮން ރެމްސީއެވެ. އެހެން ނަމަވެސް އޭގެ ހަ މިނެޓު ފަހުން އެލެކްޒެންޑްރާ ގޮލޮވިން ވަނީ ސީއެސްކޭއަށް ލަނޑެއް ޖަހައިދީ އެ ޓީމަށް ނަތީޖާ ހަމަހަމަކޮށްދީފައެވެ.

މި ލަނޑަށްފަހު އާސެނަލްއިން އެ ޓީމުގެ ކުޅުން ވަރުގަދަކުރިއިރު އެ ޓީމުން ވަނީ 23 ވަނަ މިނެޓުގައި ލަނޑެއް ޖަހާ އަލުން އަނބުރާ ލީޑު ނަގާފައެވެ. މި ލަނޑު އެ ޓީމަށް ލިބުނު ޕެނަލްޓީއަކުން ކާމިޔާބުކޮށްދިނީ އެލެކްޒެންޑްރާ ލަކަޒެޓްއެވެ. އޭނާ މި ލަނޑު ޖެހިތާ ފަސް މިނެޓު ނުވަނީސް ރެމްސީ ވަނީ އޭނާ މެޗުގައި ޖެހި ދެވަނަ ލަނޑު ޖަހާ އާސެނަލްގެ ލީޑު ފުޅާކޮށްދީފައެވެ. އާސެނަލްގެ ހަތަރު ވަނަ ލަނޑު މެޗުގެ 35 ވަނަ މިނެޓުގައި ޖަހައިދިނީ ވެސް ލަކަޒެޓްއެވެ.

މި ދެ ޓީމު ބައްދަލުކުރާ ދެވަނަ ލެގުގެ މެޗު އަންނަ ހަފްތާގެ ބުރާސްފަތި ދުވަހު ކުޅެން ހަމަޖެހިފައިވަނީ ސީއެސްކޭއޭ މޮސްކޯގެ ދަނޑުގައެވެ.

މި މުބާރާތް ދެ ފަހަރު ކާމިޔާބުކޮށްފައިވާ އެޓްލެޓިކޯ ސެމީގެ ޖާގައަކާއި ގާތަށް ޖެހިލީ އަމިއްލަ ދަނޑުގައި 2-0 ގެ ނަތީޖާއަކުން ޕޯޗުގަލްގެ ސްޕޯޓިން ލިސްބަން ބަލިކޮށްގެންނެވެ. މި މެޗުގެ ފުރަތަމަ ލަނޑު މެޗު ފެށިގެން 23 ސިކުންތު ނުވަނީސް އެ ޓީމަށް ޖަހައިދިނީ ކޯކޭއެވެ. މިއީ މި މުބާރާތުގެ ތާރީހުގައި ވެސް އެޓްލެޓިކޯއިން ޖެހި އެންމެ އަވަސް ލަނޑެވެ. އެޓްލެޓިކޯގެ ދެވަނަ ލަނޑު މެޗުގެ 40 ވަނަ މިނެޓުގައި އެ ޓީމަށް ޖަހައިދިނީ އެންޓޮއިން ގްރީޒްމަންއެވެ.

މި ދެ ޓީމު ކުޅޭ ދެވަނަ ލެގުގެ މެޗު އަންނަ ބުރާސްފަތި ދުވަހުގެ ރޭ ކުޅޭނީ ސްޕޯޓިންގެ ދަނޑުގައެވެ.