ޔުއެފާ ޗެމްޕިއަންސް ލީގުގެ ކުއާޓަރ ފައިނަލްގެ ފުރަތަމަ ލެގުގައި އިޓަލީގެ އޭއެސް ރޯމާ ބަލިކޮށް، މުބާރާތުގެ ސެމީ ފައިނަލާއި ގާތަށް ސްޕެއިންގެ ބާސެލޯނާ ޖެހިލައިފި އެވެ.

ބާސެލޯނާގެ ދަނޑު، ކޭމްޕް ނޫގައި ކުޅުނު މިމެޗު ބާސެލޯނާ ކާމިޔާބު ކުރީ 4-1 ންނެވެ.

މިމެޗުގެ 38 ވަނަ މިނެޓުގައި ބާސެލޯނާ އިން ލީޑު ނެގީ، ރޯމާގެ މިޑްފީލްޑަރު ޑެނިއެލް ޑި ރޮސީގެ އަތުން ބައިކޮޅަށް ވަން ލަނޑުންނެވެ. މިއީ ރޯމާގެ އޭރިއާ ބޭރުން ބާސެލޯނާގެ ކުޅުންތެރިން އުފައްދަން މަސައްކަތް ކުރި ހަމަލާއެއްގައި، އޭރިއާ ބޭރުން ބާސެލޯނާގެ ކެޕްޓަން އަންދްރޭ އިނިއެސްޓާ، އެ ޓީމުގެ އެހެން ކުޅުންތެރިޔަކަށް ދިން ބޯޅައެއް ދިފާއު ކުރަން އުޅުމުގެ ތެރޭގައި ވަން ލަނޑެކެވެ.

މި ލަނޑަށްފަހު މެޗުގެ ފުރަތަމަ ހާފް ނިމުމުގެ ކުރިން ރޯމާ އަށް ނަތީޖާ ހަމަހަމަ ކުރަން ރަނުގެ ފުރުޞަތެއް ލިބި ބޭކާރުވިއެވެ. ބާސެލޯނާގެ ޕެނަލްޓީ އޭރިއާގެ ރޮނގުމަތިން ކަހަލަ ގޮތަކަށް ރޯމާގެ ލޮރެންޒޯ ޕެލެގްރިނީ އަށް ބާސެލޯނާގެ ޑިފެންޑަރު ސެމުއެލް އުމްޓިޓީ ކުރި ފައުލަކާއި ގުޅިގެން، އޭރިއާ ރޮނގުމަތިން ލިބުނު ހިލޭޖެހުމުގެ ބޭނުން ހިފޭގޮތެއް ނުވި އެވެ.

މިނަތީޖާގައި އޮވެ މެޗުގެ ފުރަތަމަ ހާފްގެ ކުޅުން ނިމުނުއިރު، ދެވަނަ ހާފްގައި ބާސެލޯނާ އިން ލީޑު ފުޅާ ކުރީވެސް ރޯމާގެ ކުޅުންތެރިޔެއް އަތުން ބައިކޮޅަށް ވަން ލަނޑަކުންނެވެ. 55 ވަނަ މިނެޓުގައި މިލަނޑު ވަދެފައިވަނީ ރޯމާގެ ޑިފެންޑަރު ކޮންސްޓެންޓީނޯސް މަނޯލާސް އަތުންނެވެ.

އޭގެ ފަސް މިނެޓު ފަހުން ބާސެލޯނާގެ ތިންވަނަ ލަނޑު ޖަހައިދިނީ ޑިފެންޑަރ ޖެރާޑް ޕީކޭ އެވެ. ރޯމާގެ ގޯލަށް އަމާޒުކޮށް ބާސެލޯނާގެ ފޯވާޑް ލުއިސް ސުއަރޭޒް ފޮނުވާލި ބޯޅައެއް، ރޯމާގެ ކީޕަރުގެ އަތުގައި ޖެހިފަ ނިކުތް ބޯޅަ ލިބުނުއިރު ޕީކޭ ހުރީ ގޯލް ކުރިމަތީ ހުސްކޮންނެވެ.

މިމެޗުގައި ރޯމާ އިން ޖެހި ހަމައެކަނި ލަނޑު، މެޗު ނިމެން 10 މިނެޓަށް ވެފައިވަނިކޮށް ޑިއެގޯ ޕެރޯޓީ ދިން ބޯޅައަކުން ޖަހައިދިނީ އެޑިން ޖެކޯ އެވެ.

ބާސެލޯނާގެ ފަހު ލަނޑު، 87 ވަނަ މިނިޓުގައި ޖަހައިދިނީ އުރުގުއާއީގެ ފޯވާޑް ލުއިސް ސުއަރޭޒް އެވެ. މިއީ ސުއަރޭޒް އެއް އަހަރުގެ ތެރޭގައި ޗެމްޕިއަންސް ލީގުގައި ޖެހި ފުރަތަމަ ލަނޑެވެ. ސްޕެނިޝް ލީގުގައި 26 މެޗުގައި 22 ލަނޑު ޖެހި ނަމަވެސް، ޔުއެފާ ޗެމްޕިއަންސް ލީގުގައި އެންމެ ފަހުން ކުޅުނު 10 މެޗުގައި ވެސް ސުއަރޭޒް އަށް ލަނޑެއް ޖެހިފައެއްނުވެއެވެ.

މިއީ ބާސެލޯނާގެ ތަރި ލިއޮނެލް މެސީ އަށް ފާއިތުވި 8 މެޗުގެ ތެރެއިން ލަނޑެއް ނުޖެހުނު ފުރަތަމަ މެޗުވެސްމެވެ.

މިމޮޅާއެކު ބާސެލޯނާ އިން 2015 ވަނަ އަހަރުގެ ފަހުން ޗެމްޕިއަންސް ލީގުގެ ސެމީ ފައިނަލުން ފުރަތަމަ ފަހަރަށް ޖާގައެއް ހޯދުމާއި ގާތަށް ޖެހިލިއިރު، އެކްލަބަށް މިއަހަރު ތިން ތަށި ހޯދުމުގެ ފުރުޞަތު އެބައޮތެވެ. ސްޕެނިޝް ލަލީގާގެ ތާވަލްގެ ކުރީގައި ބާސެލޯނާ އަށް 9 ޕޮއިންޓުގެ ލީޑެއް އޮތްއިރު، ސްޕެނިޝް ކޮޕަ ޑެލް ރޭގެ ފައިނަލުން ބާސެލޯނާ ވަނީ ޖާގަ ހޯދާފައެވެ.