ޔުއެފާ ޗެމްޕިއަންސް ލީގުގެ ކުއާޓާ ފައިނަލުގައި އިޓަލީގެ ޔުވެންޓަސް ބަލިކޮށް ސްޕެއިންގެ ރެއާލް މެޑްރިޑް ސެމީގެ އުއްމީދު ބޮޑުކޮށްފިއެވެ.

ކުއާޓާ ފައިނަލުގެ ފުރަތަމަ ލެގުގައި ޔުވެންޓަސްގެ ސްޓޭޑިއަމްގައި ކުޅުނު މެޗު ރެއާލްއިން ކާމިޔާބުކުރީ 3-0 ގެ ނަތީޖާއަކުންނެވެ. މި މެޗު ވެގެންގޮސްފައިވަނީ މި ދެ ޓީމުގެ މެދުގައި ކުޅެވުނު 20 ވަނަ މެޗަށްވާއިރު އޭގެތެރެއިން ރެއާލް ނުވަ ފަހަރު މޮޅުވިއިރު ޔުވެންޓަސް ވަނީ އަށްފަހަރަކު މޮޅުވެފައެވެ. މިދިޔަ ސީޒަނުގެ ޗެމްޕިއަންސް ލީގުގެ ފައިނަލުގައި ވެސް މި ދެ ޓީމުގެ ކުރިމަތިލުމެއް ފެނިގެންދިޔައިރު މި ދެ ޓީމުގެ ފުރަތަމަ އެގާރައިން މާ ބޮޑު ބަދަލުތަކެއް ފެނިގެން ގޮސަފައެއް ނުވެއެވެ. އެގޮތުން ރެއާލްގެ ފުރަތަމަ އެގާރައިން ގެރެތު ބޭލް ފެނިފައިނުވާއިރު ޔުވެންޓަސްގެ ފުރަތަމަ އެގާރައިން ހުއާން ކުއަޑްރާޑޯ އަދި މާރިއޯ މަންޒުކިޗްއަށް ފުރުސަތު ދީފައެއް ނުވެއެވެ.

ފުރަތަމަ ހާފު ފެށިގެން ދެ ޓީމުގެ ފަރާތުން ވެސް ވާދަވެރި ކުޅުމެއް ފެނިގެންދިޔައިރު ރެއާލްއިން ވަނީ މެޗު ފެށިގެން ތިން މިނެޓު ނުވަނީސް މެޗުގެ ފުރަތަމަ ލަނޑު ޖަހާ ލީޑު ނަގާފައެވެ. އިސްކޯގެ އެހީތެރިކަމާއެކު މި ލަނޑު ރެއާލްއަށް ޖަހައިދިނީ ކްރިސްޓިއާނޯ ރޮނާލްޑޯއެވެ. ހާފުގެ މެދުތެރެއިން ޔުވެންޓަސް މެޗުގެ ކޮންޓްރޯލް ނެގިއިރު އެ ޓީމުގެ ފޯވާޑުން ކަމަށްވާ ގޮންޒާލޯ ހިގުއައިން އަދި ޕައުލޯ ޑިބާލާއަށް ވަނީ ލަނޑު ޖެހުމަށް ރަނގަޅު ފުރުސަތުތައް ލިބި ބޭކާރުވެފައެވެ. ހަމައެހެންމެ ރެއާލްގެ ޓޯނީ ކްރޫސްގެ ބާރު ހަމަލާއެއް ޔުވެންޓަސްގެ ހުރަސް ދަނޑިއަށް އަމާޒުވިއިރު ރެއާލްގެ ކީޕަރު ކޭލާ ނަވާސްގެ ފަރާތުން ވަނީ މޮޅު ސޭވްތަކެއް މި ހާފުގައި ފެނިގެންގޮސްފައެވެ.

އެއް ލަނޑުގެ ލީޑެއްގައި އޮވެ ރެއާލްއިން ފުރަތަމަ ހާފު ނިންމާލިއިރު ދެވަނަ ހާފުގައި ވެސް ދެ ޓީމުގެ ފަރާތުން ވަނީ ރީތި ކުޅުމެއް ފެނިގެންގޮސްފައެވެ. ރޮނާލްޑޯ ވަނީ 62 ވަނަ މިނެޓުގައި ހިތްގައިމު ލަނޑެއް ޖަހައިދީ ރެއާލްގެ ލީޑު އިތުރަށް ފުޅާކޮށްދީފައެވެ. މި ހާފުގައި ޔުވެންޓަސްއަށް އިތުރު ގޮންޖެހުންތަކާއި ކުރިމަތިވެގެންދިޔައީ ދެވަނަ ރީނދޫ ކާޑަކާއެކު އެ ޓީމުގެ ފޯވާޑް ޕައުލޯ ޑިބާލާއަށް ރަތް ކާޑު ދައްކައި ދަނޑުން ފޮނުވާލުމާއެކުއެވެ. 10 ކުޅުންތެރިންނާއެކު ކުޅެމުން ދިޔަ ޔުވެންޓަސްގެ ކޮޅަށް ރެއާލްގެ ތިންވަނަ ލަނޑު ރޮނާލްޑޯ ތަނަވަސްކޮށްދިން ފުރުސަތަކުން ޖަހައިދިނީ މާސެލޯއެވެ. ދެވަނަ ހާފުގެ ފަހުވަގުތުކޮޅުގައި ވެސް ރެއާލްގެ ހަމަލާއެއް ވަނީ ޔުވެންޓަސްގެ ހުރަސް ދަނޑިއަށް އަމާޒުވެފައެވެ.

މި މެޗު ވެގެންގޮސްފައި ވަނީ 1999 ވަނަ އަހަރުގެ ފަހުން ފުރަތަމަ ފަހަރަށް އަމިއްލަ ދަނޑުގައި ޗެމްޕިއަންސް ލީގުގެ ނޮކްއައުޓް ބުރުގައި ޔުވެންޓަސް ކުޅުނު މެޗެއްގައި އެ ޓީމު ކޮޅަށް ތިން ލަނޑު ވަން މެޗަށެވެ. މި މެޗުގައި ޖެހި ދެ ލަނޑާއެކު ރޮނާލްޑޯ ވަނީ ޔުވެންޓަސްއާ ދެކޮޅަށް ކުޅުނު ހުރިހާ މެޗެއްގައި އެ ޓީމު ކޮޅަށް ލަނޑު ޖަހާފައެވެ. ހަމައެހެންމެ ރޮނާލްޑޯ ވެގެން ގޮސްފައިވަނީ ޖެހިޖެހިގެން 10 ޗެމްޕިއަންސް ލީގު މެޗުގައި ލަނޑު ޖެހި ފުރަތަމަ ކުޅުންތެރިޔާއަށެވެ. ނުވަ ލަނޑާއެކު އެއް ޓީމެއް ކޮޅަށް ރޮނާލްޑޯ އެންމެ ގިނަ ލަނޑު ޖަހާފައިވަނީ ވެސް ޔުވެންޓަސް ކޮޅަށެވެ. އޭނާ ވަނީ މިހާތަނަށް މި ސީޒަނުގައި 38 ލަނޑު ޖަހާފައެވެ. މި އަދަދަށް ޔޫރަޕުގެ ގަދަ ފަސް ލީގުގައި ކުޅޭ އެހެން އެއްވެސް ކުޅުންތެރިޔަކަށް ލަނޑު ޖެހިފައެއް ނުވެއެވެ.

މި ދެ ޓީމު ބައްދަލުކުރާ ދެވަނަ ލެގުގެ މެޗު އޮންނާނީ އަންނަ ހަފްތާގެ ބުދަ ދުވަހުގެ ރޭ ރެއާލްގެ ދަނޑުގައެވެ.