ބާހުބަލީ 2 ވެސް ޗައިނާއަށް

ފަހަކަށް އައިސް އިންޑިއާގެ ފިލްމުތަކަށް ޗައިނާގެ ބޮކްސް އޮފީހުގައި ބޮޑު ކާމިޔާބީއެއް ލިބެމުންނެވެ.

މިހާތަނަށް ޗައިނާގައި އެޅުވި އިންޑިއާގެ ފިލްމުތައް ކާމިޔާބެވެ. އެގޮތުން އާމިރު ޚާންގެ "ޑަންގަލް"، "ސީކްރެޓް ސުޕަސްޓަރ" ފާހަގަ ކޮށްލެވެއެވެ.

މިދިޔަ އަހަރުގެ އެޕްރީލް މަހުގެ 28 ވަނަ ދުވަހު ސިނަމާތަކަށް އައި "ބާހުބަލީ 2" ވެސް ޗައިނާ މާކެޓަށް ނެރުމަށް މިހާރު ވަނީ ނިންމާފައެވެ. "ބާހުބަލީ 2" އަކީ މިހާތަނަށް އިންޑިއާގެ ފިލްމަކަށް އެންމެ ބޮޑު އާމްދަނީ ހޯދާފައިވާ އެއް ފިލްމެވެ. ޚަބަރުތައް ބުނާ ގޮތުން "ބާހުބަލީ 2" ޗައިނާގެ ސެންސަރު ބޯޑުން މިހާރު ވަނީ ފާސްކޮށްފައެވެ. އަދި ޗައިނާގައި މި ފިލްމު އެޅުވުމުގެ އެންމެ ފަހުގެ ތައްޔާރީތައް މިހާރު ދަނީ ކުރަމުންނެވެ.

މީގެ ކުރިން އަޑުތައް އަރާފައިވާ ގޮތުގައި މި ފިލްމު ޗައިނާގައި އަޅުވާނީ އަންނަ ސެޕްޓެމްބަރު މަހުގެ ތެރޭގައެވެ. އެހެން ނަމަވެސް އަދި ރަސްމީކޮށް މިކަން ހާމަކޮށްފައެއް ނުވެއެވެ.

ޗައިނާގައި ރިލީޒްކުރުމާ އެކު އެފިލްމަށް ލިބިފައިވާ އާމްދަނީ ދެގުނައަށް ބޮޑުވާނެ ކަމަށް ޔަގީން ކުރެވޭ ކަމަށް ބެލެވެއެވެ. މި ފިލްމު އަޅުވާފައި ވަނީ 2.5 ބިލިއަން އިންޑިއަން ރުޕީސްގެ ބަޖެޓަކުންނެވެ. މިފިލްމަށް ވަނީ 17.065 ބިލިއަން އިންޑިއަން ރުޕީސް ލިބިފައެވެ. އެސްއެސް ރާޖަމޯލީ ޑައިރެކްޓް ކޮށްފައިވާ "ބާހްބަލީ 2" އަޅުވާފައި ވަނީ 9000 ސްކްރީނެއްގައެވެ.

އިންޑިއާގެ 6،500 ސިނަމާގައި އަޅުވާފައިވާއިރު އިންޑިއާ ނޫން އެހެން ގައުމުތަކުގެ 2،000 ސިނަމާގައި ވަނީ އެ ފިލްމު އަޅުވާފައެވެ. "ބާހުބަލީ 2" ގައި ޕްރަބާސްގެ އިތުރުން ފެނިގެން ދަނީ ތަމަންނާ ބާޓިއާ، އަނުޝްކާ ޝެޓީ، ރާމިއާ ކްރިޝްނަން އަދި ރާނާ ދަގޫޕަތީ އެވެ.