ބާހުބަލީ 2 ސިނަމާތަކަށް އައިތާ އެއްއަހަރު: ބައިވެރިން އުފާ ފާޅުކުރަނީ

މިދިޔަ އަހަރު ސިނަމާތަކަށް އައި އަދި މުޅި އިންޑިއާ ސިއްސުވާލި ދެކުނު އިންޑިއާގެ ފިލްމު "ބާހުބަލީ 2: ދަ ކޮންކުލޫޝަން" ސިނަމާތަކަށް އައިތާ އެއްއަހަރު ފުރުން އެ ފިލްމުގެ ޓީމުން ފާހަގަ ކުރަމުން އެބަދެއެވެ.

"ބާހުބަލީ 2" އަކީ އެންމެ ފުރަތަމަ އިންޑިއާގެ ފިލްމަކަށް 1,500 ކުރޯޑް ރުޕީސް ލިބުނު ފިލްމެވެ.

"ބާހްބަލީ2" އަށް ވަނީ މިހާތަނަށް 1800 ކުރޯޑް އިންޑިއަން ރުޕީސް ލިބިފައެވެ. އެސްއެސް ރާޖަމޯލީ ޑައިރެކްޓް ކޮށްފައިވާ "ބާހްބަލީ 2" 9000 ސްކްރީނެއްގައި އަޅުވާފައިވެއެވެ.

އިންޑިއާގެ 6،500 ސިނަމާގައި އަޅުވާފައިވާއިރު އިންޑިއާ ނޫން އެހެން ގައުމުތަކުގެ 2،000 ސިނަމާގައި ވަނީ އެ ފިލްމު އަޅުވާފައެވެ.

މުޅި ދުނިޔެއިން ލިބުނު ކާމިޔާބީއަށް ފަހު މި ފިލްމު ޗައިނާގައި އެޅުވުމުގެ މަސައްކަތް ދަނީ ކުރަމުންނެވެ. އެސްއެސް ރާޖަމޯލީ ބުނެފައިވަނީ ޗައިނާގައި މި ފިލްމު އަންނަ މެއި މަހުގެ 4 ވަނަ ދުވަހު ރިލީޒް ކުރާނެ ކަމަށެވެ.

މިފިލްމުގެ މި ކާމިޔާބީތަކަށް އެއް އަހަރު ވުމާއި ގުޅިގެން ފިލްމުގެ މައި ކެރެކްޓަރ އިން ފެނިގެންދިޔަ ޕްރަބާސް ވަނީ އޭނާއަށް އަބަދުވެސް މިފިލްމު ޚާއްސަ ވާނެ ކަމަށާއި މުޅިފިލްމުގެ ޓީމަށް އޭނާގެ ފަރާތުން މަރުހަބާ ކިޔާކަމަށް ބުނެ އޭނާގެ ފޭސްބުކް ޕޭޖުގައި ޕޯސްޓުކޮށްފައެވެ.

ފިލްމުގެ ޑައިރެކްޓަރ އެސްއެސް ރާޖަމޯލީ ކޮށްފައިވާ ޓްވީޓެއްގައި ބުނެފައިވަނީ އޭނާ ހުރީ ވަރަށް އުފަލުން ކަމަށާއި ބާހުބަލީ 2 އަކަށް އެއްއަހަރުވުމާއި ގުޅިގެން އޭގެ އުފަލުގައި ޖަޕާނުގެ ޓޯކިޔޯގައި ފިލްމު އަޅުވާފައިވާކަމަށެވެ.

މަޝްހޫރު ޑައިރެކްޓަރ އަދި ޕްރޮޑިއުސަރ ކަރަން ޖޯހަރަކީ މި ފިލްމު ހިންދީ ބަހުން ޑަބްކޮށްގެން ގެނެސްދިން ފަރާތެވެ. އޭނާ ކޮށްފައިވާ ޓްވީޓެއްގައި ބުނެފައިވަނީ ބާހުބަލީ2ގެ ބައެއްގައި މަސައްކަތް ކުރަން ލިބުން އެއީ އޭނާ ވަރަށް އުފާވެ ފަޚުރުވެރިވާކަމެއްކަމަށެވެ.

ބާހުބަލީ2 ސިނަމާތަކަށް އައިސްފައިވަނީ މިދިޔަ އަހަރުގެ އެޕްރީލް މަހުގެ 28 ގައެވެ.