އިތުބާރު ނެތްކަމުގެ ވޯޓް ނެގުމުގެ ކުރިން ބޮޑުވަޒީރު ރަނިލް ވިކްރަމަ ސިންހަ އިސްތިއުފާދެއްވުމަށް ދެންނެވުމަށް ސްރީ ލަންކާ ފްރީޑަމް ޕާޓީގެ ޕާލިމެންޓްރީ ގްރޫޕުގެ އިއްތިފާގުން ހޯމަ ދުވަހު ހަވީރު ނިންމައިފިއެވެ.

ބޮޑުވަޒީރު ރަނިލް ވިކްރަަމަ ސިންހަގެ އިތުބާރު ނެތްކަމުގެ މައްސަލަ ތާވަލުކޮށްފައިވަނީ ބުދަ ދުވަހަށެވެ.

އެސްއެލްއެފްޕީގެ ތަރުޖަމާނު އަދި އަދި ސްޓޭޓް މިނިސްޓަރ ދިލަން ޕެރޭރާ ވިދާޅުވީ ތިން ގަޑިއިރަށް ދެމިގެންދިޔަ ބައްދަލުވުމަކަށްފަހު ޕާލިމެންޓްރީ ގްރޫޕްގެ 42 މެމްބަރުންގެ އިއްތިފާގުން ނިންމާފައިވާ ނިންމުން ރައީސް މައިތިރިޕާލާ ސިރިސެނާއަށް ދަންނަވާފައިވާކަމަށެވެ.

އެސްއެލްއެފްޕީގެ ނިންމުމާއިބެހޭ މައުލޫމާތު ހިއްސާ ކުރެއްވުމަށް އަންގާރަ ދުވަހުގެ ހަވީރު 4:00ގައި ބޮޑުވަޒީރު ރަނިލް ވިކްރަމަ ސިންހައާއި މެމްބަރުން ބައްދަލުކުރައްވާނެ ކަމަށްވެސް އޭނާ ވިދާޅުވިއެވެ.

ސްޓޭޓް މިނިސްޓަރ ލަކްޝްމަން ޔަޕާ އަބޭވަރްދަނަ ވިދާޅުވީ ރަނިލް އިސްތިއުފާ ދެއްވުމަށް ދެކޮޅު ހައްދަވައިފިނަަމަ އެސްއެލްއެފްޕީގެ ޕާލިމެންޓްރީ ގްރޫޕް އެކުގައި ރަނިލްއާ ދެކޮޅަށް ވޯޓްދޭނެ ކަމަށެވެ.

އޭނާ ވިދާޅުވީ ރައީސްއާއި ސަރުކާރު އިތުރު ދަތިކަމަކަށް ގެންދިއުމަށްވުރެ ބޮޑުވަޒީރު ރަނިލްއަށް ރަގަޅުވާނީ އިސްތިއުފާ ދެއްވުން ކަމަށެވެ.